الماتىلىق جەزوكشەلەر ءوز قىزمەتتەرىن جارنامالاۋ ءۇشىن الەۋمەتتىك جەلىلەردى پايدالانۋدا، - دەپ حابارلايدى «قامشى» پورتالى.

ساين مەن سەيفۋللين كوشەلەرىن جىن ويناققا اينالدىرىپ بولعان الماتىلىق جەزوكشەلەر بىرەر جىل بۇرىن عالامتور كەڭىستىگىن دە «يگەرە» باستاعان ەدى. قىزمەتتەرىن جارنامالايتىن almatinki.com، almatinki.biz سىندى ارنايى سايتتار اشىپ، وندا تۇتىنۋشىلارىنا الماتىلىق تۇنگى كوبەلەكتەرمەن جان-جاقتى تانىسۋ مۇمكىندىگى ۇسىنىلدى. سايتقا كىرگەن ادام ءوز تالعامى مەن قالتاسىنا قاراي كەرەگىن تاڭداپ كەلگەن كورىنەدى. الايدا، اتالعان سايتتار بىرنەشە مارتە بۇعاتتالىپ، قىزمەتىنە شەكتەۋ قويىلعان سوڭ قىزمەتىن ءبىرجولاتا توقتاتىپتى.

ءبىراق، تۇنگى كوبەلەكتەر سايت جابىلدى دەپ قول قۋسىرىپ وتىرماپتى. بۇگىندە اركىم ەش كەدەرگىسىز پايدالانىپ جۇرگەن الەۋمەتتىك جەلىلەردەن اككاۋنتتار اشىپ، توپتار قۇرىپ، قىزمەتتەرىن ودان ءارى جارنامالاۋدا. ونداعى جازبالاردى كوز تارتارلىق سۋرەتتەرىمەن، ارباعىش ۆيدەولارمەن «كومكەرۋدى» دە ۇمىت قالدىرماۋدا.

الەۋمەتتىك جەلى قولدانۋشىلارى جەزوكشەلەردىڭ بۇل «القاپقا» اۋىز سالعانىنا دا ءبىراز بولعانىن ايتادى.

«بايقاۋىمشا، بۇلار جارنامانى «درۋگ ۆوكرۋگ»، «بادو» سايتتارى، تاعى باسقا تانىسۋعا ارنالعان جەلىلەر ارقىلى باستاعان. كەيىن بالا-شاعاعا دەيىن قولداناتىن ۆكونتاكتە سياقتى جەلىلەرگە دە اشىقتان-اشىق ەنە باستادى»، - دەيدى مۇرات ەسىمدى جەلى قولدانۋشىسى.

شىنىمەن دە، ءقازىر «ۆكونتاكتە» جەلىسىندە ءبىر عانا الماتى قالاسىنىڭ جەزوكشەلەرى جارناما ورنالاستىراتىن، اتاۋى «ينتيم-الماتى» دەپ باستالاتىن 50-دەن استام توپ بار ەكەن. مۇنىڭ سىرتىندا، ماسساج قىزمەتىمەن بۇركەنگەن توپتار قانشاما؟ مۇنداي توپتاردىڭ بىر-ەكەۋىن ەليتالىق جەلى سانالاتىن «فەيسبۋكتەن» دە تابۋعا بولادى.

ال، جوعارىدا اتالعان «درۋگ ۆوكرۋگ» جەلىسىندەگى ينتيمدىك قىزمەت ۇسىناتىن جارنامادان كوز سۇرىنەدى. ءتىپتى، قىزدى-قىزدىمەن جەزوكشەلەر جاپپاي سمس-حابارلاما تاراتۋ قىزمەتىنە جۇگىنگەن دە كەزدەر بولعانىن اقپارات قۇرالدارى بىرنەشە رەت جازعان بولاتىن.

وسىعان دەيىن قوعامدىق ۇيىمدار مەن ازاماتتىق بەلسەندىلەر ارنايى ورگاندارعا جىن ويناقتىڭ جارشىسى بولىپ وتىرعان بىرنەشە رەسەيلىك سايتتى جابۋ تۋرالى ۇسىنىس جاساعانىمەن، ول تالاپ ورىندالماي كەلەدى.

وسىلايشا كوشەدە تۇرىپ ءتانىن ساۋدالاۋدان ارلانباعان جەزوكشەلەر ەندى الەۋمەتتىك جەلى ارقىلى دا وزدەرىنىڭ «ەلەكتروندى ۇكىمەتىن» قالىپتاستىرۋدا.

ازامات توقسانباي