ناۋرىز مەيرامى – بارلىق قازاقستاندىقتار ءۇشىن تاۋەلسىز مەملەكەتىمىزدىڭ قالىپتاسۋىمەن بىرگە جالپى حالىقتىق سۇيىكتى مەرەكەگە اينالعان.

كوكتەمنىڭ وسى ءبىر شۋاقتى كۇنى قاراشاڭىراق قازۇۋ الاڭىندا “كەرەمەت” ستۋدەنتتەردى قولداۋ ورتالىعىنىڭ ۇيىمداستىرۋىمەن ۇلىستىڭ ۇلى كۇنى – ناۋرىز مەيرامى ءوتتى. مەرەكەلىك ءىس-شارا قىدىر اتانىڭ اق باتاسىمەن اشىلدى. شارا بارىسىندا  ءال-فارابي اتىنداعى قازۇۋ رەكتورى عالىمقايىر مۇتان ۇلى:

“ەلىمىزگە بەرەكە-بىرلىك، ءاربىر جانۇياعا باقىت، جاقسىلىقتار تىلەيمىز. بۇگىن مەرەكە قارساڭىندا الاڭنىڭ اشىلۋى بارلىعى دا سىزدەر ءۇشىن. الداعى ۋاقىتتا الاڭعا ات بەرىلەدى. بۇگىنگى مەرەكە تەك قانا باسى. 16 ءساۋىر كۇنى سىرتقى ىستەر مينيسترلىگىمەن الەمدىك دەڭگەيدە ناۋرىز مەيرامىن اتاپ وتەمىز دەپ جوسپارلاپ وتىرمىز. ءاربىر مەرەكەلىك جيىنداردا باسىمىزدى قوساتىن كيەلى ۇلكەن قاراشاڭىراق قازۇۋ جاساي بەرسىن! ”، – دەگەن اق تىلەگىن ارنادى.

مەرەكەلىك جيىنعا وقۋ ورداسىنىڭ بارلىق  فاكۋلتەت، كافەدرا باسشىلارى، وقىتۋشىلار مەن ستۋدەنتتەر جانە ارنايى شاقىرتىلعان قوناقتار قاتىستى. مەرەكەلىك جيىندا كيىز ءۇي دە تىگىلىپ، داستارحان جايىلىپ، ۇلتتىق ويىندار مەن اسەم اندەر دە شىرقالدى. جاتاقحانا ستۋدەنتتەرىنىڭ اراسىندا “شىلدەحانا”، “بەتاشار، سالەم سالۋ”، “قۇدا تاباق”، “تۇساۋ كەسەر” سىندى ۇلتتىق ءسالت-داستۇر تۇرلەرىنەن كورىنىستەر كورسەتىلدى. “تۇساۋ كەسەر” ءداستۇرىن كورسەتۋ بارىسىندا ءبىلىم ورداسىنىڭ رەكتورى عالىمقايىر مۇتان ۇلى: “باقىتتى، دامىعان، كورىكتى ەلىمىزدىڭ الدىڭعى قاتارلى ازاماتى بولسىن! سابىر بالا اتا-اناسىنىڭ، اۋلەتىنىڭ كوز قۋانىشى، قازاق ەلىنىڭ ماقتانىشى بولسىن!”، – دەگەن تىلەگىن ارناپ، سابىر اتتى بالانىڭ تۇساۋىن الا جىپپەن كەستى.

سونداي-اق، جاستار اراسىندا “ارقان تارتىس”،  “بۇقا تارتىس”،  “كۇرەس”،  “گىر كوتەرۋ”، “توعىزقۇمالاق”، “قول كۇرەستىرۋ” ويىندارىنان سايىس وتكىزىلىپ، ناتيجەسىندە حيميا فاكۋلتەتىنىڭ 1-كۋرس ماگيسترانتى ەرسىن كارىبايەۆ I ورىن، بيولوگيا فاكۋلتەتىنىڭ ستۋدەنتى بەيسەن قۇمار II ورىن جانە III ورىندى سماعۇل جاقسىلىق يەلەندى. سونىمەن قاتار، توعىزقۇمالاق ويىنىنان حيميا، بيولوگيا فاكۋلتەتىنىڭ ستۋدەنتتەرى  التىنگۇل ناعىمانوۆا، ءالىپ ۇلى ءامىر، اينۇر مولداحمەتوۆا جۇلدەلى ورىندارعا يە بولدى.

“جالپى ناۋرىز مەرەكەسىندە ۇلتتىق ويىنداردان سايىس جىل سايىن ۇيىمداستىرىلادى. ويىن وتە كەرەمەت، قىزىقتى ءوتتى. بۇل سايىسقا ستۋدەنت جاستارمەن قاتار وقىتۋشىلار، قوناقتار دا قاتىسادى. ويىن ناتيجەسىندە جۇلدەگەرلەر باعالى سىيلىقتارمەن ماراپاتتالادى،” – دەيدى توعىزقۇمالاقتان سپورت شەبەرى اينۇر شاحار قىزى.

مەرەكەلىك ءىس-شارا بارىسى ونەر جۇلدىزدارى عادىلبەك جاناي، بەيبىت كۋشكالييەۆ، “جەتى”  توبى جانە ستۋدەنت جاستاردىڭ ءان شاشۋىنا ۇلاستى.

تۇسىنىستىكتى تۋ ەتىپ، بەرەكە مەن بىرلىككە، ادامگەرشىلىك پەن يماندىلىققا ۇندەيتىن ناۋرىز مەيرامى وتانىمىزعا قۇت-بەرەكە، حالقىمىزعا يگى جاقسىلىق، ءاربىر شاڭىراققا شاتتىق پەن باقىت اكەلسىن! ۇلىس وڭ بولسىن، اعايىن!

زارينا توقتاروۆا