نيدەرلاندىداعى ق ر ەلشىلىگىنىڭ كونسۋلدىق بولىمشەسى قازاقستاندىقتارعا بريۋسسەلدەگى تەراكتىلەرگە بايلانىستى ادامدار كوپ جينالاتىن ورىنداردان مەيلىنشە اۋلاق جۇرۋگە كەڭەس بەرەدى، - دەپ حابارلايدى «قامشى» پورتالى قازاقپاراتقا سىلتەمە جاساپ.

«قۇرمەتتى وتانداستار! 22 ناۋرىزدا بريۋسسەلدە (بەلگيا كورولدىگى) ورىن العان تەراكتىلەرگە بايلانىستى، نيدەرلاندى رەسپۋبليكاسىنداعى قازاقستان ەلشىلىگىنىڭ كونسۋلدىق بولىمشەسى سىزدەردى ادام كوپ جينالاتىن ورىندارعا ۋاقىتشا بارماۋدى سۇرايدى»، - دەلىنگەن ەلشىلىكتىڭ تاراتقان حابارىندا.

توتەنشە جاعداي ورىن العان جاعدايدا، كونسۋلدىق بولىمشەگە مىنا تەلەفون نومىرلەرى ارقىلى قوڭىراۋ شالۋعا بولادى: 070 427 22 20، 06 81 86 94 38.

ەسكە سالا كەتەيىك، بريۋسسەل اۋەجايىندا 22 ناۋرىز كۇنى ەكى بىردەي جارىلىس بولدى. الەمدىك ب ا ق حابارلاۋىنشا، سالدارىنان 13 ادام قازا تاپتى. كەيىن اراسىنا ءبىر ساعات سالىپ، قالا ورتالىعىندا ورنالاسقان «ماەلبەك» مەترو ستانساسىندا ۆاگون ىشىندە تاعى ءبىر جارىلىس ورىن الدى. وندا كەمىندە 15 ادام كوز جۇمدى.