ۇلتتىق-دەموكراتيالىق ۇستانىمداعى ساياساتكەر، بولاتحان تايجان قورىنىڭ پرەزيدەنتى، جەر رەفورماسى جونىندەگى ۇكىمەتتىك كوميسسيا مۇشەسى مۇحتار تايجان وسىلاي دەپ مالىمدەدى. بۇل تۋرالى Qamshy.kz حابارلايدى.
ساياساتكەردىڭ ايتۋىنشا، كوميسسيا قۇرامىنان شىعۋ جەر ماسەلەسىن وڭتايلى شەشۋگە ايتارلىقتاي سەپتىگىن تيگىزە قويمايدى.
«كوميسسيادان شىعۋ وندا «نۇر وتاندىق» كوپشىلىكتىڭ ورتاسىندا جۇمىستى جالعاستىرۋدان، جەر زاڭنامالارىن وزگەرتۋگە قول جەتكىزۋدەن الدەقايدا جەڭىل»، - دەگەن ساياساتكەر اتالعان كوميسسيا قۇرامىنان ءوزى قۇرمەتتەيتىن ءۇش ادامنىڭ شىعىپ كەتۋى جەر ساۋداسىنا نارازى ازاماتتاردىڭ كۇش-قۋاتىن باسەڭدەتەتىنىن جاسىرماعان.
«بۇل (بەلسەندىلەردىڭ كوميسسيا قۇرامىنان شىعۋى – رەد.) ارينە، ءبىزدىڭ كۇشىمىزدى السىرەتەدى. ءبىراق، مەن ءوز باسىم «نۇروتاندىقتار» ورتاسىندا جالعىز قالسام دا كوميسسيا قۇرامىنداعى جۇمىستى جالعاستىرامىن. مۇنداي بولا قويمايدى دەپ ۇمىتتەنەمىن»، - دەگەن مۇحتار تايجان «فەيسبۋكتە» جاريالاعان مالىمدەمەسىندە.
سونداي-اق، ساياساتكەر ءقازىر بۇرىنعى وتكەن ميتينگتەرگە قاتىسقاندار مەن باسقا دا بەلسەندىلەردى قۋدالاۋ شارالار ءجۇرىپ جاتقانىن ايتادى.
«وتكەن ميتينگتەرگە قاتىسقانداردى ءقازىر پوليسياعا شاقىرىپ، 21 مامىرداعى ميتينگكە قاتىسپايتىندىقتارى تۋرالى مىندەتتەمە جازعىزىپ جاتقانىن ءبىلىپ وتىرمىن. مەنىڭ ءوزىم سوڭعى ەكى اپتادا ەكى رەت اىىد-گە جەتكىزىلدىم، پروكۋروردان وسىنداي ەسكەرتۋ الدىم. جالپى مۇنداي پروكۋرورلىق ەسكەرتۋلەردى مەن 2012 جىلدان بەرى الىپ كەلەمىن»، - دەگەن ول بەلسەندىلەرگە قىسىم كورسەتۋدى توقتاتۋ تۋرالى جەر كوميسسياسىنىڭ العاشقى وتىرىسىندا دا ايتقانىن العا تارتادى.
كوميسسيا جۇمىسىنان ناقتى ناتيجە كۇتەتىنىن ايتقان مۇحتار تايجان ماسەلەنى تەك «كوميسسيا-پارلامەنت» ساتىسىندا وڭتايلى شەشۋگە بولاتىنىنا سەنىمدى.
«ماسەلە، كوميسسيادا ءبىز نەشە ادام ەكەندىگىمىزدە ەمەس. ماسەلە وندا حالىقتىڭ وي-پىكىرىن جەتكىزەتىن، اقىلعا قونىمدى ارگۋمەنتتەر ايتاتىن جاننىڭ بولۋىندا. ماعان سونداي ميسسيا بۇيىرعان ەكەن، مەن ونى لايىقتى ورىنداۋىم كەرەك.
(...) ءبىز ءوزىمىز بيلىك قۇلاق اسپاي جاتىر دەپ، كەلىسسوز الاڭى كەرەك دەپ سۇرادىق. مىنە، بيلىك حالىق ءۇنىن ەستىپ، بىزگە سونداي الاڭ ۇسىندى. ەندى ءبىز تىكەلەي ديسكۋسسيادان الشاقتاماي، ءوز دايەكتەمەلەرىمىزدى ايتۋىمىز قاجەت. سوندىقتان، مەن ونداعى جۇمىستى جالعاستىرامىن. قازىرگى تاڭدا مەن قاراپايىم سانالى ويدىڭ جەڭىسكە جەتەتىنىنە، ناتيجە بولاتىنىنا سەنەمىن. قوعام مەن بيلىك وزگەرىستەر جاسايتىن دەڭگەيگە جەتتى، ءبىزدىڭ قوعامنىڭ جالپى جاعدايىمىز، ناقتى ايتقاندا تىعىرىققا تىرەلگەنى بيلىككە دە، قوعامنىڭ وزىنە دە، بارلىعىنا بەلگىلى»، - دەيدى ساياساتكەر.
