بۇگىن جەمقورلىققا قارسى ءىس-قيمىل جونىندەگى ۇلتتىق بيۋرو قىزمەتكەرلەرى اقپارات جانە مۇراعات كوميتەتىنىڭ بۇرىنعى باسشىسى بولات بەرسەبايەۆ پەن ونىڭ ورىنباسارى قىزمەتىن اتقارعان بەك ارپابايەۆتى تۇتقىندادى. بۇرىنعى لاۋازىمدى تۇلعالاردىڭ تۇتقىندالۋىن انتيكوررۋپسيالىق قىزمەت وكىلدەرى اتىشۋلى «ماتايەۆ ىسىمەن» بايلانىستىرىپ وتىر.

ءار جىلدارى ءتۇرلى مينيسترلىك پەن اگەنتتىك تۇرىندە قۇرىلىمدىق وزگەرىستەرگە ۇشىراعان اقپارات سالاسى جوعارىدا اتالعان ەكى شەنەۋنىك باسقارعان كەزدە (2010-2012 جىلدارى) اقپارات جانە بايلانىس مينيسترلىگىنىڭ قۇرامىندا بولعان.

بۇعان دەيىن جەمقورلىققا قارسى ءىس-قيمىل جونىندەگى ۇلتتىق بيۋرونىڭ الماتىداعى قىزمەتكەرلەرى اقپارات سالاسىنا بولىنگەن مەملەكەت قاراجاتىن جىمقىرۋ بويىنشا قىلمىستىق ءىس قوزعاپ، كۇدىكتىلەر رەتىندە «قازاقستان باسپا ءسوز كلۋبى» قب مەن «قازتاگ» ج ش س قۇرىلتايشىسى سەيىتقازى ماتايەۆ پەن ونىڭ ۇلى اسەت ماتايەۆقا ايىپ تاققان ەدى. ۇلتتىق بيۋرو ولاردى «قازتاگ» پەن «ۇلتتىق باسپا ءسوز كلۋبى» قب ارقىلى اقپارات، اقپاراتتاندىرۋ جانە بايلانىس كوميتەتى مەن «قازاقتەلەكوم» اق بولگەن ۇزىن-ىرعاعى 420 ميلليون تەڭگە قارجى جىمقىردى دەپ وتىر.

اتالعان ءىس بويىنشا باق-قا تۇسىنىك بەرگەن ۇلتتىق بيۋرو باسشىسىنىڭ ورىنباسارى تالعات تاتۋبايەۆ اقپاراتتىق ساياسات سالاسىندا قارجى جىمقىرۋعا بايلانىستى ءىستى بولاتىندار سانى اكەلى-بالالى ماتايەۆتارمەن شەكتەلمەيتىنىن ەسكەرتكەن ەدى. تاتۋبايەۆ تاۋىپ ايتىپتى، سايلاۋ ءوتىپ، ەل ىشىندەگى ساياسي احۋال قالىپقا تۇسە سالىسىمەن، اقپارات قۇرالدارىن قارجىلاندىرۋعا جاۋاپتى بولعان قوس بىردەي شەنەۋنىككە قۇرىق سالدى.

قولعا تۇسكەن قوس شەنەۋنىك 2010-2012 جىلدار ارالىعىندا اقپارات جانە بايلانىس مينيسترلىگى قۇرامىنداعى اقپارات جانە مۇراعات كوميتەتىن باسقارعان. ءبىرى – ءبىرىنشى باسشى، ەكىنشىسى ونىڭ ورىنباسارى بولعان. اقپارات قۇرالدارى ارقىلى مەملەكەتتىك ساياساتتى ناسيحاتتاۋ بويىنشا بولىنگەن قاراجاتتىڭ يگەرىلۋىنە جاۋاپتى، جاسالعان كەلىسىم-شارتتار مەن قارجى اۋدارىمدارىنا قول قويعان تۇلعالار.

جەمقورلىقپەن كۇرەسكەرلەر وسى قارقىنمەن كەتە بەرەر بولسا، اقپاراتتىن ساياساتقا قاتىستى باسقا دا كەلىسىم-شارتتاردان «كىنارات» تابۋى عاجاپ ەمەس. زاڭنامالار كەپىلدىك بەرگەن ءسوز بوستاندىعى مەن شىعارماشىلىق ەركىندىكتى كوپ كورگەن بيلىك وسىنداي تاسىلمەن ءبىراز «تەنتەكتى» تىقسىرىپ الۋدى ويلاسا كەرەك.

جومارت ابدوللا ۇلى