تىرشىلىك كوزىنەن تارىقپاس ءۇشىن سۋدى امالسىز ارنايى كولىكپەن ۇيلەرىنە تاسىپ ىشۋگە كوشكەن. ويتكەنى، قالا بيلىگى «كەڭساي» ىقشاماۋدانىنا ءالى كۇنگە سۋ قۇبىرىن جۇرگىزبەپتى، - دەپ حابارلايدى كتك ارناسى.

«كەڭساي» تۇرعىندارى كۇندەلىكتى تىرشىلىگىن سۋ تولتىرۋدان باستايدى. تاڭ اتىسىمەن ءبارىنىڭ سارىلا كۇتەتىنى سۋ اكەلەتىن ماشينا. تەك، ۇيىندە سۋ قۇيىپ الاتىن ىدىس بولماي قالسا، ەرتەڭگە دەيىن سۋسىز وتىرۋعا ءماجبۇر.

وسى كولىك بولماسا، ماڭايدىڭ ءبارى تىرشىلىك ءنارىن تاتۋدان قالادى. اۋىر تەحنيكانىڭ شلانگاسىن اۋلاسىنا سۇيرەپ اكەلۋ اسىرەسە، شال-شاۋقانعا قيىن. بۇعان كورشىلەر دە ۇيرەنگەن. سۋ كەلگەندە ءبارى ۇيلەرىنەن شىعىپ، قارت كىسىلەرگە كومەكتەسىپ، مولىنان قۇيىپ الۋعا تىرىسادى.

-وسى كوشەنىڭ كارىسىمىن. بالالارىم جۇمىستا. سۋ الۋ ماعان قالادى. ءازىر قارتايدىم. شلانگانى كوتەرەتىن شامام جوق، قىسقاسىن ايتقاندا. مىنا جاستار جۇمىس ىستەيدى. بۇلار جۇمىسقا كەتىپ قالسا، ۆودوۆوز كەلەدى دە بۇلار ول كۇنى سۋ الا المايدى. سۋدىڭ جەتپەۋ سەبەبى دە سول، - دەيدى تۇرعىن اكىم زەيناحۋنوۆ.

مۇنداعى جۇرت اۋلاسىندا ازىن-اۋلاق جەمىس-جيدەك ءوسىرۋ دەگەندى دە ۇمىتقان. تەك، كۇندەلىكتى ءشاي-سۋى مەن ىدىس-اياعىنا ازەر جەتكىزىپ وتىرادى. ايتۋلارىنشا، تۇرعىنداردىڭ وسىلاي قينالىپ جۇرگەندەرىنە 40 جىلدان اسقان.

-73-جىلدان بەرى تۇرامىن. ودان بەرى 43 جىل بولدى. مىنە، سودان بەرى ۆودوۆوزبەن عانا سۋ ىشەمىز. ورتالىق قالا الماتىنىڭ وزىندە 21 عاسىردا سۋسىز ءومىر ءسۇرۋ دەگەن قانداي قيىن جاعداي؟! ارينە، كەيبىر كەزدە قىستىڭ كۇنى سۋ كەلمەي قالادى، جەتپەي قالادى، - دەيدى رايحان نۇراحمەتوۆا.

كەڭسايلىقتار شاعىمىن ايتىپ، قايتا-قايتا ارىز جازسا دا اكىمدىكتەگىلەردەن ءالى كۇنگە قايىر بولماپتى. وتىز قارالى ءتۇتىننىڭ قاشانعى وسىلاي وتىرارى دا بەلگىسىز. قىرىق جىلدان بەرى قايىر كورسەتپەگەندەردەن ءبىز دە ءبىر ءجوندى جاۋاپ الا الماي قويدىق.