اقىن، «قازاق ءۇنى» رەسپۋبليكالىق گازەتىنىڭ پرەزيدەنتى قازىبەك يسا مەن جۋرناليست، «اق جول» پارتياسى ورتالىق كوميتەتىنىڭ حاتشىسى ارمان سقابىل ۇلى «اق جول» پارتياسىنىڭ دەپۋتاتتىق مانداتتاردى ءبولۋ تۋرالى شەشىمىنە نارازىلىق ءبىلدىردى، - دەپ حابارلايدى «قامشى» پورتالى.
پورتال وقىرماندارىنىڭ نازارىنا قوس قالامگەردىڭ مالىمدەمەلەرى مەن پارتيا جيىنىندا سويلەگەن سوزدەرىن ۇسىنامىز.
قازىبەك يسا: ۇلتىڭدى سۇيگەنىڭ ءۇشىن كەشىرمەيتىن زامان بولىپ تۇر!..
ءقازىر وپپوزيسيالىق باعىتىڭ بولسىن، وي-پىكىر قايشىلىعىڭ ، قانداي قارسىلىعىڭ بولسا دا، كەشىرۋگە بار، تەك ۇلتتىق ۇستانىمىڭ ءۇشىن، ۇلتىڭدى سۇيگەنىڭ ءۇشىن كەشىرمەيتىن زامان بولىپ تۇر. الاش ارىستارى كەزىنەن كەلە جاتقان بۇل قاسىرەت سول الاشتىڭ ارمانى بولعان تاۋەلسىزدىككە شيرەك عاسىر تولسا دا، ءالى كەتپەي تۇر ەكەن… ءبىر تاڭقالارلىعى، پارىققا دا، پايىمعا دا سىيمايتىن پارادوكس – الاش زامانىندا ۇلتتىق ۇستانىمعا وتارلاۋشى ەل كەڭەس يمپەرياسى قارسى بولسا، ءقازىر تاۋەلسىز ەلىمىزدە ءوز قولىمىز جەتكەن ءوز بيلىگىمىز، ءوز مەملەكەتىمىز قارسى بولىپ وتىر. ياعني، قانشاما جىل كيگەن قۇلدىق قامىتىمىز شەشىلگەنىنە 25 جىل بولسا دا، قۇلدىق سانادان قۇتىلماعان ەكەنبىز…
حالىقتىڭ ءسوزىن سويلەگەنى ءۇشىن حالىق جاۋى قىلاتىن زاماندى قولدان جاساعاندار، ەل مەن ەلباسىنىڭ اراسىنا التىن كوپىر بولۋدىڭ ورنىنا، قاراباستارىنىڭ قامى ءۇشىن جۇڭگو قورعانىن ورناتىپ وتىرعاندار دا كەتەدى ەرتەڭ. ولاردىڭ قازاقتىڭ قامىن جاساۋدىڭ ورنىنا، قاستىق جاساپ كەلگەندەرىن ەرتەڭ تاريح تايعا تاڭبا باسقانداي ەتىپ اشكەرەلەيتىن بولادى. بۇل تابيعي دا، تاريحي دا زاڭدىلىق. قىسپاققا سالعان قىتىمىر قىستىڭ كەتكىسى كەلمەۋى مۇمكىن…، كوكاراي كوكتەمنىڭ كەشىگۋى مۇمكىن، ءبىراق كەلمەي قويماتىنى قانداي اقيقات بولسا، بۇل ۇلتتىق جاڭارۋدىڭ دا كەلمەي قويمايتىنى سونداي اقيقات. تەك سول كوكتەمنىڭ، سول جاڭارۋدىڭ تىم كەشىگىپ كەلۋى كوپ كەسەپاتىن تيگىزەتىنى قيىن-اق… كوكتەم كەشىكسە، جاڭارۋ كەشەۋىلدەي بەرسە، ەسكى ءشىري بەرەدى… ءبىراق بيىل استاناعا كوكتەم جىلداعىدان ەرتە كەلدى. ەندەشە، كوپ كەشىكپەي ناۋرىزداي ناعىز جاڭارۋ دا جەتەدى دەپ سەنەمىز! جاڭارۋدىڭ جارقىن بەلگىسى -جاڭا جىلدارىڭىز – ناۋرىزىمىز قۇتتى بولسىن! جاڭا جىلدا ءار ازاماتتىڭ الدىنان اق جول اشىلسىن!
“اق جول” پارتياسىنداعى ارىپتەستەرىمدى ءبىر اتانىڭ بالاسىنداي باۋىرلاسىپ كەتكەنىمىز ءۇشىن قادىرلەيمىن. بيىلعى الالىعى از ەمەس الاماندى ءارقايسىمىز، باسشىمىز بار، قوسشىمىز بار، جۇرگىزۋشىلەرىمىزگە دەيىن جۇگىرىپ ءجۇرىپ، كۇن دەمەي، ءتۇن دەمەي شاپقىلاپ وتكىزدىك. پارتياعا بۇل جولى ەشقانداي وكپەم جوق. وتكەن سايلاۋدا بولعان داۋلاردى “ەر شەكىسپەي ، بەكىسپەيدى” دەگەندەي، باسارازدىقتىڭ باسىن اشىپ، ۇستانىمدارىمىزدى ايقىنداپ العانىمىز بار. ءقازىر ءبارىمىز ءبىر-بىرىمىزدىڭ بەتىمىزگە تىك قارايمىز دەپ ويلايمىز. ەشقانداي پارتياعا مۇشە بولماي، وسى پارتيانىڭ باسىنان بەرى وتىنا كۇيىپ، سۋىعىنا توڭىپ كەلەمىن. پارتيانىڭ پارلامەنتتە بولعان بۇرىنعى قۇرامى ءتوراعادان باسقاسى تۇگەل جاڭارۋى كەرەك ەدى… پارتياعا حالىق بەرگەن مانداتتى ەشكىم جەكەشەلەندىرىپ الماۋى كەرەك. ايتپەسە، پارتيانىڭ جۇمىسىن ىستەپ وتىرعانشا، جوعارىمەن جۇمىس ىستەۋ كەرەك ەكەن عوي دەگەن وي تۋىپ جاتىر. “اق جول” ءوز تىزگىنىن ءوزى ۇستاي الاتىن، ءوزىنىڭ شەشىمىن ءوزى شىعاراتىن، ءوز جولىن ءوزى ايقىندايتىن «اق جولعا» اينالسىن! “اق جولعا” ءاردايىم اق جول تىلەيمىن.
شەنەۋنىكتەردىڭ شەشىمىنە ەمەس، حالىقتىڭ شىن قالاۋىنا قاراپ قۋات الامىز!
قازىبەك يسا،
ارمان سقابىل ۇلى: جاڭا قۇرامدا ۇلتتىق مۇددە ءۇشىن قايرات كورسەتىپ جۇرگەن قايراتكەرلەر نەگە جوق؟
“اق جول” پارتياسىنا كەلگەندە، ۇستانىمىمدى ايقىنداپ العانمىن. ول پارتيانىڭ دا باعدارلاماسىندا بار ۇلتتىق مۇددە ماسەلەسى. مەن مىنا پارلامەنت دەپۋتاتتىعىنا ۇسىنىلعان جاڭا ءتىزىمدى قاراپ وتىرىپ، پارتياداعى ەلگە تانىمال، ۇلت ءۇشىن، مەملەكەتتىك ءتىل ءۇشىن جانىن سالىپ قايرات كورسەتىپ جۇرگەن ازاماتتاردىڭ اتىن كورە الماي، داعدارىپ وتىرمىن. جاڭا سايلاۋ باستالعالى جاڭارۋ كۇتىپ، ەل ەلەڭدەي كۇتكەن ەسىم – قايراتكەر اقىن قازىبەك يسا نەگە جوق؟ الاش مۇراسىنا ادالدىق تانىتىپ جۇرگەن عالىم قايىربەك كەمەڭگەر دە تىزىمدە بولسا، جاراسار ەدى… كەلەسى سايلاۋدا وسى ماسەلە باستى نازاردا بولۋىن قالايمىن. سوندىقتان مىنا ورتالىق كەڭەس پلەنۋمىنداعى داۋىس بەرۋدە مەن قالىس قالامىن.
قالاي دەسەك تە، ءبىز “اق جولدىڭ” باعدارلاماسىنداعى الاش ارمانى، ۇلتتىق مۇددە جولىنداعى ماقساتتارىمىز ءۇشىن كۇرەسە ءبىلۋىمىز كەرەك. ءوز شەشىمىمىزگە ءوزىمىز بەرىك بولۋعا ءتيىسپىز. مىنا جاڭا قۇرامداعى دەپۋتاتتاردىڭ وسىنى مىقتاپ قولعا الۋى كەرەك دەپ بىلەمىن.
ارمان سقابىل ۇلى،
“اق جول” پارتياسى وك حاتشىسى،
(“اق جول” پارتياسى پلەنۋمىندا سويلەگەن ءسوزى)
