وڭتۇستىك قازاقستان وبلىسىندا «بەرەكە كورپوراسياسى» كومپانياسىنىڭ ءبىر توپ جۇمىسشىلارى 6 اي بويى اتقارعان جۇمىستارىنىڭ تولەماقىسىن الا الماي وتىرعاندارىنا قاتىستى شاعىمداندى، - دەپ حابارلايدى Qamshy.kz 31 ارناعا سىلتەمە جاساپ.
ال اتالمىش كومپانيانىڭ وكىلدەرى بولسا، بارلىق كىنارات الدىمەن جۇمىس اۋقىمىن جاساتىپ الىپ، كەيىن اقشا تولەۋدەن جالتارىپ وتىرعان باسقا مەكەمەنىڭ ارەكەتىندە دەپ وتىر.
كوپىر مەن جول قۇرىلىسىندا ەڭبەك ەتىپ، ماڭداي تەرىمەن تاپقان ءناپاقاسىنا قول جەتكىزە الماي وتىرعان ءبىر توپ جۇمىسشى وڭتۇستىكتە شۋ كوتەردى. ولاردى وزدەرى ەڭبەك ەتەتىن شىمكەنتتىك «بەرەكە» كورپوراسياسىنىڭ باسشىلىعى قارىز مەكەمەگە ەرتىپ كەلگەن. ايتۋلارىنشا، قوماقتى جۇمىس اۋقىمىن جاساتىپ العان كومپانيا، ولارعا اقشا تولەۋدەن جالتارعان.
«2013 جىلدان 2016-عا دەيىن العاندا «اكم پلانۋم» مەكەمەسى 84 ميلليون تەڭگە، ال «اكم جول» دەگەنى بار، سولاردىڭ دوچەرنيايا مەكەمەسى، سونى قوسقاندا جالپى سوماسى 150 ميلليون تەڭگە قارىز» دەيدى «بەرەكە كورپوراسياسى» ج ش س زاڭگەرى داۋرەنبەك ارتىقبايەۆ.
«بەرەكە» جۇمىسشىلارى اقشا تولەۋدەن جالتارعان كومپانيانىڭ ىسىنەن حاباردار ەكەندىكتەرىن ايتادى. الايدا مۇندا جينالعان ولار التى اي بويىنا اتقارىلعان ادال ەڭبەكتىڭ تولەمىنەن نەگىزسىز جالتارعانداردى كوزبەن كورگىمىز كەلدى دەيدى. ونىڭ ۇستىنە جالتارۋشى مەكەمە سوت ورىنداۋشىسىن دا سانىن سوقتىرىپ، ەسەپشوتىن كۇندە اۋىستىراتىن كورىنەدى.
ورداباسى اۋدانىندا اسفالت زاۋىتىن ورناتىپ، جول سالۋشى «اكم پلانۋم» مەكەمەسىنە «بەرەكەنىڭ» جۇمىسشىلارى كەلىپ شۋ كوتەرۋدە دەگەندى ەستىگەننەن كەيىن بە، ولاردىڭ وكىلدەرى تەز تابىلا قويدى. اقشانى تولەۋدەن جالتارمايمىز، سوت شەشىمىن ورىنداۋعا مىندەتتىمىز، تەك كەستە ءتۇزىپ، ءبولىپ تولەيتىن بولامىز دەگەندى كەسىپ ايتتى.
«ءيا، كەلىمەمىن. راس، ءبىز قارىزبىز. بەلگلى ءبىر مەرزىم بەرىلگەن. ءبىز قارىزدان قاشپايمىز. تەك بىزگە جۇمىس كولەمىن انىقتاپ، ەسەپتەۋگە ءبىراز ۋاقىت كەرەك» دەيدى «اكم پلانۋم» ج ش س جوبا جەتەكشىسى مۇحيت بايماعانبەتوۆ.
ۇلكەن كولەمدە قۇرىلىس جاساتىپ، قارىزىن بەرمەگەن كومپانيانىڭ بۇل ۋادەسىنە ازاماتتار كۇمانمەن قاراپ وتىر. سەبەبى مۇنداي ءسوزدى بۇعان دەيىن دە ەستىگەنبىز دەيدى. وكىلدىگى وسىندا، ال باسشىلىعى استانادا ورنالاسقان قارىز مەكەمە ءقازىر تەمىرلاندا جول توسەۋدە ەكەن. سوندىقتان، جۇمىس اۋقىمى بىتكەنشە بەرمەسە، كەيىن جوق بولادى ما دەپ قاۋىپتەنىپ وتىر شاعىمدانۋشىلار.
