بۇگىن الماتى قالالىق ءىىد-نىڭ باسپا ءسوز قىزمەتى قالاداعى ەۆانگەليا سەنىمىندەگى حريستيانداردىڭ «جاڭا ءومىر» شىركەۋىنەن قارۋ-جاراق پەن ءوق-دارى تابىلعانى تۋرالى حابار تاراتتى. بۇل تۋرالى «قامشى» پورتالى حابارلايدى.

بۇعان دەيىن شىركەۋ پاستورلارىنا كەلۋشىلەردەن زاڭسىز اقشا جيناعان، قارجى جىمقىرعان دەگەن كۇدىك تۋعانى تۋرالى حابارلانعان ەدى. وسىعان وراي الماتى پوليسەيلەرى شىركەۋ باسشىلارىن قىلمىستىق كودەكستىڭ 190-بابى 3ء-بولىمى 1-تارماعى (ءىرى كولەمدەگى الاياقتىق) بويىنشا تەرگەۋگە العان بولاتىن.

اتالعان شىركەۋدىڭ قۇقىققورعاۋ ورگاندارى نازارىنا ىلىنگەنى ءبىر بۇگىن ەمەس كورىنەدى. وتكەن جىلدىڭ شىلدە ايىندا الماتى ىشكى ىستەر ورگاندارىنا ەۆانگەليا سەنىمىندەگى حريستيانداردىڭ «جاڭا ءومىر» شىركەۋىنىڭ بەس بىردەي كەلۋىشىسى شاعىم ءتۇسىرىپ، شىركەۋ پاستورلارىن قايىرىمدىلىق ارقىلى تۇسكەن ءىرى كولەمدەگى قاراجاتتى، جىلجيتىن، جىلجىمايتىن مۇلىكتەردى جىمقىردى، الاياقتىقپەن اينالىستى دەپ ايىپتاعان كورىنەدى.

تەرگەۋ شارالارى بارىسىندا قالا پوليسەيلەرى 25 ناۋرىز كۇنى سوت سانكسياسىمەن «ەۆانگەليا سەنىمىندەگى حريستياندارىنىڭ «جاڭا ءومىر» شىركەۋى» ءدىني بىرلەستىگىنىڭ كەڭسەسىندە جانە شىركەۋ باسشىلارىنىڭ ۇيلەرىندە ءتىنتۋ جۇرگىزگەن.

ءتىنتۋ ناتيجەسىندە قارجىلىق-ەكونوميكالىق قىزمەتكە بايلانىستى ءبىرشاما قۇجاتتار تابىلىپ، ارنايى ساراپتاماعا  جىبەرىلگەن.

سونداي-اق، الماتى قالالىق ءىىد باسپا ءسوز قىزمەتى ءتىنتۋ كەزىندە تىركەلمەگەن قارۋ-جاراق پەن ءوق-دارى تابىلعانىن حابارلاپ وتىر. ءىىد باسپا ءسوز حاتشىسى سالتانات ازىربەك قۇقىققورعاۋ ورگاندارىنىڭ ازاماتتاردىڭ شاعىمى بويىنشا جۇرگىزگەن تەرگەۋ شارالارىن شىركەۋدىڭ كەيبىر جاقتاۋشىلارى تەرىس سيپاتتا باعالاپ، الەۋمەتتىك جەلىلەر ارقىلى وسى ءىستى ءدىني سەبەپتەرمەن قۋعىنداۋ دەپ مالىمدەپ جاتقانىن ايتادى.

«قۇقىققورعاۋ ورگاندارىنىڭ ازاماتتاردىڭ شاعىمى نەگىزىندە ولاردىڭ زاڭدى قۇقىقتارى مەن مۇددەلەرىن قورعاۋ ءۇشىن جۇرگىزگەن شارالارى الەۋمەتتىك جەلىلەردە ءدىني سەبەپتەرمەن بايلانىستىرىلىپ تۇسىندىرىلۋدە. سونداي-اق، پوليسيا ءتىنتۋ كەزىندە ءدىني ادەبيەتتەر مەن  ۇيىم قورىنان اقشا تاركىلەندى دەگەن جالعان اقپارات تاراۋدا. پوليسيا مۇنداي اقپاراتتىڭ شىندىققا جاناسپايتىنىن حابارلايدى جانە جالعان اقپارات تاراتقانى ءۇشىن قىلمىستىق كودەكستىڭ 274-بابى بويىنشا قىلمىستىق جاۋاپكەرشىلىك قاراستىرىلعانىن ەسكەرتەدى»، - دەيدى ول.

بۇل وقيعا وسىعان دەيىنگى كەيبىر ساياسي توپتار مەن اقپارات قۇرالدارى ارقىلى قوعام ساناسىنا ءسىڭىرىلىپ كەلگەن «ءدىني بىرلەستىكتەر مەن ۇيىمدار قىزمەتىندە كىنارات شىقسا تەك مۇسىلمان قاۋىمداستىقتارىنان شىعادى، قارۋ اسىنسا تەك يسلام ءدىنىن ۇستانۋشىلار اسىنادى، لاڭكەس تەك مۇسىلماندار قاتارىنان شىعادى» دەگەن تۇسىنىكتىڭ جالعان ەكەنىن، لاڭكەستىك پەن الاياقتىقتىڭ ءدىنى بولمايتىنىن تاعى ءبىر دالەلدەگەندەي.

جومارت ابدوللا ۇلى