قازاقستاننىڭ بۇرىنعى پرەمەر-مينيسترى، سوت ۇكىمىمەن 8 جىلعا باس بوستاندىعىنان ايىرىلعان سەرىك احمەتوۆ قاراعاندى وبلىسى قاراباس ەلدى مەكەنىندەگى ەل اراسىندا «كارلاگ قاقپاسى» اتالىپ كەتكەن اك 159/18 تۇزەۋ مەكەمەسىنە ەتاپپەن جىبەرىلدى، - دەپ حابارلايدى «قامشى» پورتالى ratel.kz – كە سىلتەمە جاساپ.

قاراعاندى وبلىستىق قىلمىستىق ىستەر جونىندەگى اپەللياسيالىق كوللەگياسىنىڭ سەرىك احمەتوۆتىڭ جازاسىن ون جىلدان سەگىز جىلعا قىسقارتۋ، جازاسىن جالپى رەجيمدەگى تۇزەۋ مەكەمەسىندە وتەۋ تۋرالى ۇكىمى كۇشىنە ەنگەن سوڭ، ونىڭ تەرگەۋ يزولياتورىندا بۇدان ارى جاتۋ مۇمكىندىگى جويىلعان ەدى. 

احمەتوۆتىڭ قاي تۇزەۋ مەكەمەسىنە جىبەرىلگەنىن ونىڭ ادۆوكاتى گەورگيي ماتۆيەنكوۆ حابارلاعان.

«ءبىزدىڭ قورعاۋىمىزدا بولعان احمەتوۆ سەيسەنبى كۇنى قاراباس كولونياسىنا اۋىستىرىلدى»، - دەگەن گ. ماتۆيەنكوۆ.

اتالعان ەلدى مەكەندەگى تۇزەۋ مەكەمەسىندەگى جاعدايعا بايلانىستى سوتتالعاندار مەن ولاردىڭ تۋىستارى تاراپىنان تۇسكەن شاعىمداردىڭ كوپتىگىنە قاراماستان احمەتوۆتىڭ ادۆوكاتتارى بۇل شەشىمگە قاناعاتتاناتىندىقتارىن ايتىپتى. ءتىپتى، ماتۆيەنكوۆ ۇكىم وقىلا سالىسىمەن احمەتوۆكە ءوزىن قاراباس كولونياسىنا جىبەرۋ تۋرالى ءوتىنىش جازۋعا كەڭەس بەرگەنىن ايتقان.

ءىىم-نىڭ قاراعاندى وبلىسى بويىنشا قىلمىستىق اتقارۋ جۇيەسى دەپارتامەنتى سەرىك احمەتوۆتىڭ قاي تۇزەۋ مەكەمەسىنە جىبەرىلگەنى تۋرالى اقپارات بەرۋدەن باس تارتقان.

قاراعاندى وبلىسى قاراباس ەلدى مەكەنىندەگى اك 159/18 تۇزەۋ مەكەمەسى ەل اراسىندا «قارلاگ قاقپاسى» دەگەن اتقا يە. بۇل كولونيا وڭىردەگى ەڭ كونە تۇزەۋ مەكەمەسى سانالادى. ستاليندىك قۋعىن-سۇرگىن كەزىندە مۇندا كەڭەس وداعىنىڭ ءار ايماعىنان جەر اۋدارىلعاندار مەن قاماۋعا الىنعاندار جازاسىن وتەگەن. ءقازىردىڭ وزىندە مۇندا 1000 شاقتى ادامجازاسىن وتەۋدە.

«بۇل تۇزەۋ مەكەمەسىنە «قوناق» بولعان تانىمال تۇلعالار ءبىر عانا سەرىك احمەتوۆ ەمەس. بۇدان بۇرىن مۇندا «ۆاليۋتترانزيت بانكىنىڭ» قوجايىنى ايتباقى ءبىلالوۆ جازاسىن وتەسە، ءقازىر وسى جەردە سۋدياعا وق جاۋدىرىپ، ءىستى بولعان قاراعاندىلىق ادۆوكات ەۆگەنيي تانكوۆ قاماۋدا وتىر»، - دەپ جازادى ratel.kz.

اتالعان تۇزەۋ مەكەمەسىندەگى ۇستاۋ رەجيمى مەن مەكەمە اكىمشىلىگىنىڭ قىزمەتىنە قاتىستى پىكىرلەر ءار ءتۇرلى. ءبىر جىلدارى وسى كولونيادا جازاسىن وتەۋشىلەر مەن ولاردىڭ تۋىستارى مەكەمە اكىمشىلىگىن جازاسىن وتەۋشىلەردى سوققىعا جىعۋدا دەپ ايىپتاعان بولاتىن.

سونداي-اق، وسىدان ەكى جىل بۇرىن قاراباستاعى تۇزەۋ مەكەمەسى ەرەكشە مارتەبەگە يە سوتتالعاندار وتىراتىن «ۆيپ كولونيا» بولادى دەگەن دە حابار تاراعان ەدى.