استانادا توعىز قاباتتى تۇرعىن ۇيدە ەكى پاتەر ورتەنىپ، ءۇش ادامعا ءيىس ءتيىپ قالدى، بەس ادام قۇتقارىلىپ، تاعى 20-عا جۋىق ادام ءقاۋىپسىز جەرگە كوشىرىلدى دەپ حابارلايدىTengrinews.kz ق ر توتەنشە جاعدايلار مينيسترلىگىنىڭ باسپا ءسوز قىزمەتىنە سىلتەمە جاساپ. مامانداردىڭ مالىمەتىنشە، 11 ناۋرىزدا ساعات 15.53-تە سارىارقا اۋدانىنداعى 188-كوشەدە كوپقاباتتى ءۇيدىڭ ءۇشىنشى قاباتىنداعى ءبىر پاتەردە ءورت شىققان. جالىن اپ-ساتتە ۇدەپ، ءتورتىنشى قاباتتاعى پاتەردىڭ بالكونىنا اۋىسادى. "ءورتتىڭ اۋدانى 20 شارشى مەتردى قۇرادى. بەس ادام، ونىڭ ىشىندە، ءبىر بالا قۇتقارىلدى جانە 19 ادام ءقاۋىپسىز جەرگە كوشىرىلدى، ولاردىڭ اراسىندا 10 بالا بار"، - دەلىنگەن مينيسترلىكتىڭ حابارلاماسىندا. وقيعا ورنىنان ىستان ۋلانعان ءۇش ادام اۋرۋحاناعا جەتكىزىلدى. ءورت ساعات 16.30-دا تولىق زالالسىزداندىرىلدى. بۇل جۇمىستارعا استانا قالالىق توتەنشە جاعدايلار دەپارتامەنتىنىڭ جەكە قۇرامىنان 20 مامان مەن 8 تەحنيكا تارتىلدى. وقيعادان زارداپ شەككەندەرگە اپات مەديسيناسى ورتالىعىنىڭ ءۇش مامانى العاشقى كومەك كورسەتتى. ەسكە سالا كەتەيىك، 9 ناۋرىز كۇنى استانادا جاتاقحانالاردىڭ ءبىرىنىڭ بولمەسى ورتەنىپ، 60 ادام ءقاۋىپسىز جەرگە دەرەۋ كوشىرىلگەن ەدى. ال 7 ناۋرىز كۇنى بەسقاباتتى كوپپاتەرلى ۇيدە ءورت شىعىپ، ءتورت ادام يىستەن ۋلانىپ قالدى، ونىڭ ەكەۋى قايتىس بولدى.

Tengrinews.kz