جەكسەنبى كۇنى كەشتە ەلورداداعى «قازاقستان» كونسەرت زالىندا ءتورتىنشى رەت «قازاق ارۋى-2014» رەسپۋبليكالىق سۇلۋلىق   بايقاۋى ءوتتى.

ەلدىڭ ەڭ ادەمى ارۋى اتاعى ءۇشىن 21 ۇمىتكەر سىنعا ءتۇستى. قاتىسۋشىلاردىڭ بارلىعى دا ادەمى جانە تالانتتى بولۋىمەن قاتار حالقىمىزدىڭ داستۇرلەرىن، تاريحى مەن مادەنيەتىن جاقسى بىلەتىنىن جانە ارداق تۇتاتىنىن بايقاتتى.

بايقاۋ بىرنەشە كەزەڭنەن تۇردى - قازاقستاندىق ديزاينەرلەردىڭ قولىنان شىققان كيىمدەردىڭ ءسان بايقاۋى، شىعارماشىلىق جانە زياتكەرلىك الەۋەتتەرى سىن تەزىنەن ءوتتى.

العاشقى بايقاۋ كەزەڭىنەن كەيىن ۇمىتكەرلەر ساحنادا ۇستاۋ مادەيەتىن كورسەتىپ قانا قويماي، وزدەرىنىڭ قابىلەت-قارىمىن پاش ەتتى، ماڭگىلىك قۇندىلىقتار جونىندەگى پايىم-تۇسىنىكتەرىن ورتاعا سالدى، دومبىرا مەن قوبىزدىڭ جانە جەتىگەننىڭ اۋەنىمەن قازاقتىڭ بەلگىلى پوەزيا پاديشاسى مۇقاعالي ماقاتايەۆتىڭ سوزىنە جازىلعان اندەر اۋەلەدى، وپەرالىق شىعارمالار، تانىمال ەسترادالىق اندەر ورىندالىپ، بي سالتاناتى كورەرمەندەردى باۋراپ الدى.

استانادان بايگەگە قوسىلعان گۇلمارال قاجىحان جاس دومبىراشى نۇرجان تاشقىمبايەۆتىڭ سۇيەمەلدەۋىمەن ساحناعا بۇركىتتى الىپ شىقتى. سونداي-اق بايقاۋعا قاتىسۋشىلاردىڭ اكتەرلىك شەبەرلىكتەرى دە كورەرمەندەردى بەي-جاي قالدىرعان جوق.

بيىلعى جىلى بايقاۋدىڭ قازىلار القاسىندا بەلگىلى تەلەجۇرگىزۋشى ايگۇل مۇكەي، وتاندىق وپەرا پريماسى نۇرجامال ۇسەنبايەۆا، ديزاينەر ايدا قاۋمەنوۆا، تەاتر جانە كينو اكتەرى عاني قۇلجانوۆ، ايتىس اقىنى اينۇر تۇرسىنبايەۆا، ل.گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ، «حابار» تەلەارناسىنىڭ باعدارلامالار ءوندىرىسى ديرەكسياسىنىڭ باس پروديۋسەرى رينات كەرتايەۆ، استانا قالاسى مادەنيەت دەپارتامەنتىنىڭ باستىعى بولات ماجاعۇلوۆ، «قازاق ارۋى-2014» بايقاۋىنىڭ پروديۋسەرى بايان ەسەنتايەۆالار بولدى. قازىلار القاسىنا ق ر پرەمەر-مينيسترىنىڭ ورىنباسارى گۇلشارا ءابدىقالىقوۆا جەتەكشىلىك ەتتى.

 جارتى ساعات بويى كەڭەسكەننەن كەيىن قازىلار القاسى وزدەرىنىڭ شەىمىمىن جاريا ەتتى. ءۇشىنشى ورىن ەلوردالىق گۇلمارال قاجيحانعا بەرىلدى. ەكىنشى ورىندى ماڭعىستاۋلىق ۇلپان نۇرمانوۆا جەڭىپ الدى. ءبىرىنشى ورىنعا شىعىس قازاقستان وبلىسىنىڭ وكىلى اياۋلىم ەرعازى يە بولدى.

بايقاۋدىڭ گران-پريى جانە «قازاق ارۋى-2014» اتاعى ماڭعىستاۋ وبلىسىنان كەلگەن گۇلناز جولانوۆاعا بۇيىردى. ول ارۋ ءتاجىن وتكەن جىلعى جەڭىمپاز ايگەرىم قاناتبايەۆانىڭ قولىنان الدى.

«جىل وتكەن سايىن «قازاق ارۋى» بايقاۋىنىڭ ماڭىزى مەن ماعىناسى ارتا تۇسۋدە. بۇگىن ءبارى دە وتە جاقسى ءوتتى. مەنى قازىلار القاسىنا شاقىرعان بولاتىن. مەن وعان زور قاناعاتتانعاندىق سەزىممەن كەلدىم. بۇل جاي عانا اسەمدىك كونكۋرسى ەمەس، ونىڭ نەگىزىنە قازاق قىزىنىڭ سۇلۋلىعى مەن ىشكى مازمۇنى، قازاق حالقىنىڭ داستۇرلەرى مەن ءتىلىن ءبىلۋى، زيالىلىق، جاقسى ادەپ پەن ۇلگى سياقتى قۇندىلىقتار الىندى. بۇل ءبىزدىڭ جاستارىمىز ءۇشىن وتە پايدالى عوي دەپ ويلايمىن»، - دەپ اتاپ ءوتتى ق ر پرەمەر-مينيسترىنىڭ ورىنباسارى گۇلشارا ءابدىقالىقوۆا.

«بيىلعى جىلى بايقاۋ ءتورتىنشى رەت جانە استانادا العاش رەت ءوتىپ وتىر. بۇدان بۇرىن الماتىدا وتكىزىلىپ كەلگەن ەدى. ءبىزدى قالا اكىمدىگى قولدادى. كونكۋرس تۇجىرىمداماسى وزگەرگەن جوق، ول تۇسىنىكتى دە - ءبىز جاستاردى تاربيەلەيمىز، بۇل دا يدەولوگيا. سونىمەن قاتار ءبىز قازىرگى قازاق قىزى قانداي بولۋى كەرەك دەگەن ماسەلەگە جاۋاپ ىزدەدىك. ول ادەمى، ءبىلىمدى، ءوز حالقىنىڭ ءتىلىن، تاريحىن، مادەنيەتىن بىلەتىن بولۋى ءتيىس. مەنى قازىرگى جاستاردىڭ تەرەڭ ءبىلىمى تاڭعالدىردى. جاس قۇراقتاي ءوسىپ كەلە جاتقان كىشكەنتاي قىزدار ءبىزدىڭ بايقاۋىمىزدىڭ مۇراتتارىندا تاربيەلەنەتىن بولادى»، - دەدى «قازاق ارۋى-2014» بايقاۋىنىڭ پروديۋسەرى بايان ەسەنتايەۆا. ول بۇل بايقاۋ بۇدان بىلاي استانادا وتكىزىلەتىنىنە سەنىمىن ءبىلدىردى.

قازاقپارات