ۋكراينا رەسەي تاراپىنان جويقىن اقپاراتتىق شابۋىلعا ۇشىرادى. ۋكراينا دا ءبىز سەكىلدى 23 جىلدا اقپاراتتىق قاۋىپسىزدىگىن نىعايتپاعانى، ەتەك-جەڭىن جيناماعانى بەلگىلى بولدى. سونىڭ كەسىرىنەن رەسەي تاراپىنان جاسالعان شابۋىلدىڭ بەتىن قايتارا الماي وتىر. وزبەكستان الدەقاشان رەسەيدىڭ كوپتەگەن تەلەارنالارىن ەفيرلىك جيىلىكتەن الىپ تاستادى. كورگىسى كەلگەندەر سپۋتنيكتىك انتەننا ارقىلى عانا تاماشالاي الادى. ال بىزدە شە؟ رەسەي ءبىزدىڭ اقپاراتتىق كەڭىستىگىمىزدە ەمىن-ەركىن، تولىق قوجايىن سەزىنەدى. قاجەت كەزىندە توبەمىزگە "اڭگىرتاياق" ويناتىپ الۋعا ابدەن دايىن. ءتىپتى، شەنەۋنىكتەرىمىز ءتول باسىلىمدارىمىزدى مەنسىنبەي، رەسەيلىك باسىلىمداردى ارتىق كورەدى. سولارعا سۇحبات بەرىپ، سولاردىڭ ىعىنا جىعىلادى. ۋكرايناداعى جاعدايدى ءبىزدىڭ سالىق تولەۋشىلەردىڭ قالتاسىنان قارجىلاندىرىپ وتىرعان "مير"، "ورت-ەۋرازيا"، "قازاقستان" ۇلتتىق ارناسى تولىعىمەن رەسەيلىك كوزقاراسپەن بەرىپ وتىر. "ايف ۆ كازاحستانە"، "كومسومولسكايا پراۆدا ۆ كازاحستانە"، "موسكوۆسكيي كومسومولوەس ۆ كازاحستانە"، "يزۆەستيا ۆ كازاحستانە" سياقتى باسىلىمدار ءدال وسى ساتتە - اقپارات تاراتۋشى ەمەس، ارانداتۋشى قىزمەتتى تولىق اتقارىپ وتىر. وعان "رۋسسكيە ۆ كازاحستانە"، "زاكون كز"، "نۋر كز"، "ينتەرفاكس ۆ كازاحستانە" ج.ت.ب سايتتار مەن ەلەكتروندىق اقپارات اگەنتتىكتەرىن قوسىڭىز. قۇداي بەتىن اۋلاق ەتسىن، ەگەر، ەرتەڭ رەسەي قازاقستان شەكاراسىنا كوز الارتاتىن بولسا، بۇل باسىلىمدار كىمدى قولدايدى؟ ادىلدىك تۋرالى اۋىز اشا الا ما؟ الدە، ۇلتارالىق قاقتىعىستى ءورشىتىپ، وزگە ەلدىڭ سويىلىن سوعا ما؟

     پرەزيدەنت اكىمشىلىگى مەن اقپارات اگەنتتىگى جەدەل تۇردە - باسشىلارى مەن قوسشىلارى، كەڭەسشىلەرى كىل رەسەيدەن كەلگەن "قازاقستان" ۇلتتىق ارناسى، "ورت-ەۋرازيا" ءبىرىنشى ارناسى، "زاكون كز" پورتالى جۇمىسىنا تولىق مونيتورينگ جاساپ، كادر ساياساتىن تاعى ءبىر پىسىقتاپ شىعۋى ءتيىس. ويتكەنى، بۇگىنگى كۇننىڭ تارتىبىنە اقپاراتتىق جانە مەملەكەتتىك قاۋىپسىزدىكتى وتكىر بولىپ وتىر.  ال، ءبىزدىڭ اقپاراتتىق بەلبەۋىمىز بوس تارتىلعان.

توقتار جاقاش

"قامشى"  سىلتەيدى