يۋنەسكو-نىڭ «ادام جانە بيوسفەرا» باعدارلاماسىنىڭ حالىقارالىق ۇيلەستىرۋ كەڭەسى (حۇك) بيوسفەرالىق قورىقتاردىڭ دۇنيەجۇزىلىك جەلىسىن 20 جاڭا قورىقپەن تولىقتىردى. ولاردىڭ اراسىندا ارال تەڭىزى باسسەينىندە ورنالاسقان «بارساكەلمەس» قورىعى بار، - دەپ حابارلايدى «قامشى» پورتالى قازاقپاراتقا سىلتەمە جاساپ.

يۋنەسكو-نىڭ سايتىنان حابارلاعانداي، 1970-شى جىلداردىڭ باسىندا قۇرىلعان «ادام جانە بيوسفەرا» باعدارلاماسى ادام مەن تابيعاتتىڭ ءوزارا ىقپالداستىعىن جاھاندىق وڭتايلاندىرۋعا باعىتتالعان عىلىمي ۇكىمەتارالىق جوبا بولىپ تابىلادى.

«بيوسفەرالىق قورىقتاردىڭ دۇنيەجۇزىلىك جەلىسى جىل سايىن قۇرامىنا يۋنەسكو-عا مۇشە 34 مەملەكەتتىڭ وكىلى بار باعدارلامانىڭ حالىقارالىق ۇيلەستىرۋ كەڭەسىنىڭ شەشىمى بويىنشا تولىقتىرىلادى»، - دەلىنگەن حابارلامادا.

ۇيىمنىڭ اتاپ وتۋىنشە، بارساكەلمەس بيوسفەرالىق قورىعى (قازاقستان) ساحارادان گوبيگە دەيىن جالعاساتىن شولەيتتى بەلدەۋدىڭ قاق ورتاسىندا، ارال تەڭىزىنىڭ باسسەينىندە ورنالاسقان.

«ارال تەڭىزىنىڭ ايماعى ءشولدى باتپاق جۇيەلەرى مەن جىل قۇستارىنىڭ ميگراسيالىق باعىتتارىن ساقتاپ قالۋ ءۇشىن ماڭىزدى ايماق بولىپ تابىلادى. قورىق ارال تەڭىزىنىڭ بيوالۋانتۇرلىلىگىن ساقتاۋ ىسىندە باستى ءرول اتقارادى. اتاپ وتكەندە، مۇندا 2 مىڭعا جۋىق ومىرتقاسىزدار، سۇتقورەكتىلەردىڭ 30 ءتۇرى، قۇستاردىڭ 178 ءتۇرى جانە رەپتيليالاردىڭ 20 ءتۇرى بار. قورىقتىڭ اۋماعىندا سونداي-اق قازاق كوشپەندىلەرىنىڭ كونە جىبەك جولىندا ورنالاسقان ءتورت ورتاعاسىرلىق ورتالىعى ورنالاسقان»، - دەلىنگەن حابارلامادا.