باتىستىڭ ۋكراينا مەن قىرىمعا "اراشا ءتۇسىپ"، رەسەيگە سالىپ جاتقان "جويقىن" سانكسيالارى مەن "قاھارلانا" تەلەفون سوعۋىنا قايران قالىپ وتىرىپ مىنا ءبىر انەكدوت ەسىمە ءتۇسىپ كەتتى.
باياعىدا ءبىر ءداۋ كەلە جاتسا، ءبىر اعاشتىڭ قۋىسىندا وكىرىپ جىلاپ وتىرعان بويى ءبىر قارىس، ساقالى قىرىق قارىستى كورىپ، جۇرەگى ەزىلىپ كەتىپتى. - ءوي، قىرىق قارىس اكەم، كىم تيىستى-ەي ساعان؟ نەگە مۇرنىڭ سىنعان، ءبىر ءتىسىڭ قالماعان، ساقالىڭ كۇيگەن، كوزىڭ قىپ-قىزىل، ءۇستى-باسىڭ قان-قان؟ - دەپ گۇجىلدەي سۇرايدى ءداۋ.
- اقسارباس، اقسارباس، مەنىڭ دە كۇنىم تۋدى ما؟! ءداۋ اعا، مىنا جاقتا ءبىر ايداھار شىقتى. جولعا كەسە-كولدەنەڭ جاتىپ العان. ۇيىمە قاراي وتكىزبەيدى. ءسال جاقىنداسام، قۇيرىعىمەن سالىپ قالادى. نە اۋزىنان وت شاشىپ كۇيدىرەدى. شاپ بەرىپ ۇستاپ الىپ سويديعان تىرناقتارىمەن تىرنالاپ وينايدى. ءۇستى-باسىمنان ساۋ تامتىق قالمادى. سابالا-سابالا اۋزىمدا جالعىز ازۋىم قالدى. اينالايىن، ءداۋ-اعا، اراشا ءتۇس! قۇداي جىبەردى سەنى، قۇداي! - دەپ زارلاي جونەلەدى الگى.
ءداۋ قىرىق قارىستى جەتەكتەپ الىپ، قاباعىن ءتۇيىپ، ىشقىرىن كوتەرىپ، ايداھارعا جاقىنداپ بارادى دا، ايعاي سالادى.
- ءاي، ۇشاتىن جامان كەسىرتكە، بەرى قارا! مىنا سورلىعا ەندى الىمجەتتىك قىلساڭ بار عوي ءوز وبالىڭ وزىڭە!
سويتسە الگى ايداھار بۇعان نازار دا اۋدارمايدى. ءتىسىن شۇقىپ جاتا بەرەدى. ول از بولسا قۇيرىعىنىڭ ۇشىمەن قىرىق قارىستىڭ باسىنان سالىپ قالادى.
- ءاي، مىناۋ قايتەدى-ەي؟!!! مەن كىممەن سويلەسىپ تۇرمىن-ەي؟!!! ەندى بار عوي، مىنا سورلىعا تىرناعىڭنىڭ ۇشىن تيگىزسەڭ بار عوي، ءبىتتىم دەي بەر!!!
وسى كەزدە ايداھار قىرىق قارىستى قۇيرىعىمەن تاعى ءبىر پەرىپ قالىپ، جالپ ەتكىزەدى.
- ءاي، ايداھار، سەن ءوزى مەنى ەستىپ تۇرسىڭ با؟ كىممەن سويلەسىپ تۇرعانىڭدى بىلەسىڭ بە؟!!! ءيتتىڭ عانا بالاسى، مىنا قىرىق قارىس - مەنىڭ تۋىسىم! ۇقتىڭ با؟!!! وسىدان بار عوي، تاعى ءبىر ءتيىسىپ كور، ءتورت اياعىڭدى كوكتەن كەلتىرەم!!!
ايداھار ءداۋدىڭ ءسوزىن ەلەڭ قىلماي قىرىق قارىستى قۇيرىعىمەن وراي قىسىپ، اسپانعا اتىپ جىبەرەدى.
- ەي، سوڭعى مارتە ەسكەرتەم...، - دەي بەرگەن ءداۋ جەڭىنەن بىرەۋدىڭ تارتقانىن سەزەدى. قاراسا، جاڭا عانا اسپانننان جالپ ەتىپ قۇلاپ تۇسكەن قىرىق قارىس ەكەن.
- ءداۋ اعا، - دەپ قىرىلداي سويلەپتى الگى بەيشارا، - ءداۋ اعا، قويشى، قۇرىسىن، ەشتەڭە دەپ ەسكەرتپەي-اق قويشى. ودان دا جالعىز ازۋىم مەن سوڭعى ءبىر تۇتام ساقالىم ساقتالىپ قالسىن دەسەڭ، ماناعى اعاشتىڭ قۋىسىنا قايتا كوتەرىپ اپارىپ تاستاشى!
