قىزىلوردادا الەۋمەتتىك جەلىدە ارانداتۋشىلىق سيپاتقا يە سۋرەت تاراتقان ادام قاماۋعا الىندى، - دەپ حابارلايدى Qamshy.kz. قىزىلوردا وبلىستىق ءىىد باسپا ءسوز قىزمەتىنە سىلتەمە جاساپ.

1 مامىردا الەۋمەتتىك جەلىلەردە «قىزىلوردا قالاسىنداعى نارازىلىق اكسياسىندا قايتىس بولدى» دەلىنگەن قان جوسا بولعان ەر ادامنىڭ ءمايىتىنىڭ فوتوسۋرەتى تاراپ كەتكەن بولاتىن.

اتالمىش دەرەك بويىنشا ق ر قىلمىستىق كودەكسىنىڭ 274-بابىنىڭ 2-بولىگىنىڭ 3-تارماعى بويىنشا سوتقا دەيىنگى تەرگەپ-تەكسەرۋ جۇمىستارى باستالعان.

«وبلىستىق ىشكى ىستەر دەپارتامەنتى اتالعان اقپارات شىندىققا ساي كەلمەيتىنىن، جالعان ءارى ارانداتۋشىلىق سيپاتقا يە ەكەندىگىن انىقتادى. سونىمەن قاتار، بۇل فوتوسۋرەت وزگە مەملەكەتتە بولعان وقيعانى بەينەلەيدى ءارى قازاقستان رەسپۋبليكاسىنا ەشقانداي دا قاتىسى جوق»، - دەلىنگەن حابارلامادا.

جەدەل-ىزدەستىرۋ جۇمىستارى بارىسىندا اتالعان اقپاراتتى الماتى قالاسىنىڭ م.جاكاۋوۆ ەسىمدى تۇرعىنى تاراتقانى انىقتالىپ، ازامات ىشكى ىستەر دەپارتامەنتىنە جەتكىزىلىپ، ودان كۇدىكتى رەتىندە جاۋاپ الىندى. جاۋاپ الۋ بارىسىندا كۇدىكتى ازامات ءوز كىناسىن مويىنداپ وتىر.

سول كۇنى-اق كۇدىكتى ازامات قىلمىستىق ءىس جۇرگىزۋ كودەكسىنىڭ 128-بابىنا سايكەس قىزىلوردا قالالىق ءىىب ۋاقىتشا ۇستاۋ اباقتىسىنا قامالدى. ءقازىر سوتقا دەيىنگى تەرگەپ-تەكسەرۋ جۇمىستارى جالعاسۋدا.