قىرعىزستان جوعارعى كەڭەسىنىڭ ءتوراعاسى اعاسىنىڭ پرەمەرلىككە ۇسىنىلۋىنا بايلانىستى ءوز لاۋازىمىنان باس تارتتى، - دەپ حابارلايدى «قامشى» پورتالى.
قىرعىز ەلىنىڭ جوعارعى كەڭەس ءتوراعاسى اسىلبەك جەەنبەكوۆ ءوز لاۋازىمىن توقتاتاتىنى تۋرالى مالىمدەمە جاسادى. پارلامەنت جەتەكشىسى بۇل شەشىمىن تۋعان اعاسى سوورىنباي جەەنبەكوۆتىڭ پرەمەر-مينيستر لاۋازىمىنا ۇسىنىلۋىمەن بايلانىستىرىپ وتىر.
«پرەزيدەنتتىڭ سەنىم بىلدىرۋىمەن جانە دەپۋتاتتاردىڭ قولداۋىمەن مەن ەكى مارتە پارلامەنت سپيكەرلىگىنە سايلاندىم. مەنىڭ تۋعان اعامنىڭ كانديداتۋراسى پرەمەر-مينيستر لاۋازىمىنا قاراستىرىلۋىنا بايلانىستى ءوز ەركىممەن جوعارعى كەڭەس ءتوراعالىعىنان باس تارتامىن»، - دەيدى ا. جەەنبەكوۆ.
پرەمەر-مينيسترلىككە ۇمىتكەر سوورىنباي جەەنبەكوۆ.
ەندى جوعارعى كەڭەس دەپۋتاتتارى جاڭا پرەمەردىڭ كانديداتۋراسىن بەكىتۋمەن قاتار، پارلامەنتتىڭ جاڭا ءتوراعاسىن دا انىقتايتىن بولدى.
