ابايلاڭىز الاياقتار! الماتىدا تۇتىنۋشىلاردان زاڭسىز اقشا جينايتىن توپ پايدا بولدى، دەپ حابارلايدى Qamshy.kz كتك ارناسىنا سىلتەمە جاساپ.

«الماتىەنەرگوسبىت» مەكەمەسىنىڭ اتىن جامىلعان ولار ءتۇرلى سىلتاۋ ايتىپ، دۇكەن قوجايىندارىن تاقىرعا وتىرعىزىپ كەتكەن. ماسەلەن، سوڭعى ءبىر ايدىڭ وزىندە ءدال وسىنداي ون دەرەك تىركەلىپتى. الايدا ەشكىم ءتارتىپ ساقشىلارىنا شاعىمدانباعان. سوندىقتان ەلەكتر قۋاتىمەن قامتاماسىز ەتۋشى مەكەمە قىزمەتكەرلەرى كاسىپكەرلەر مەن تۇرعىنداردى اككى قۋلاردىڭ قۇرىعىنا ءتۇسىپ قالماۋعا شاقىرۋدا.

جان-جاعىنا جالتاقتاي قاراپ، دۇكەنگە كىرگەن ازامات ولگا بۋكرەيەۆانى سان سوقتىرىپ كەتە جازداعان. قىزمەتتىك كۋالىگىن كورسەتىپ ءوزىن «الماتىەنەرگوسبىت» مەكەمەسىنىڭ قىزمەتكەرىمىن دەپ تانىستىرعان الاياق دۇكەندەگى جارىقتى وشىرۋگە كەلگەنىن ايتىپتى. ياعني جەلىلەردە اقاۋ شىعىپ، ءتورت كۇن بويى ەلەكتر قۋاتى بولمايدى دەپ بوسكەن. ال اقشا بەرسە، ماسەلەنىڭ وڭاي شەشىلەتىنىن ايتقان.

-ول مەننەن 15 مىڭ تەڭگە سۇرادى. ياعني، اقشانى بۇگىن بەرسەڭىز، باستىقپەن ءبولىسىپ، جارىقتى وشىرمەيمىز دەدى. مەن وسىدان كەيىن بىردەن ءتيىستى مەكەمەگە حابارلاسىپ، ەشقانداي جەلىدە اپات بولماعانىن انىقتادىم. ال الاياق بىردەن ءىزىن سۋىتىپ ۇلگەردى، - دەيدى دۇكەن قوجايىنى ولگا بۋكرەيەۆا. 

وسىدان كەيىن الگى ازامات بۇل دۇكەنگە مۇلدەم جولاماعان. ەسەسىنە باسقا كاسىپكەرلەردى تاقىرعا وتىرعىزىپ كەتىپتى. ياعني سوڭعى ءبىر ايدىڭ ىشىندە «الماتىەنەرگسبىت» مەكەمەسىنە ونشاقتى دۇكەن قوجايىنىنان شاعىم تۇسكەن. بارلىعىندا دا الاياقتار ءتۇرلى سەبەپ ايتىپ، كاسىپكەرلەردەن جەتى مىڭ مەن 20 مىڭ تەڭگە ارالىعىندا اقشا الىپتى. ءتىپتى جالعان حاتتاما تولتىرىپ، تۇبىرتەك بەرگەن. الايدا جارىققا جاۋاپتى مەكەمە قىزمەتكەرلەرى ەشقاشان قولما قول اقشا المايتىندارىن ايتىپ وتىر.  

-بارلىق تولەمدەر ينتەرنەت-بانكينگ، كاسسا بولسىن جۇرەدى. قولما قول اقشا سۇراۋعا «الماتىەنەرگوسبىت» قىزمەتكەرلەرىنىڭ قۇقىسى جوق. ساۋىردە كوبەيىپ كەتتى مۇنداي جاعدايلار. وسى مامىر باستالعالى تاعى باستالدى. بۇرىن 7-8 مىڭ سۇراسا ءقازىر 15 مىڭ سۇرايتىن بولدى، - دەيدى «الماتى ەنەرگوكەشەنى» اق باسپا ءسوز حاتشىسى جانداربەك قاتپابايەۆ.

الايدا الدانعانداردىڭ بىردە ءبىرى پوليسياعا شاعىمدانباعان. سوندىقتان ازىرگە وڭاي ولجا كوزدەگەندەردىڭ ايى وڭىنان تۋىپ تۇر. ال «الماتىەنەرگوسبىت» مەكەمەسى بۇل جەردە تۇتىنۋشىلاردى ساق بولۋعا شاقىرۋمەن عانا شەكتەلە الادى.