مەملەكەت باسشىسى ءوز سوزىندە جينالعانداردى الداعى وتان قورعاۋشى كۇنىمەن جانە  ۇلى وتان سوعىسىنداعى جەڭىستىڭ 71 جىلدىعىمەن قۇتتىقتادى، - دەپ حابارلايدى Qamshy.kz اقوردا سايتىنا سىلتەمە جاساپ.

– مەرەكە قارساڭىندا ءبىز ءداستۇر بويىنشا ءوز ءومىرىن اسكەري قىزمەتكە ارناعان ەڭ ۇزدىكتەرگە جوعارى اتاقتار تاپسىرامىز. سىزدەر كۇن-تۇن دەمەي، تاۋلىك بويى قىزمەت ەتەتىن ەرەكشە ماماندىقتى تاڭدادىڭىزدار. سىزدەر وتانىمىزدىڭ قاۋىپسىزدىگىن نىعايتۋعا زور ۇلەس قوسىپ كەلەسىزدەر، – دەدى قازاقستان پرەزيدەنتى.

نۇرسۇلتان نازاربايەۆ بۇگىندە رەسپۋبليكامىزدا ءتيىمدى ارميا قالىپتاسقانىنا، قارۋ-جاراقپەن جابدىقتاۋ باعدارلاماسى تابىستى جۇزەگە اسىرىلىپ، اسكەري قىزمەتشىلەردىڭ الەۋمەتتىك جاعدايىنا قامقورلىق كورسەتىلىپ جاتقانىنا نازار اۋداردى.

– ەلدىڭ قاۋىپسىزدىگى مەن قورعانىس قابىلەتىنە جاۋاپتى بارلىق قۇرىلىمنىڭ كاسىبي دەڭگەيى كۇننەن كۇنگە ءوسىپ كەلەدى. بۇل رەتتە گەنەرالدار مەن وفيسەرلەرگە ايرىقشا ماڭىز بەرىلەدى. جاۋىنگەرلىك ماشىق پەن شەبەرلىكتى ارتتىرۋ، اسكەرلەردىڭ ءومىرى مەن قۇقىق قورعاۋ ورگاندارىنىڭ جۇمىسىندا ساپالى وزگەرىس جاساۋ سىزدەردىڭ كوشباسشىلىقتارىڭىزعا بايلانىستى. سىزدەر بۇكىل جەكە قۇرامعا جانە جاس اسكەري قىزمەتشىلەرگە ۇلگى بولا وتىرىپ، جاۋىنگەرلىك ابىروي مەن باتىلدىق ءداستۇرىنىڭ ساقتاۋشىسى بولۋعا تيىسسىزدەر.  حالىق سىزدەردىڭ قىزمەتتەرىڭىز بەن ىس-ارەكەتتەرىڭىزگە قاراپ بۇكىل قارۋلى كۇشتەرگە باعا بەرەدى. سىزدەرگە ەڭ قىمبات نارسە – ازاماتتاردىڭ بەيبىت ءومىرىن ساقتاۋ جانە تاۋەلسىزدىك تابىستارىن قورعاۋ سەنىپ تاپسىرىلعان، – دەدى مەملەكەت باسشىسى.

قازاقستان پرەزيدەنتى ەلدىڭ ءقاۋىپسىز ءارى بەيبىت دامۋى عانا ونىڭ ءارى قاراي وركەندەۋىنىڭ كەپىلى بولاتىنىن ايتتى.

– «ارميا – ءوز ورنىن ەشقاشان تاستاپ كەتپەيتىن ماڭگىلىك قاراۋىل» دەگەن ءسوز بار. مەن سىزدەرگە جوعارى اتاق بەرە وتىرىپ، بۇدان ارى دا اسكەري بورىشتارىڭىزدى لايىقتى اتقاراتىندارىڭىزعا، وتانىمىزعا ءمىنسىز قىزمەت ەتەتىندەرىڭىزگە سەنەمىن. ەلدىڭ قاۋىپسىزدىگىن قامتاماسىز ەتۋ، قۇقىقتىق ءتارتىبى مەن كونستيتۋسيالىق قۇرىلىمىن قورعاۋ ءۇشىن بار كۇش-جىگەرلەرىڭىزدى، بىلىمدەرىڭىز بەن تاجىريبەلەرىڭىزدى جۇمسايتىندارىڭىزعا سەنىمدىمىن، – دەدى نۇرسۇلتان نازاربايەۆ.

ءراسىم بارىسىندا اۆياسيا گەنەرال-لەيتەنانتى اسكەري اتاعى ن.ورمانبەتوۆكە؛ ۆيسە-ادميرال اسكەري اتاعى ج.جانزاقوۆقا؛ مەملەكەتتىك كۇزەت قىزمەتىنىڭ گەنەرال-لەيتەنانتى ارناۋلى اتاعى – ا.كۇرەڭبەكوۆكە؛ 2-سىنىپتى مەملەكەتتىك ادىلەت كەڭەسشىسى سىنىپتىق شەنى – ج.اسانوۆقا؛ گەنەرال-مايور اسكەري اتاعى – ل.الشەكەنوۆكە، د.ءدىلمانوۆقا، ن.قاشاعانوۆقا، س.نۇراحمەتوۆكە، ج.ومارقۇلوۆقا، م.ساتوۆقا، اۆياسيا گەنەرال-مايورى اسكەري اتاعى – ا.ايىمبەتوۆكە، ن.كاربەنوۆكە؛ ۇلتتىق قاۋىپسىزدىك گەنەرال-مايورى ارناۋلى اتاعى – ا.دۇيسەبايەۆقا؛ سىرتقى بارلاۋ گەنەرال-مايورى ارناۋلى اتاعى – ك.ادەنوۆكە،  مەملەكەتتىك كۇزەت قىزمەتىنىڭ گەنەرال-مايورى ارناۋلى اتاعى – ا.اشىمبەكۇلىنا؛ پوليسيا گەنەرال-مايورى ارناۋلى اتاعى – ي.لەپەحاعا؛ 3-سىنىپتى مەملەكەتتىك ادىلەت كەڭەسشىسى سىنىپتىق شەنى م.قايىبجانوۆقا، س.نۇرپەيىسوۆكە، ۇ.پاتسايەۆقا بەرىلدى.