ساناتىنا سايكەسپەيتىن باسپانالاردى جارنامالاپ ساتۋعا تىيىم سالىنادى. بۇگىن سەناتىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە تۇتىنۋشىلاردىڭ قۇقىقتارىن قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تالقىلاۋ بارىسىندا ۇلتتىق ەكونوميكا ءمينيسترى ەربولات دوسايەۆ وسىلاي ءمالىم ەتتى، - دەپ حابارلايدى «قامشى» پورتالى قازاقپاراتقا سىلتەمە جاساپ.
زاڭ جوباسىنا سايكەس، تۇرعىن ۇيلەردى ساتۋ ءۇشىن جوبالىق قۇجاتتاماسىنا جانە تۇرعىن ءۇيدىڭ كلاسسيفيكاسياسىنا سايكەسپەيتىن جىلجىمايتىن مۇلىكتى جارنامالاۋعا تىيىم سالىنادى. وسىعان وراي دەپۋتاتتار تۇسىنىكتەمە بەرۋدە جانە ول ءۇشىن جاۋاپكەرشىلىكتى سۇراعان بولاتىن.
«جارنامادا تۇرعىن ۇيلەردى ساتۋدا «ەكونوم كلاسس، پرەميۋم، ليۋكس» دەگەن سەكىلدى ۇعىمدار كوپ. قازىرگى كۇنى قۇرىلىس سالۋ نورمالارى مەن ەرەجەلەرىنە سايكەس، بىزدە تۇرعىن ۇيلەر تەك ءتورت توپقا جىكتەلەدى. سونىمەن قاتار، ءۇي ساتىپ العان تۇتىنۋشىلار مۇلىكتى يەلەنگەن سوڭ باسپانانىڭ ساناتى سايكەسپەيتىنىن ايتىپ ءجيى شاعىمدانادى. وسىعان بايلانىستى ەلباسىنىڭ تاپسىرماسىنا سايكەس، جارنامالار ارقىلى تۇتىنۋشىلاردى اداستىرىپ، جاڭىلىستىرۋعا جول بەرىلمەيتىن بولادى»، - دەدى ە. دوسايەۆ.
ونىڭ ايتۋىنشا، قۇرىلىس سالۋ نورمالارى مەن ەرەجەلەرىنە وسىعان بايلانىستى وزگەرىستەر ەنگىزىلمەك. قۇرىلىس نورمالارىندا تۇرعىن ءۇيدىڭ ساناتى دا جازىلاتىن بولادى. «زاڭ كۇشىنە ەنگەننەن سوڭ ونداي نورمالاردى بۇزعان قۇرىلىس كومپانيالارىنا قاتىستى سوتقا شاعىمدانۋعا بولادى. ەگەر ساناتىنا سايكەسپەيتىن بولسا، وندا قۇرىلىس كومپانياسىنىڭ جارناماسىن توقتاتۋعا قاتىستى شارالار دا قولدانىلادى»، - دەدى مينيستر.
پىكىر قالدىرۋ