قوستاناي قالاسىنىڭ ورتالىعىندا ەسىرتكىگە ەلتىگەن كولىك جۇرگىزۋشىسى جولاۋشىلارعا ارنالعان جولدا ەكى ادامدى قاعىپ ءولتىردى. جەدەل جاردەم قىزمەتىنىڭ وقيعا ورنىنا بىردەن كەلىپ جەتكەنىنە قاراماستان، دارىگەرلەر ولاردىڭ ومىرىنە اراشا تۇسە المادى، - دەپ حابارلايدى Qamshy.kz قازاقپاراتقا سىلتەمە جاساپ.

ءىىد-نىڭ باسپا ءسوز قىزمەتى 26 جاستاعى ەر ادامنىڭ وقيعا ورنىندا جان تاپسىرعانىن، ال 23 جاستاعى قىز قالالىق اۋرۋحانانىڭ جانساقتاۋ بولىمىنە جەتكىزىلىپ، سوندا كوز جۇمعانىن حابارلادى.

بۇل وقيعاعا كوپ ادام كۋا بولعان.

جاس ادامدار جولاۋشىلارعا ارنالعان جولمەن ءوتىپ بارا جاتقان. سول كەزدە بايماعامبەتوۆ كوشەسى جاعىنان «ZAZ Chance» كولىگى جوعارى جىلدامدىقپەن كەلە جاتقان. كۋاگەرلەردىڭ ايتۋىنشا، «ZAZ Chance» كولىگىنىڭ جۇرگىزۋشىسى ورتالىق كوشەدە باسقا كولىك جۇرگىزۋشىسىمەن جارىسقان.

كولىكتى باسقارعان ادام بىردەن ۇستالدى. ىشكى ىستەر دەپارتامەنتىنىڭ باسپا ءسوز قىزمەتى جۇرگىزۋشىنىڭ قارسىلىق تانىتپاعانىن اتاپ ءوتتى. جول اپاتىنا كىنالى ادام مەديسينالىق كۋالاندىرۋدان وتكەن سوڭ، ونىڭ قانىندا كانابويدتەر، ەسىرتكى بولعانى انىقتالدى.

اتالعان فاكتى بويىنشا، ق ر قك-نىڭ 345-بابى (جول قوزعالىسى ەرەجەلەرىن بۇزۋ) بويىنشا قىلمىستىق ءىس قوزعالدى. تەرگەۋ امالدارى جۇرگىزىلىپ جاتىر. كۇدىكتى ۋاقىتشا وقشاۋلاعىشقا قامالدى.