15 ناۋرىزدان بەرى جەزقازعان مەن قىزىلوردا ارالىعىندا قاتىنايتىن جولاۋشىلار پويىزى جۇرە باستاعان بولاتىن. كوپتەن كۇتكەن بۇل پويىز ەكى ءوڭىر حالقى ءۇشىن دە قۋانىشتى جاعداي ەدى. الايدا، كوپتىڭ قۋانىشى ۇزاققا سوزىلمادى.

جەزقازعاننان شىعىپ ارقا توسىنەن سىرعا بەت العان جولاۋشىلار پويىزى قارساقباي، قوسكول، بايقوڭىر سىندى ورتالىقتان جىراقتا ورنالاسقان ەلدى-مەكەندەردى باسىپ وتەدى. اۆتوكولىك جولىنىڭ جايسىزدىعىنان ۇزاق جىل قيىندىق كورىپ كەلگەن اۋىل تۇرعىندارىنا بۇل پويىز ىزدەگەنگە سۇراعان بولعان. باستاپقىدا پويىز 1 كۋپە، 2 پلاسكارت جانە 2 جالپى تيپتەگى بەس ۆاگونمەن جولاۋشىلار تاسىدى. ەندى «جولاۋشىلار تاسىمالى» اق-ى سول بەس ۆاگوندى كوپ كورىپ، بىرەۋىن قىسقارتىپ وتىر. قىسقارتقاندا دا ەلدىڭ سۇرانىسىنا يە ءارى بيلەت قۇنى ارزان جالپى تيپتەگى ءبىر ۆاگون الىنىپ تاستالدى. تاسىمالداۋشى كومپانيانىڭ بۇل ارەكەتى ءوڭىر تۇرعىندارىنىڭ نارىزىلىعىن تۋعىزۋدا.

«جالعىز قالعان جالپى ۆاگونعا بيلەت جوق. پلاسكارتقا دا جوق. كۋپەگە الىڭدار دەيدى. 6 ساعاتتىق جەرگە كۋپەگە ءمىنىپ باراتىنداي حالىق اسىپ-تاسىپ وتىرعان جوق»، - دەيدى ءوڭىر تۇرعىندارى.

وسى جەردە تاسىمالداۋشىلاردىڭ شىعىنعا باتۋىنىڭ ءبىر سەبەبى قىلاڭ بەرىپ وتىر. پويىز وتەتىن جاڭاعى اۋىلداردا بيلەت كاسسالارى جوق. اۋىل اراسىنا، قوسكول اۋلىنان جەزقازعانعا قاتىنايتىن جولاۋشىلار بيلەت قۇنىن جولسەرىكتەرگە تولەپ پويىزعا مىنەدى. ول اقشا ارينە جولسەرىكتىڭ قالتاسىندا قالادى. ءبىراق، بۇل جەردە تيىمسىزدىكتىڭ توركىنى جالپى تيپتەگى ۆاگوندا ەمەس، بيلەت ساتۋ جۇيەسىندە ەكەنىن ەسكەرگەن ەشكىم جوق.

قالتاسىن قاققان تەمىرجول باسشىلىعىنا نارازى اۋىل تۇرعىندارى ەندى جەرگىلىكتى باسشىلىقتان اۋىل مەن قالا اراسىن جالعايتىن تاس جولدى جوندەپ بەرۋدى تالاپ ەتۋدە.

ايسۇلتان ويباس