ۆاليۋتا نارىعىنا قاتىستى ەكىۇشتى پىكىرلەر ءالى تىيىلماي وتىر. ەلدىڭ ءبىر توبى اقپان، ناۋرىز ايلارىنداعى ۇلتتىق ۆاليۋتانىڭ از-ماز بولسا دا نىعايۋىن ءماجىلىس سايلاۋىمەن بايلانىستىرىپ، ساياسي ناۋقان اياقتالىپ، ەلدەگى ساياسي ءومىر قالىپتى ارناعا تۇسكەن سوڭ، شەتەل ۆاليۋتاسى ءالى دە قىمباتتايتىنىن ايتسا، باسقالارى الەمدىك نارىقتاعى مۇناي باعاسىنىڭ ءوسۋى تەڭگەنىڭ دوللارعا شاققانداعى باعامىنىڭ نىعايۋىنا وڭ ىقپال ەتتى دەپ سانايدى.

ال، «اسىل-ينۆەست» كومپانياسى تالداۋ دەپارتامەنتىنىڭ ديرەكتورى ايۆار بايكەنوۆ بولسا، ۇلتتىق ۆاليۋتانىڭ دوللارعا شاققانداعى باعامىنىڭ وسۋىنە ۇلتتىق بانك ءوزى كەدەرگى بولىپ وتىر دەپ سانايدى. ول بۇل ويىن «كاپيتال» ىسكەر اقپارات ورتالىعىنا بەرگەن سۇحباتىندا ايتقان.

«ءبىزدىڭ ويىمىزشا، ۇلتتىق بانك ءقازىر تەڭگەنىڭ نىعايۋىن ۇستاپ وتىر. ەسەپتەرگە سۇيەنسەك، سوڭعى بىرنەشە اپتا بويى دوللار باعامى 330-335 تەڭگە اۋماعىندا تۇرۋى كەرەك بولاتىن. ياعني، Brent ماركالى مۇناي باعاسىنىڭ باررەلى 40 دوللار دەڭگەيىندە تۇرعانى ەسكەرىلۋى ءتيىس. ءرۋبلدىڭ دە دوللارعا شاققانداعى باعامى 68 رۋبل بولىپ وتىر. ەگەر، سوڭعى ءۇش ايداعى دوللار مەن رۋبل باعامىنا قاراساق، تەڭگەنىڭ دوللارعا قاتىستى باعامى ۇلتتىق بانك ارالاسپاسا ەندىگىسى 323 تەڭگە بولعان بولار ەدى»، - دەيدى ول.

ايۆار بايكەنوۆ تەڭگەنى ۇلتتىق بانك «ۇكىمەتتىڭ قىسىمىمەن» تەجەپ وتىر دەپ سانايدى.

«ۇلتتىق بانك ارەكەتتەرى تۇسىنىكسىز بولىپ وتىر. بىلاي قاراساق، بىلتىر قازاقستان ەركىن ۆاليۋتا نارىعىنا كوشتى. ال، ءىس جۇزىندە ەركى اينالىم تەك تەڭگەنىڭ قۇلدىراۋ باعىتىندا عانا ءجۇرىپ وتىر. ال، تەڭگە نىعايا باستاسا ۇلتتىق بانك ارالاسىپ، ونى تەجەيدى. بۇل مەنىڭشە، ۇكىمەت تاراپىنان جاسالعان قىسىم سالدارىنان بولىپ وتىرعان سياقتى. ويتكەنى، 2016 جىلعا ارنالعان بيۋدجەتتە دوللار باعامى 300 ەمەس، 360 تەڭگە بولادى دەپ جوسپارلانعان. ماكروەكونوميكالىق كورسەتكىشتەردىڭ وڭالۋىنا بايلانىستى ۇكىمەت بيۋدجەتتى قايتا قاراۋعا قۇلىقسىز. تەڭگەنىڭ نىعايۋى كەرىسىنشە، جاعىمسىز سەناريي رەتىندە قاراستىرىلۋدا»، - دەگەن پىكىردە ا. بايكەنوۆ.

سونىمەن قاتار، ول ۇلتتىق بانكتىڭ ءقازىر شەتەل ۆاليۋتاسىن ساتىپ العانىمەن، ساۋداعا شىعارماي وتىرعانىن ايتادى. ونىڭ ايتۋىنشا، اقپان ايىندا ءىرى كولەمدە شەتەل ۆاليۋتاسىن ساتىپ العان ۇلتتىق بانك ناۋرىزدا دا سول رايىنان قايتپايتىن سياقتى.

جومارت ابدوللا ۇلى