پاۆلودار تۇرعىنى، قوعام بەلسەندىسى رۋزا بەيسەنبايتەگى بيلىكتىڭ جوعارى مىنبەرلەرىنەن ايتىلا باستاعان ورتا مەكتەپتەردە ءۇش تىلدە وقىتۋ جۇيەسىنە كوشۋ تۋرالى باستاماعا الاڭداۋشىلىق ءبىلدىرىپ، ەل ازاماتتارىن اتالعان باستاماعا قارسىلىق تانىتۋعا شاقىردى، - دەپ حابارلايدى «قامشى» پورتالى.

رۋزا بەيسەنبايتەگىنىڭ ايتۋىنشا، بۇل باستاما قازاق ءتىلىنىڭ تاعدىرىنا ۇلكەن ءقاۋىپ ءتوندىرىپ، انا ءتىلىمىزدىڭ ءبىلىم، عىلىم، جوعارى تەحنولوگيا تىلىنە اينالۋىنا كەدەرگى جاسايدى. قازاق ءتىلىن مەڭگەرگەن ازاماتتاردىڭ قاتارىنىڭ سيرەۋىنە الىپ كەلەدى.

بەلسەندى جوعارى دەڭگەيدە كوتەرىلىپ جاتقان وسى باستاماعا قاتىستى اشىق حات ۇيىمداستىرىپ، ونى ەلباسىعا، ءبىلىم جانە عىلىم ءمينيسترى مەن پارلامەنت دەپۋتاتتارىنا جولداماق.

تومەندە رۋزا بەيسەنبايتەگى ۇيىمداستىرىپ جاتقان اشىق حات ءماتىنىن جاريالاپ وتىرمىز.

ق ر پرەزيدەنتى ن. نازاربايەۆقا

ق ر ءبىلىم جانە عىلىم ءمينيسترى ە. ساعادييەۆكە

سەنات جانە ءماجىلىس دەپۋتاتتارىنا

ب ا ق وكىلدەرىنە

اشىق حات

ءبىلىم جۇيەسى، قازاق ەلىنىڭ مەكتەپ جاسىنداعى ۇرپاعىنا كەزەكتى ەكسپەريمەنت جۇرگىزبەكشى. سوراقىسى وسى جولعىسى -  ءتىلىمىزدىڭ مۇلدە وشۋىنە (بۇل ۇلت ءوشۋىنىڭ العىشارتى ەكەنى ءسوزسىز) قويىلعان توتە جول. 

سەبەبى، مەكتەپتەردە ەندى 2 ءپان عانا قازاقشا – قازاقستان تاريحى جانە قازاق ءتىلى، قالعان بارشا جاراتىلىستانۋ پاندەرى اعىلشىن تىلىندە وتپەك، ورىس ءتىلى جانە دۇنيە ءجۇزى تاريحى ورىسشا وتپەك. بۇل - ۇلتقا دەگەن قارۋسىز، اشتىقسىز، ت.ب. فيزيكالىق تۇرمەن ەمەس، ءبىراق ناقتىلى رۋحاني گەنوسيد دەپ باعالاۋعا ابدەن بولاتىن جاھاندىق شارا. ويتكەنى بارشا ماماندار، وتە جۋىق بولاشاقتا (قازاق ءتىلى مەن قازاقستان تاريحى ماماندارىنان باسقالارى) اعىلشىن ءتىلدى بولماق. بارلىق عىلىمنىڭ العىشارتى جاراتىلىستانۋ پاندەرى ەكەنى بەلگىلى. بۇل قازاق ءتىلى عىلىمنان ىعىسادى، العاشقىدا قولدانۋ اياسى مۇلدە تارىلىپ، سوڭىنان تاريح قويناۋىنا كەتەدى دەگەن ءسوز. ويتكەنى قوعامداعى قاتىناس - سول قوعامدى قۇراپ وتىرعان مامانداردىڭ تىلىندە وتەتىنى انىق.
وسى ورايدا، بۇنىڭ ق ر كونستيتۋسياسىنا مۇلدەم قايشى ەكەنىن جانە ەلباسىمىزدىڭ 2 جولداۋىن:

- 2012-جىلعى: «قازاق ءتىلى 2025 جىلعا قاراي ءومىردىڭ بارلىق سالاسىندا ۇستەمدىك ەتىپ، كەز كەلگەن ورتادا كۇندەلىكتى قاتىناس تىلىنە اينالادى. وسىلايشا، تاۋەلسىزدىگىمىز بۇكىل ۇلتتى ۇيىستىراتىن ەڭ باستى قۇندىلىعىمىز – تۋعان ءتىلىمىزدىڭ مەرەيىن ۇستەم ەتە تۇسەدى. تىلگە دەگەن كوزقاراس شىنداپ كەلگەندە ەلگە دەگەن كوزقاراس ەكەنى داۋسىز. سوندىقتان وعان بەي-جاي قاراي المايمىز»؛

- 2014-جىلعى: «قازاق ءتىلى عىلىم مەن ءبىلىمنىڭ، ينتەرنەتتىڭ تىلىنە اينالدى. ەندى ەشكىم وزگەرتە المايتىن ءبىر اقيقات بار. انا ءتىلىمىز ماڭگىلىك ەلىمىزبەن بىرگە ماڭگىلىك ءتىل بولادى»)، - ەسكە سالا وتىرىپ، ق ر بارلىق مەكتەپتەردەگى باستاۋىش سىنىپتاردىڭ مەملەكەتتىك تىلدە وقىتىلۋىن، ورتا مەكتەپتىڭ 70 پايىزىنان كەم ەمەس بولىگىندە وقۋ ءتىلى مەملەكەتتىك، قالعانى سۇرانىس تىلىندە بولۋىن تالاپ ەتەمىز!

شەتەل تىلدەرى: اعىلشىن، نەمىس، ت.ب. تىلدەر ءپان رەتىندە، قاجەتتىلىك بويىنشا، گۋمانيتارلىق جانە جاراتىلىستانۋ باعىتتارى بويىنشا وقىتىلسىن. 
قازاق تىلىنەن ادەيى ۇركىتۋ پيعىلمەن جاسالىپ وتىرعان قاستاندىق - حالىقارالىق تەرميندەردى قازاق تىلىنە اۋدارۋ دوعارىلسىن. ويتكەنى، ءار دامىعان تولىققاندى ءومىر سۇرە الاتىن تىلدەر – ءجۇمىس ءتىلى، ياعني زاماناۋي تەحنيكا مەن تەحنولوگيالار ءتىلى. 

تەك وسى جولمەن جۇرسەك قانا تاريحتا ءوز ۇلتىن ءتىلى ارقىلى جويعان مەملەكەت رەتىندە قالمايتىنىمىزعا، كەرىسىنشە ۇلتىمىزدىڭ الدىنداعى پارىزىمىزدى ءار ازامات سەزىنىپ، دامىعان مەملەكەتتەردىڭ ورتاسىنان ورنىمىزدى ويىپ ورنىعاتىنىمىزعا سەنىمدىمىز!

اشىق حاتتى ۇيىمداستىرۋشى – باياناۋىلدىق قوعام بەلسەندىسى رۋزا بەيسەنبايتەگى.