ءتىپتى قايىرىمسىز دەگەن ادامنىڭ جۇرگەنىڭ تۇبىنەن مەيىرىم تابىلادى. سونىڭ ءبىر دالەلى – «جان جىلۋى» باعدارلاماسى. ءبىر عانا مىسال، دارىگەرلەر ءتىپتى «ادام قاتارىنا قوسىلۋى ەكىتالاي» دەپ اۋرۋحانادان دا شىعارىپ تاستاعان ديدار قايىپوۆ سوڭعى ءۇمىتىن ارقالاپ «جان جىلۋىنا» كەلگەن ول قايىرىمدى جانداردىڭ كومەگىمەن ەمدەلۋگە 7 مىڭ اقش دوللارىن جيناپ قانا قويماي، الماتى وبلىسى اكىمدىگىنەن باسپاناعا قول جەتكىزىپ، مەملەكەت تاراپىنان تەگىن پروتەزگە يە بولعان. بۇگىندە ديدار اياققا تۇرىپ، ءتىپتى ۇيلەنۋگە دە تالپىنىس جاساپ جاتقانعا ۇقسايدى. جالپى وسىنداي 20 جەتىم بالاعا وتباسى جىلۋىن سىيلاپ، 13 بالانىڭ ءومىرىن اجال اۋزىنان الىپ قالعان، ۇيسىز-كۇيسىز 8 بىردەي وتباسىنىڭ باسپانالى بولۋىنا تىكەلەي سەپتىگى تيگەن «جان جىلۋى» باعدارلاماسىنا بيىل 5 جىل.
وسىعان وراي، ناۋرىزدىڭ 14ء-ى ساعات كەشكى 19.00-دە استانا قالاسى «قازاقستان» ورتالىق كونسەرت سارايىندا «جان جىلۋى» قايىرىمدىلىق كونسەرتى وتكەلى جاتىر. وندا وسى باعدارلامانىڭ ارقاسىندا ومىرىندە ۇلكەن وزگەرىستەر بولعان كوپتەگەن كەيىپكەرلەر كەلىپ، وزدەرى جايلى بايانداپ بەرەدى. جانە ولاردىڭ بۇعان دەيىنگى ومىرلەرىنەن بەينەكورىنىستەر كورسەتىلەدى. ەستەرىڭىزگە سالا كەتسەك، سولاردىڭ كەلەسى بىرەۋلەرى – ءۇش جاسار ارۋجان ورازبەكوۆا مەن 12 جاستاعى رامازان ەسماعامبەتوۆ. ەكەۋى دە تۋعاننان كالسيي جەتىسپەۋشىلىگىنىڭ زارداپ شەگىپ، سونىڭ سالدارىنان نەبارى ءۇش جاسقا دەيىن ارۋجاننىڭ اياعى 30 جەردەن، ال رامازاننىڭ ءتىپتى دەنە سۇيەكتەرى 50 جەردەن سىنعان. جانە جارىق دۇنيەگە ساپ-ساۋ بوپ كەلىپ، تەك ەندى عانا قىلىعى شىعىپ جۇگىرىپ جۇرگەن ساتىندە اناسىنىڭ كوزىن الا بەرە، قايدان تاپقانى بەلگىسىز، مارگانسوۆكا ۇنتاعىن جۇتىپ قويىپ وڭەشىن كۇيدىرىپ العان اسەت ەسىمدى ءبۇلدىرشىن. وسىلاردىڭ بارلىعىن ءبىز «جان جىلۋى» ارقىلى كورگەندە جان-جۇرەگىمىز ەزىلىپ، ءتىپتى مەيىرىمدىلەرىمىز قولىمىزدان كەلگەن كومەگىمىزدى كورسەتۋگە كىرىسىپ تە كەتىپ ەدىك قوي. جوعارىدا ديدار قايىپوۆقا كورسەتىلگەن كومەك جايلى جازساق، ەندى وسى اتتارى اتالعان ءۇش جاسار ارۋجان مەن 10 جاستان ەندى عانا اسا بەرگەن رامازان، ياعني، تاعدىرى ەگىز ەكەۋ دە ماسكەۋگە بارىپ ەمدەلىپ، وزدىگىنەن وتىرىپ، ءتىپتى ارۋجان جۇرە الاتىن دا حالگە جەتىپ وتىر. ايتا كەتۋ كەرەك، ارۋجانعا كومەك قولىن سوزعان «جاس وتان» جاستار قاناتى. ولار قايىرىمدىلىق كونسەرتىن ۇيىمداستىرىپ، التى ميلليون تەڭگە قاراجات جيناپ بەرگەن. ال استانا قالاسى اكىمدىگى رامازانعا ەكى بولمەلى پاتەر سىيلاعان. ءقازىر ول ۇيدەن بولسا دا ساباق وقىپ ءجۇر.
وسىلاردى ءوز كوزىڭىزبەن كورگىڭىز كەلسە، ناۋرىزدىڭ 14ء-ى كۇنى ساعات كەشكى 19.00-دە استانا قالاسى «قازاقستان» ورتالىق كونسەرت سارايىندا وتەتىن«جان جىلۋى» قايىرىمدىلىق كونسەرتىنە كەلىڭىز. كونسەرت تەگىن. ەسەسىنە سىزدەر ءۇشىن بۇل كەشتە گۇلنۇر ورازىمبەتوۆا، دوسىمجان تاڭاتاروۆ، باقىت شادايەۆا، ارداق بالاجانوۆا، جاڭاباي وتەگەن ۇلى، مايرا ءىلياسوۆا سىندى قازاق ەسترادا جۇلدىزدارى عانا ەمەس، سونىمەن بىرگە مۇمكىندىگى شەكتەۋلى جانداردان قۇرالعان «قولارباداعى بيشىلەر» توبى مەن «شاشۋ» وتباسىلىق ءانسامبلىنىڭ قايتالانباس ونەرىن تاماشالايسىزدار. كەش قوناقتارى قاتارىندا قوعام قايراتكەرلەرى، دەپۋتاتتار مەن كەيىپكەرلەرگە كومەك بەرگەن مەسەناتتار، ب ا ق وكىلدەرى، ونەر جۇلدىزدارى بولادى. ال كونسەرت سوڭىندا تاعى ءبىر كومەككە مۇقتاج بۇلدىرشىنگە قايىرىمدىلىق كورسەتىلەدى. ياعني، قالاساڭىز ءسىزدىڭ دە كەۋدەڭىزدەگى مەيىرىم، شاپاعاتىڭىز وسى كەشتە كوڭىلىڭىز قالاعان جانعا كومەك قولىن ۇسىنۋدان ەرەكشە شابىت الاتىن بولادى. ال ول قايىرىمىڭىز ابايسىزدا مارگانسوۆكا ۇنتاعىن جۇتىپ قويىپ، وڭەشى كۇيىپ قالعان ءتورت جاسار الماتىلىق اسەت جيەنبەكوۆكە كوپ كومەگىن تيگىزەتىنىن ۇمىتپاعايسىز.
