«تۇرعىن ءۇي قۇرىلىس جيناق بانكىنىڭ» 200 مىڭعا سالىمشىسى وتەماقىسىز قالۋى مۇمكىن، - دەپ حابارلايدى «قامشى» پورتالى قازاقپاراتقا سىلتەمە جاساپ.

بۇگىنگى كۇنى «تۇرعىن ءۇي قۇرىلىس جيناق بانكى» بويىنشا وتەماقى تولەۋگە جاتاتىن 110 مىڭعا جۋىق سالىمشىمەن قوسىمشا كەلىسىمشارتقا قول قويدى. بۇل وتەماقى تولەۋگە جاتاتىن دەپوزيتتەردىڭ 20 پايىزىن عانا قۇرايدى. مۇنداي قارقىنمەن 200 مىڭعا تارتا سالىمشى بانكپەن اراداعى قوسىمشا كەلىسىمشارتتار جاساۋ مەرزىمىنە ۇلگەرمەۋى مۇمكىن، دەپ حابارلايدى بانكتىڭ باسپا ءسوز قىزمەتى.

ەسكە سالا كەتەيىك، بانكپەن سالىمشىلار اراسىندا وتەماقى بويىنشا قوسىمشا كەلىسىمشارتتار جاساسۋ 2016 جىلدىڭ 8 اقپانىنان باستالعان بولاتىن. وسى ۇدەرىسكە بەرىلگەن 114 كۇنتىزبەلىك كۇندى ەسەپكە العاندا كۇن سايىن ورتا ەسەپپەن 4096 قوسىمشا كەلىسىمشارتتار جاسالۋى كەرەك بولاتىن. الايدا، بۇگىنگى كۇنى قابىلدانىپ جاتقان وتىنىمدەردىڭ ورتاشا سانى ەكى جارىم مىڭنان اسپايدى.

«تۇرعىن ءۇي قۇرىلىس جيناق بانكىمەن» قوسىمشا كەلىسىمشارتتار جاساۋ مەرزىمى 2016 جىلدىڭ 1 ماۋسىمىندا اياقتالاتىنىن ەسكەرسەك، وندا جوسپارلانعان كەلىسىمشارتتاردىڭ تەك جارتىسىنا عانا قول قويىلۋى مۇمكىن»، - دەلىنگەن باسپا ءسوز بايانىندا.

اتاپ ايتقاندا، قاراعاندى وبلىسى بويىنشا وتەماقى تولەۋگە جاتاتىن 31 433 دەپوزيتتەردىڭ 5970-ىنە عانا قوسىمشا كەلىسىمشارتتار جاسالعان. اقتوبە وبلىسىندا - 32 490 سالىمشىنىڭ 7843ء-ى، اتىراۋ وبلىسىندا - 17 479 سالىمشىنىڭ 3070ء-ى، الماتى قالاسىندا - 56 295 سالىمشىنىڭ 13 188ء-ى، استانا قالاسىندا - 62 049 سالىمشىنىڭ 18 160-ى عانا قوسىمشا كەلىسىمشارتتار جاساسقان.

«ەگەر دەپوزيتتەر سوماسىنا شاعا قاراستىرساق، 1 ملن. تەڭگەگە جەتپەيتىن 352 860 جانە 1 ملن. تەڭگەدەن جوعارى 26 515 سالىم بويىنشا كەلىسىمشارتتار جاسالماي وتىر. وسىلايشا، بۇگىنگى تاڭدا وتەماقى ماقساتىندا بولىنگەن 21 ملرد تەڭگەدەن استام سوماعا سۇرانىم بولماۋى مۇمكىن. «تۇرعىن ءۇي قۇرىلىس جيناق بانكى» باستاپقى كەزدەن 467 مىڭ كەلىسىمشارت بويىنشا وتەماقى تولەنەتىنىن جاريالاعان بولاتىن. ونىڭ ىشىندە سالىم مولشەرى 1 ملن. تەڭگەدەن اساتىن سالىمشىلار دا قامتىلعان ەدى. وتەماقى تولەۋگە جاتاتىن سالىم سوماسى قازىرگى كۇنى 153،1 ملرد تەڭگەنى قۇراپ وتىر. وسىعان بايلانىستى سالىمشىلار بەلگىلەنگەن مەرزىم ىشىندە بانكپەن قوسىمشا كەلىسىمشارتتار جاساپ ۇلگەرۋى كەرەك. بۇل رەتتە پروسەدۋرانى ونلاين-رەجيمدە ەلەكتروندىق-سيفرلىق قولتاڭبانى پايدالانا وتىرىپ جۇزەگە اسىرۋعا بولادى (www.egov.kz نەمەسە بانكتىڭ رەسمي سايتى www.hcsbk.kz)»، دەلىنگەن باسپا ءسوز بايانىندا.