قازاقستاندا 5 ميلليوننان استام ادامنىڭ ءتۇرلى بانكتەردە نەسيەلەرى بار. ماجىلىسكە «كوللەكتورلىق قىزمەت تۋرالى» زاڭ جوباسىن الىپ كەلگەن ۇلتتىق بانك ءتوراعاسىنىڭ ورىنباسارى الپىسباي احمەتوۆ وسىلاي دەپ وتىر.
ۇلتتىق بانك ەكىنشى دەڭگەيلى بانكتەردەن الىنعان نەسيەلەردى قايتارۋ تەتىكتەرىن قاراستىراتىن جاڭا زاڭ جوباسىندا كوللەكتورلىق قىزمەتتىڭ زاڭداستىرۋدى كوزدەپ وتىر. باس بانك باسشىلىعى مىنا داعدارىس جاعدايىندا بانككە ۋاقىتى قايتارىلماعان نەسيەلەردى «بومباعا» بالاعان.
«ەرتەڭ بۇل الەۋمەتتىك شيەلەنىسكە سەبەپ بولۋى مۇمكىن. ون-جيىرما ادامنىڭ ەلەكتر قۋاتى نە قوقىس تاسۋشىلار اقىسىن تولەمەي قويۋى – باسقا ماسەلە. مۇنداي اۋقىمدى ايتساڭىزشى! ميلليوننان استام ادامنىڭ بانكتەرگە تريلليون تەڭگەدەن ارتىق قارىزدار بولۋى ەلدەگى الەۋمەتتىك احۋال جايلى الاڭداۋ تۋدىرادى، - دەگەن ول دەپۋتاتتارعا.
جاڭا زاڭدا بورىشكەرلەردىڭ نەسيەسىن قايتارۋمەن اينالىساتىن كوللەكتورلىق قىزمەتتىڭ دامۋىنا قولايلى قۇقىقتىق جاعداي جاساۋ، قارىزدى ءوندىرىپ الۋدا قاۋىپسىزدىك پەن تيىمدىلىكتى ارتتىرۋ، بورىشكەرلەردىڭ قۇقىعى مەن مۇددەسىن كوللەكتورلىق اگەنتتىكتەر تارابىنان بولۋى مۇمكىن زاڭعا قايشى ارەكەتتەن قورعاۋ، كوللەكتورلىقتىڭ جاريالىلىعىن قامتاماسىز ەتۋ ماسەلەلەرى قامتىلىپ وتىر.
وسى زاڭ ارقىلى ۇلتتىق بانك كوللەكتورلىق اگەنتتىكتەردى ءوز رەەسترىنە قوسۋدى، ولاردىڭ تىركەۋسىز ارەكەت ەتۋىنە جانە بانك قۇپياسى ەسەبىندەگى دەرەكتەردى ۇرلاۋ، ساتىپ الۋ نە بوپسالاۋ ارقىلى يەلەنۋىنە بايلانىستى جاۋاپكەرشىلىك تاعايىنداۋدى ۇسىنادى. مۇنداي ىسكە بارعان كوللەكتورلارعا قوماقتى ايىپپۇل سالۋدى نە ءۇش جىلعا دەيىن باس بوستاندىعىنان ايىرۋدى زاڭداستىرۋدى كوزدەپ وتىر.
الايدا، دەپۋتاتتاردىڭ وزدەرى بۇل باستاماعا قاتىستى ءتۇرلى ۇستانىم ءبىلدىردى. گۇلجان قاراعۇسوۆا جاڭا زاڭ جوباسىن «مافيانى باسقارۋعا تالپىنىس» دەسە، «قارجىلىق رەكەتتى زاڭداستىراتىن» حالىققا قارسى زاڭ دەپ وتىر. ال، كومۋنيست دەپۋتات تۇرعىن سىزدىقوۆ بورىشكەرلەرمەن جۇمىستىڭ جۇيەلەنگەنى، بەلگىلى ءبىر زاڭ نورمالارىمەن رەتتەلگەنى دۇرىس دەپ سانايدى.
