تەلەارنالاردىڭ جابىلىپ جاتقانىنا ءىشىڭىز اشىپ وتىر ما؟ مەنىڭشە بۇل ءۇردىس ءالى جالعاسادى. بۇعان باستى سەبەپ ينتەرنەت رەسۋرستاردىڭ ىقپالى. ءقازىردىڭ وزىندە الەۋمەتتىك جەلى مەن سايتتار اقپارات تاراتۋ جاعىنان تەلەارنالاردان وزىپ تۇر. ءبىراق تەلەارنالار ءالى دە ەڭ ىقپالدى قۇرال. ءبىراق، سول ىقپالى كۇن ساناپ ازايىپ كەلەدى. ەڭ ىقپالدى بولۋىنا سەبەپ – قازاقستاندىقتار ءالى دە تولىقتاي اقپاراتتى ينتەرنەتتەن الىپ وتىرعان جوق. باسىم بولىگى اقپاراتتى تەلەارنالاردان الادى. ىقپالىنىڭ ازايىپ كەلە جاتۋىنا سەبەپ جاڭالىقتاردى ءا/ج مەن سايتتار جىلدام تاراتقان سوڭ، ونى تەلەارنالارداعى جاڭالىقتان قايتالاپ كورۋ قاجەتتىلىگى جوق. مەن مىسالى كەشكىسىن ۇيگە كۇنى بويى ءا/ج مەن سايتتاردان وقىعان جاڭالىققا «تويىپ» بارامىن. كەشكىسىن تەك كوڭىل كوتەرەتىن بىردەمە كورگەندى قالايمىن. ءبىراق، ول دا جوق) سوندىقتان، تەلەارنالار ويىن-ساۋىقتىق باعدارلامالارعا بەت بۇرا باستادى. بۇل ءۇردىس ينتەرنەت قولدانۋشىلار كوبەيگەن سايىن جالعاسادى. ۇزاقتاۋ مەرىزىمدى بولاشاقتا تەك جاڭالىق تاراتاتىن مەملەكەتتىك ءبىر نەمەسە ەكى ارنا عانا قالۋى مۇمكىن. ال، قالعان ارنالار اراسىندا باسەكەلەستىك ارتادى، ودان رەيتينگى مىقتىلارى عانا قالادى. قالعاندارى گۋد-باي. ويىن-ساۋىقتىق باعدارلامانى كورسەتۋدە تەلەارنالارعا ينتەرنەت باسەكەلەس بولاتىندىعىن تاعى ەسكەرىڭىز. ينتەرنەت رەسۋرستاردىڭ ىقپالى كۇشەيگەن سايىن يدەولوگيا قۇرالى ءرولىن دە وزىنە الا باستادى. گازەتتەردىڭ مۇلدەم جابىلىپ نەمەسە سايتقا اينالا باستاۋى دا سونىڭ كورىنىسى. الايدا تاعى سول ينتەرنەتتى جاپپاي قولدانۋ دەڭگەيىنىڭ تومەندىگىنەن ب ا ق ءالى دە بولسا، يدەولوگيا قۇرالى. سوندىقتان، مەملەكەت ءالى دە ءداستۇرلى باق-قا، ونىڭ ىشىندە قازاق ءتىلدى باق-قا قارجىلاي قولداۋ ءبىلدىرىپ وتىر. وكىنىشكە قاراي مۇنىڭ كەرى اسەرى باق-ى باسەكەگە قابىلەتتى كونتەنت ۇسىنىپ وتىرعان جوق. تەك «تاپسىرىس بەرۋشىنىڭ» تاپسىرىسىن ورىنداپ قانا وتىر. ەگەر ءداستۇرلى باق-تىڭ يدەولوگيا قۇرالى رەتىندەگى ءرولى ازايا باستاسا، مەملەكەت قارجىلاي قولداۋدى توقتاتادى. وندا قازاق ءتىلدى باق-تىڭ 99 پايىزى جابىلىپ تىنادى. رەداكسيالار مەملەكەتتەن اقشا الۋدى ەمەس، قازىردەن-اق بيزنەس كوزىنە اينالدىرۋدى ويلاستىرا باستاۋى كەرەك. جۋرناليستەر مۋلتيمەديانى، ءتىلدى مەڭگەرۋگە كۇش سالعانى دۇرىس. گازەتتەر مەملەكەتتەن ەمەس، وقىرماننان «اقشا العىسى» كەلسە، ءونىمىن تۇرلەنتىپ بەرۋگە كۇش سالۋى كەرەك. ءونىمدى تۇرلەنتىپ بەرۋ ءۇشىن ءتىل بىلمەيمىن دەپ تاعى وتىرا المايسىڭ. ساراپشىنىڭ كوبى وزگە ءتىلدى. كورشىنىڭ ءتىلىن جەك كورسەڭ اعىلشىن ءتىلىن ۇيرەن دە، سولاردان پىكىر ال. ب ا ق قۇرعاق، زەرتتەلمەگەن اقپارات، ماقالا، سۇحبات قانا ەمەس، اۋديو، ۆيدەو، ينفوگرافيكا تۇرىندە اقپارات تاراتا الۋى كەرەك. قازاقستاندىق جۋرناليستيكانى، جۋرناليستەردى ءال تالاي وزگەرىس كۇتىپ تۇر. ءوز باسىم باق-دىڭ اشىلۋ، جابىلۋلارىنا تاڭقالمايمىن.