وتكەن جىلى ەل ۇكىمەتى ءبىرقاتار پايدالى قازبالاردىڭ كەن ورىندارىن اۋكسيون ارقىلى ساتۋ تۋرالى شەشىم قابىلداعانى بەلگىلى. سودان ساتىلىمعا قويىلاتىن ورىنداردىڭ ءتىزىمى جاسالىپ، اۋكسيونعا شىعارىلدى. وسى كۇنگە دەيىن اۋكسيونعا قويىلعان 100 ۋچاسكەنىڭ 49-ى يەسىن تاپتى دەگەن اقپارات تا تاراعان ەدى. الايدا، ۇكىمەتتىڭ بۇل باستاماسى بايانسىز باستاما بولىپ وتىر. ءساۋىر ايىندا جاريالانعان وسىنداي ءبىر اۋكسيون ساتىپ الاتىن الەۋەتتى ينۆەستوردىڭ تابىلماۋىنا بايلانىستى توقتاتىلعان ەدى. ەندى ينۆەستيسيالار جانە دامۋ جونىندەگى مينيسترلىك 16 ماۋسىمعا جوسپارلانعان تاعى ءبىر اۋكسيوندى وتكىزبەيتىن بولىپ وتىر.

بۇعان دەيىن وتكەن اۋكسيوندار اعىلشىن ادىسىمەن، ەڭ كوپ باعا ۇسىنعان قاتىسۋشىعا بەرىلىپ كەلدى. ماسەلەن، قاراعاندىداعى مىستوبە التىن كەنى ورنى 991 مىڭ تەڭگەلىك باعامەن باستالعان اۋكسيوندا 240 ميلليون تەڭگەگە ساتىلعان. رەسمي اقپارات كوزدەرى سول جولعى اۋكسيوندا بيۋدجەتكە ءبىر جارىم ميلليارد تەڭگە قاراجات تۇسكەنىن ايتادى.

وسىنداي ناتيجە ماۋسىمداعى اۋكسيوننان دا كۇتىلگەن كورىنەدى. ويتكەنى، ول اۋكسيونعا دا اقمولا وبلىسىنداعى «كومسومول ۋچاسكەسى» التىن كەنى ورنى (باستاپقى باعاسى 9 436 مىڭ تەڭگە)، سقو-داعى قاراتال الماز كەن ورنى (باستاپقى باعاسى 600 مىڭ تەڭگە) سىندى باي كەن ورىندارى قويىلعان بولاتىن. ءبىراق، وسىعان قاراماستان ەشبىر كومپانيا مەن قالتالى ازامات بۇل كەن ورىندارىن ساتىپ الۋ جونىندەگى اۋسكيونعا ءوتىنىش بەرمەگەن. ماماندار مۇنى سالالىق مينيسترلىكتىڭ جۇمىسىنداعى ءالى دە شەشىلمەگەن شيكىلىكتەرمەن بايلانىستىرادى. ولاي دەيتىنىمىز، اۋكسيونعا قويىلاتىن 101 نىساننىڭ 88-ىنە ءالى گەولوگيالىق بارلاۋ جۇمىستارىن جۇرگىزۋ قاجەت كورىنەدى. ياعني، ونى ساتىپ الۋشى گەولوگيالىق زەرتتەۋ جۇمىستارىنسىز قانداي پايدا تاباتىنىن الدىن الا ناقتى ەسەپتەۋ مۇمكىندىگى جوق. سوندىقتان دا، مۇنداي كۇماندى جوباعا اقشا سالۋدان تارتىنادى. ونىڭ ۇستىنە، گەولوگيالىق بارلاۋ جۇمىستارىنىڭ دا شىعىنى از ەمەس.

ۇزاق مەرزىمدى مۇنداي جوبالارعا قارجى قۇيۋعا شەتەلدىك ينۆەستورلاردىڭ دا اسىعاتىن ءتۇرى كورىنبەيدى. اۋكسيون ءوتىپ، جەڭىمپاز انىقتالۋى ءۇشىن وعان قويىلعان ءاربىر كەن ورنىنا كەمىندە ەكى قاتىسۋشى ءوتىنىش بەرۋ كەرەك كورىنەدى. يدم باسشىسىنىڭ ورىنباسارى البەرت راۋ اقپارات قۇرالدارىنا ماۋسىمدا ءوتۋى ءتيىس اۋكسيونعا شىعارىلاتىن ۋچاسكەلەرگە تەك ءبىر عانا وتىنىشتەن تۇسكەنىن حابارلاپتى.

بۇل رەتتە وتاندىق كاسىپورىنداردىڭ جاڭا كەن ورىندارىن ساتىپ الۋعا نە سەبەپتى قۇلىقسىزدىق تانىتىپ وتىرعانى تۇسىنىكتى. ءقازىر قازاقستاندا قارجىلىق قيىندىق كورمەي وتىرعان كومپانيا جوقتىڭ قاسى. ال، شەتەلدىكتەردىڭ قىزىعۋشىلىق تانىتپاۋىن ەلدەگى ساياسي احۋال مەن بولاشاقتاعى تۇراقتىلىق ماسەلەسىنە بايلانىستى الاڭداۋشىلىقپەن عانا بايلانىستىرۋعا بولار.

دارحان مۇقانتەگى