Kaspi bankء-تىڭ استانا قالاسىنداعى ءبىر بولىمشەسى بوتەن كىسىنىڭ قۇجاتىمەن ءۇشىنشى تۇلعاعا نەسيە راسىمدەگەن، - دەپ حابارلايدى «قامشى» پورتالى ينفورمبيۋروعا سىلتەمە جاساپ.

«2013 جىلى 21 قىركۇيەكتە ش. دەگەن بانك مەنەدجەرىن سەندىرىپ، بوتەن كىسىنىڭ جەكە باس كۋالىگىمەن 110 000 تەڭگە كولەمىندە نەسيە العان»، - دەلىنگەن استانا قالالىق سوتى تاراتقان حابارلامادا.

تەرگەۋ كەزىندە نەسيە راسىمدەگەن كەلىنشەك قۇربىسىنىڭ قۇجاتىن ۇرلاپ الىپ، سونىمەن نەسيە راسىمدەگەنى بەلگىلى بولدى.

الايدا، زاڭ بۇزۋشى قىلمىستىق جاۋاپكەرشىلىكتەن بوساتىلعان.

«ق ر قىلمىستىق كودەكسى 71-بابى 1ء-بولىمى 2-تارماعىنا سايكەس، تۇلعا اۋىر ەمەس قىلمىس جاساعاننان سوڭ ەكى جىل ۋاقىت ءوتىپ كەتكەن جاعدايدا قىلمىستىق جاۋاپكەرشىلىكتەن بوساتىلادى»، - دەلىنگەن سوت شەشىمىندە.

بۇعان دەيىن وسكەمەن قالاسىندا دا اتالعان بانك فيليالىنىڭ بوتەن كىسىنىڭ قۇجاتىمەن نەسيە العانى بەلگىلى بولعان ەدى.