قارجىلىق داعدارىس پەن ەل ىشىندەگى قىمباتشىلىق حالىقتىڭ الەۋمەتتىك احۋالىنا كەرى اسەرىن تيگىزبەي قويمايدى. بىرەۋلەر قىسقارتۋعا ۇشىراپ، تابىس كوزىنەن ايرىلسا، ەندى بىرەۋلەر ەڭبەكاقىسىن ەشتەڭەگە جەتكىزە الماي قوسىمشا جۇمىس ىستەۋگە ءماجبۇر. سونىمەن قاتار، زەينەتكەرلىكتە وتىرعاندارعا دا بۇل داعدارىس وڭايعا سوقپاي تۇرعان سياقتى. ستاتيستيكالىق مالىمەتتەر زەينەت جاسىنداعى ازاماتتاردىڭ ىشىندە دە جۇمىس ىزدەۋشىلەر مەن جۇمىس ىستەپ جۇرگەندەر سانىنىڭ ارتقانىن كورسەتىپ وتىر.

ranking.kz سايتى 2015 جىلى جاسى الپىسقا بەت العان جۇمىسشىلار سانىنىڭ ەكى ەسە ارتىپ، 21،2 مىڭ ادامدى قۇراعانىن جاريالاپ وتىر.

بۇرىن بۇل كورسەتكىش كەرىسىنشە تومەن دەڭگەيدە بولعان. ءتىپتى، ءبىرشاما ازايعان دا. ماسەلەن، 2013 جىلى – 19، 2014 جىلى 31 پايىزعا كەمىگەن. ال، سوڭعى جىلدارى زەينەت جاسىنا جاقىنداعانداردىڭ جۇمىسقا شىعۋىنا نە سەبەپ؟ ارينە، قارجى داعدارىسى.

ەلىمىزدىڭ دەنساۋلىق ساقتاۋ جانە الەۋمەتتىك دامۋ مينيسترلىگى بۇعان دەيىن ەلىمىزدە 2 ميلليون شاماسىندا زەينەتكەر بارىن جاريالاعان ەدى. سول ەكى ميلليوننىڭ جاسامىستاۋلارى ۇيدە وتىرماي ەڭبەككە ارالاسىپ جاتقان كورىنەدى.

الايدا،ەكونوميست ولجاس قۇدايبەرگەنوۆ جۇمىس ىستەيتىن زەينەتكەرلەردىڭ سانىنىڭ ارتۋىنا دەموگرافيالىق فاكتوردان باسقا، سالىق ورگاندارىنىڭ جۇمىسى دا ىقپال ەتۋى مۇمكىن ەكەنىن ايتادى.

«50-جىلدارى تۋۋ كورسەتكىشتەرى جوعارى بولدى. ستاتيستيكاعا جۇگىنسەك، 60-64 جاستاعى ازاماتتاردىڭ سانى جىل سايىن ارتىپ وتىرعانىن كورەمىز. ولاردىڭ سانى 2010 جىلى 479 مىڭ بولسا، بىلتىر 620 مىڭعا جەتكەن. ياعني، زەينەتكەرلەر سانى ارتسا، ولاردىڭ ىشىندە جۇمىس ىستەيتىن بولىگىنىڭ دە قاتارى جيىلەيدى»، - دەگەن ەكونوميست مۇندا ەكونوميكالىق فاكتور ماڭىزدى ءرول وينامايتىنىن ايتادى.

قالاي دەگەندە دە، بەينەتىنىڭ زەينەتىن كورىپ، ۇيدە، بالا-شاعانىڭ جانىندا جاتقانعا نە جەتسىن؟ قارتايعاندا جاستارمەن جاعالاسۋعا قاريالاردىڭ دا قۇمارتا قويۋى ەكىتالاي. ال، كۇننەن-كۇنگە قىمباتتاپ جاتقان ازىق-تۇلىك پەن كوممۋنالدىق تولەم اقىلاردان باستاپ، زەينەتكەرلەردى بەينەتكە سالۋعا سەبەپ بولاتىن جايتتاردى سانامالاي بەرۋگە بولادى. «ۇل مەن كەلىننىڭ تاپقانى بالاباقشا مەن پاتەراقىدان ارتىلماي جاتقاندا، جوق دەگەندە تاماققا سەپ بولايىن» دەگەن وي دا قاريالارىمىزدىكى.

ال، «زەينەتاقىمەن قامتۋ تۋرالى» جاڭا زاڭ ايەلدەردىڭ زەينەت جاسىن 2018 جىلدان باستاپ ءار جىل سايىن التى ايعا ۇلعايتۋدى، سول ارقىلى ەرلەر مەن ايەلدەردىڭ زەينەتكە شىعۋ جاسىن تەڭەستىرۋدى كوزدەپ وتىر. وسىلايشا 1964 جىلى تۋعان اپالارىمىز زەينەتكەرلىككە 63 جاسقا تولعاندا بارىپ شىعاتىن بولادى.