زاۋرەش باتتالوۆا جەر كوميسسياسىنىڭ جۇمىس ءتارتىبىن سىنعا الدى، - دەپ حابارلايدى Qamshy.kz.

بۇگىن تاڭەرتەڭ استانادا باستالعان جەر رەفورماسى جونىندەگى كوميسسيانىڭ العاشقى وتىرىسىندا كوميسسيا مۇشەسى، قازاقستاندا پارلامەنتاريزمدى دامىتۋ قورىنىڭ پرەزيدەنتى زاۋرەش باتتالوۆا كوميسسيانىڭ جۇمىس ءتارتىبىنىڭ ءبىر تارماعىنا كوپشىلىكتىڭ نازارىن اۋدارتتى. اتاپ ايتقاندا، زاۋرەش باتتالوۆاعا «كوميسسيادا شەشىم كوپشىلىك داۋسىمەن قابىلدانادى» دەگەن تالاپ ۇناماي وتىر.

«مەن بارلىعىڭىزدىڭ اتالعان رەگلامەنتتىڭ 11-تارماعىنا نازار اۋدارۋلارىڭىزدى سۇرايمىن. وتىرىس ديسكۋسسيا ءۇشىن ديسكۋسسيا جاساۋعا ۇلاسپاۋى كەرەك. ءبىز ماسەلەنى تالقىلاي وتىرىپ، بەلگىلى-بىر توقتامعا كەلۋىمىز كەرەك. ماسەلەلەر داۋىس بەرۋگە قويىلماۋى قاجەت. ءبىز پارلامەنتتە وتىرعان جوقپىز جانە پارلامەنت دەپۋتاتتارى ەمەسپىز»، - دەدى ز. باتتالوۆا.

«ەگەر، ءتىپتى، ءبىر ادام بولسا دا بۇل شەشىمگە قارسى بولسا، وندا شەشىمدى بارلىعىنىڭ كوڭىلى تولاتىنداي ەتىپ قابىلداۋعا تىرىسۋ كەرەك. ەگەر وسى رەگلامەنتتە اتالعانداي داۋىس بەرەتىن بولساق، بۇل قوعامدى ءبىر توقتامعا اكەلە المايدى»، - دەگەن ەكس-سەناتور رەگلامەنتتىڭ اتالعان تارماعىن وزگەرتىپ، ءاربىر شەشىمدى كەلىسىپ قابىلداۋ تۋرالى ماسەلە كوتەردى.