ءال-فارابي اتىنداعى قازاق ۇلتتىق ۋنيۆەرسيتەتىندە «ولجاس سۇلەيمەنوۆتىڭ شىعارماشىلىعى جانە ۇلتتىق سانانىڭ وزەكتى ماسەلەلەرى» اتتى حالىقارالىق عىلىمي كونفەرەنسيا ءوتتى.

بەلگىلى اقىن، قازاقستاننىڭ مەملەكەت جانە قوعام قايراتكەرى، حالىقارالىق «نيەۆادا-سەمەي» انتيادرولىق قوزعالىسىنىڭ پرەزيدەنتى ولجاس سۇلەيمەنوۆتىڭ 80 جىلدىق مەرەيتويىنا ارنالعان جيىن جاعىمدى نوتادا باستالدى. قوناقتار ۇلتتىق اسپاپتار ءانسامبلىنىڭ سۇيەمەلدەۋىمەن تانىمال سۋرەتشى اماندوس اقانايەۆتىڭ شىعارمالارى، ونىڭ ىشىندە مەرەيتوي يەسىنىڭ پورترەتى قويىلعان كورمەنى ارالادى.

پلەنارلىق وتىرىستىڭ شىمىلدىعىن تۇرە وتىرىپ، قازۇۋ رەكتورى عالىم مۇتان ۇلى ولجاس ومار ۇلىنىڭ بۇگىندە ەل يگىلىگى ءۇشىن قىزمەت ەتىپ جۇرگەن ازاماتتاردىڭ ءبىرى ءارى بىرەگەيى ەكەنىن اتاپ ءوتتى. «مەن ولجاس ومار ۇلىنىڭ نەگىزگى ءۇش قىزمەتىن اتاپ وتكىم كەلەدى. ول پوەزيا، عىلىمي پروزا جانە پۋبليسيستيكا، ونىڭ ازاماتتىق ۇستانىمىنىڭ ءىس جۇزىندەگى كورىنىسى. اقىن رەتىندە ول الپىسىنشى جىلدارداعى  اندرەي ۆوزنەسەنسكيي، روبەرت روجدەستۆەنسكيي، ەۆگەنيي ەۆتۋشەنكو، بەللا احمادۋللينا، نوۆەللا ماتۆەيەۆا، يۋننا موريس جانە وزگە دە تانىمال اقىندار تىزىمىندە ويىپ الار ورنى بار تۇلعا. ول «نەت ۆوستوكا ي زاپادا نەت، ەست وگرومنوە سلوۆو زەمليا» دەپ الەمگە جار سالدى. وسىلايشا 1961 جىلدان كەيىن ءوزىنىڭ ولەڭدەرىمەن امەريكا مەن باتىس ەۋروپانى باۋراپ الدى. ونىڭ شىعارماشىلىق كەشتەرىندە زال ىشىندە ينە شانشىرلىق جەر بولمايتىن ەدى»،– دەدى رەكتور.

ولجاس سۇلەيمەنوۆ – باتىل ارەكەتتەر ادامى. ءدال سوندىقتان، قىسقا مەرزىمدە «نيەۆادا-سەمەي» قوزعالىسى قۇرىلدى. از ۋاقىت ىشىندە ناتيجەلى ەڭبەكتەر اتقارىلدى. ماقساتى ايقىن اقىندىقتى جانىنا تۋ ەتكەن ازامات ءارقاشان ەل يگىلىگى ءۇشىن قىزمەت ەتتى. ءارى قاراي دا سولاي بولا بەرمەك.

«ولجاس سۇلەيمەنوۆ ءوزىنىڭ ەڭ العاشقى 1961 جىلى ساۋىردە جازعان «ادامعا تابىن جەر ەندى» پوەماسىمەن بۇكىل دۇنيەجۇزىنە قالاي تانىلسا، سول تانىلعان بيىگىنەن، ءوزىنىڭ سول رۋحاني ۇلى كەڭىستىگىنەن جازباي، جاڭىلماي كەلەدى. ولجاستىڭ ەڭ باستى بايلىعى، ەڭ باستى ەرەكشەلىگى – ونىڭ بويىندا قازاقتى الەمگە تانىتاتىن ۇلكەن رۋحتىڭ، ۇلكەن اسقاقتىقتىڭ بار ەكەندىگى. ونىڭ پوەزياسى بىرتە-بىرتە كەمەڭگەرلەرگە ءتان ويشىلدىققا ويىستى. ول عىلىم مەن ادەبيەتتى بىر-بىرىمەن ۇيلەستىرىپ، ۇشتاستىرا ءبىلدى. وسى ءۇردىستى ءقازىر دە جالعاستىرىپ كەلە جاتىر. ولجاكەڭ حالقىنىڭ ماحابباتىنا بولەنگەن تۇلعا. حالقىمەن قاشاندا وسىلاي بىرگە بولا بەرەدى»، - دەپ اتاپ ءوتتى قازاقستان جازۋشىلار وداعىنىڭ ءتوراعاسى، اقىن، سەناتور نۇرلان ورازالين.

جازۋشى، پۋبليسيست، لينگۆيست ولجاس سۇلەيمەنوۆتىڭ 80-جىلدىق مەرەيتويىنا وراي ۇيىمداستىرىلعان شاراعا ارنايى شاقىرىلعان مادەنيەتتانۋشى، پۋبليسيست، قوعام قايراتكەرى م.م. اۋەزوۆ قاتىسىپ، «ولجاس سۇلەيمەنوۆ جانە ۇلتتىق يدەيا» تاقىرىبىندا بايانداما جاسادى. ول: «بۇگىنگى ۇلكەن قۋانىشتى كۇن ولجەكەڭنىڭ قۋانىشى عانا ەمەس، بۇكىل قازاقتىڭ قۋانىشى. ولجاس ەڭبەكقورلىعىنىڭ ارقاسىندا وسىنشا بەدەلگە جەتتى. تەك قانا ءوزىن عانا تاربيەلەمەي، قازاقتىڭ ابىرويلى تاعدىرى ءۇشىن زور ۇلەسىن قوستى. ءدۇيىم جۇرتتىڭ اراسىندا پاتريوتتىقتى ناسيحاتتاپ، ۇلتتىق سانا سەزىمدى وياتقان جانە دۇرىس جولعا سالعان وسى ولجەكەڭ بولاتىن. ولجاستىڭ ءجۇرىپ وتكەن جولى كەز كەلگەن جانعا ۇلگى، جەتكەن جەڭىسى بۇكىل قازاق بالاسىنا ونەگە. اقىن – تەرەڭ ويدىڭ ازاماتى، رۋحتى ادام. سول مىقتى رۋحىنىڭ ارقاسىندا ەلىمىزدىڭ ابىرويىن اسقاقتاتتى. ۇتتىق رۋحتى قالىپتاستىردى»،- دەپ ءسوز باستاپ، اقىننىڭ اتقارعان ەڭبەگىندەگى ۇلت تاربيەسىنە قاتىستى تىڭ دۇنيەلەرمەن تانىستىرىپ ءوتتى.

القالى جيىن كونفەرەنسيانىڭ سەكسيالىق وتىرىستارىندا جالعاستى. ءىس-شارا بارىسىندا بارلىعى 50-دەن استام بايانداما تىڭدالىپ، ولجاس ومار ۇلى شىعارمالارىنىڭ قۇرىلىمدىق، ستيلدىك ەرەكشەلىكتەرى تالداندى.

ۇرپاققا ۇلگى، حالقىنىڭ ماڭدايىنا جارىق جۇلدىز بولىپ بىتكەن نار تۇلعا مەرەيتويىنىڭ العاشقى لەگى وسىنداي لەپپەن باستالدى. العاشقى بولىپ قۇتتىقتاعان الما-ماتەر ۇجىمى ولجاس ومارۇلىنا قاجىماس قايرات، سارقىلماس ءتوزىم مەن زور دەنساۋلىق تىلەيدى. ءالى دە الار اسۋلارىڭىز كوپ بولعاي!

ەلدانا توقباي