«ەكسپو-2017» نىساندارىنىڭ جوسپارىن گيتلەر ساۋلەتشىسىنىڭ ۇلى جاساعان، - دەپ حابارلايدى «قامشى» پورتالى informburo.kz – كە سىلتەمە جاساپ.

بۇل تۋرالى «استانا ەكسپو-2017» ۇلتتىق كومپانياسىنىڭ ەكس-باسشىسى تالعات ەرمەگيايەۆ جانە ءبىر توپ ازاماتقا قاتىستى ءوتىپ جاتقان سوت وتىرىسىندا «كورپوراسيا ك» اق-ى باسقارما مۇشەسى شوقان ماتايبەكوۆ مالىمدەگەن.

«مەن وسى جوبانى جاساۋعا تارتىلعا شەتەلدىكتەردىڭ ۇنەمدەۋ مەن قولايلىلىققا ءمان بەرمەگەنىنە نارازى بولدىم. بۇعان الەمنەن 25 ادام تارتىلدى. ولار تانىمال، ۇلى ساۋلەتشىلەر. ءارقايسىسىنا 100 مىڭ دوللاردان ءبولىندى. ال، جەرگىلىكتى ساۋلەتشىلەرگە جوبالاردىڭ ازىرلىگىنە باستاماشىلدىق تۇرعىدا عانا قاتىسۋعا مۇمكىندىك بەرىلدى»، - دەگەن ش. ماتايبەكوۆ ساۋلەتشىلەردىڭ ءبىرى گيتلەردىڭ جەكە ساۋلەتشىسىنىڭ ۇلى ەكەنىن ايتىپ سالىپتى.

«البەرت شپەەر - تانىمال تۇلعا. ول الەم استاناسى اتانعان بەرليننىڭ جوسپارىن جاساعان. ال، كىشى شپەەر مۇندا قالاي تاپ بولعانى تۇسىنىكسىز. وعان جوبانىڭ تەستىلىك نۇسقاسىنا تاپسىرىس بەرىلدى، ال، كونكۋرستىڭ باسقا ورىنداۋشىلارى سونىڭ جۇمىسىن اياعىنا دەيىن جەتكىزۋگە ءتيىس بولدى. بارلىق 25 ادام كىشى شپەەردىڭ يدەيالارىن اياعىنا دەيىن جەتكىزۋمەن اينالىستى. ال، ونىڭ "مۇنايدىڭ سوڭعى تامشىسى" يدەياسى – تولىقتاي ابسۋرد»، - دەيدى ش. ماتايبەكوۆ.