جاڭادان سايلاناتىن ءماجىلىس دەپۋتاتتارى پارلامەنتكە تيەسىلى «نۇرسايا» تۇرعىن ءۇي كەشەنىندەگى پاتەرلەر دايىن بولعانشا استاناداعى «پەكين پالاس» قوناق ۇيىنە ورنالاستىرىلاتىنى تۋرالى سايلاۋعا دەيىن دە جازعان بولاتىنبىز. سايلاۋ ءوتىپ، پارلامەنت ءماجىلىسى جۇمىسىن باستاعان سوڭ جاڭا قۇرامداعى ءبىرقاتار دەپۋتاتتاردىڭ اتالعان قوناق ۇيگە ورنالاسقانى جاريا بولدى.

بۇل قوعامدا قىزۋ تالقىعا ءتۇسىپ، جۇرتشىلىق تاۋلىگىنە 120 مىڭ سۇرايتىن قوناق ۇيگە ورنالاسقان «حالىق قالاۋلىلارىنىڭ» ىسىراپشىلدىعىن سىناۋعا كىرىستى.

وسى رەتتە دەپۋتاتتار دا قاراپ قالماي، قورعانىسقا كوشتى. كوممۋنيست-دەپۋتات ا. قوڭىروۆتىڭ ايتۋىنشا، قوناق ۇيگە ماجىلىسمەندەردىڭ بارلىعى ەمەس، تەك 31 دەپۋتات قانا ورنالاسقان كورىنەدى.

«سىرتتان كەلگەن دەپۋتاتتارعا بەرىلىپ وتىر. ولار قىسقا مەرزىمگە قوناق ۇيگە ورنالاستىرىلدى. ءبىزدىڭ فراكسيادان دەپۋتات سميرنوۆا سوندا»، - دەيدى دەپۋتات.

ال، پارلامەنتتىڭ شارۋاشىلىق باسقارماسىنداعىلار اقپارات قۇرالدارىندا ايتىلىپ جاتقانداي، قوناق ۇيدە ءبىر تاۋلىككە تۇرۋ قۇنى 120 مىڭ تەڭگە ەمەس، 29 مىڭ تەڭگە كورىنەدى. قوناق ءۇي اكىمشىلىگى مەملەكەتتىك ساتىپ الۋلار كونكۋرسىنا قاتىسىپ، وسىنداي باعا ۇسىنىپتى.

وسى رەتتە ارىپتەستەرىنىڭ ابىرويىن قورعاعان گۇلجان قاراعۇسوۆانىڭ سوزىنە ەرەكشە توقتالىپ وتكەن ءجون.

ءبىراز جىل حالىقتى الەۋمەتتىك قورعاۋ سالاسىن باسقارعان حانىم قوناق ءۇي تاقىرىبىن قوزعاعان جۋرناليستەرگە:

«سىزدەر ءتيىستى دەڭگەيدەگى، قۇپيالارعا يە، قول سۇعىلماۋشى تۇلعا بولىپ تابىلاتىن دەپۋتاتتاردىڭ ساعاتتاپ جالعا بەرىلەتىن پاتەرلەردە تۇرعانىن قالايسىزدار ما؟»، - دەپ دۇرسە قويا بەرىپتى. ونىڭ ايتۋىنشا، بۇدا تۇرعان ەشتەڭە جوق. بيۋدجەتتە وسى ماقساتتا قارجى قاراستىرىلعان. الەمدىك تاجىريبەدە دەپۋتاتتىق دەڭگەيدەگى ادامدار قانداي جاعدايدا ءومىر ءسۇرۋ كەرەكتىگى الدەقاشان باسى اشىلعان ماسەلە ەكەن.

دەپۋتات حانىمنىڭ «ساعاتتاپ جالعا بەرىلەتىن» پاتەرلەر تۋرالى قايدان بىلەتىنى ءوز الدىنا بولەك اڭگىمە، ال، «مەملەكەتتىك قۇپيالاردى بىلەتىن تۇلعالار» كورىنگەن جەردە جاتپاۋى كەرەك دەگەنى ءبىراز ويعا قالدىرادى.

ولاي دەيتىنىمىز، ءبىرقاتار اقپارات قۇرالدارى بۇل قوناق ءۇيدىڭ قىتايلىق «حۋا يوۋ» كومپانياسىنىڭ مەنشىگىندە ەكەنىن، ول كومپانيانىڭ الەمدىك مۇناي ءوندىرۋشى 50 كومپانيا ىشىندە 7-ورىن يەلەنەتىن جۇڭگو ۇلتتىق مۇناي كورپوراسياسىنا (CNPC) قاتىسى بارىن اشىق جازۋدا. سوندا، گۇلجان قاراعۇسوۆا ايتپاقشى، مەملەكەتتىك قۇپيالارمەن جۇمىس ىستەيتىن دەپۋتاتتار شەتەلدىك قوناق ۇيدە نە ىستەپ ءجۇر؟

پارلامەنتتىڭ شارۋاشىلىق باسقارماسىنداعىلار بۇگىننەن باستاپ الدىڭعى شاقىرىلىمداعى دەپۋتاتتار تۇرعان پاتەرلەردىڭ بوساعانىن، جاڭا ماجىلىسشىلەر سول پاتەرلەرگە ورنالاستىنىن حابارلادى.

جومارت ابدوللا ۇلى