كەشە استانادا وتكەن ەۋرازيالىق وداققا مۇشە مەملەكەت باسشىلارىنىڭ باس قوسۋىندا رف پرەزيدەنتى وسىنداي ۇسىنىس تاستالى، - دەپ حابارلايدى Qamshy.kz كتك ارناسىنا سىلتەمە جاساپ.

-استانا بۇگىن ەۋرازيانىڭ ناعىز ساياسي  ورتالىعىنا اينالدى. 5 مەملەكەتتىڭ پرەزيدەنتتەرى 2 جىل بۇرىن ءدال وسى مامىر ايىندا ەلوردادا قۇرىلعان ەۋرازيالىق وداقتىڭ پايداسى مەن تىعىرىققا تىرەلگەن تۇستارىن اشىق ايتتى. باسقوسۋ قوجايىنى رەتىندە  نازاربايەۆ ءبىرقاتار ارىپتەستەرىمەن جەكە كەزدەسىپ تە ۇلگەردى.

سولاردىڭ ءبىرى - رەسەي پرەزيدەنتى. ۆلاديمير ءپۋتيندى نۇرسۇلتان نازاربايەۆ اقوردانىڭ الدىنا شىعىپ كۇتىپ الدى. حالىقارالىق پروتوكولعا سالساق، بۇل ۇلكەن قۇرمەت. نازاربايەۆ پەن پۋتين جەكە-دارا كەلىسسوز جۇرگىزىپ جاتقاندا، رەزيدەنسياعا لۋكاشەنكو، سارگسيان، اتامبايەۆ كىرىپ وتىرىس زالىنا بەتتەپ بارا جاتتى. كەيىن ەۋرازيالىق بەستىك جابىق ەسىك جاعدايىندا ءوزارا كەڭەسىپ، بۇدان سوڭ  قازاقستان، رەسەي، بەلارۋس، قىرعىزستان مەن ارمەنيا باسشىلارى كەڭەيتىلگەن قۇرامدا ينتەگراسيالىق ۇيىمنىڭ 2 جىلداعى  تابىسى مەن تونگەن قاتەرلەر تۋرالى ايتتى.

نۇرسۇلتان نازاربايەۆ، قازاقستان رەسپۋبليكاسىنىڭ پرەزيدەنتى:

-الەمدىك ەكونوميكاداعى تۇراقسىزدىق ءبارىمىز ءۇشىن سىناق بولىپ تۇر. سوندىقتان بىرلەسىپ، قويان-قولتىق جۇمىس ىستەۋىمىز قاجەت. تىعىرىقتان شىعار جولدى ىزدەۋىمىز كەرەك.

ءيا، داعدارىس شاتقاياقتاتىپ جىبەرگەن سالا كوپ. ەۋرووداقتىڭ ماسكەۋگە سالعان سانكسياسى، مۇنايدان تۇسكەن پايداعا تاۋەلدى رەسەي مەن قازاقستان ءوسىمىنىڭ باياۋلاۋى مينسك، ەريەۆان مەن بىشكەكتەگى ەكونوميكالىق احۋالدى قيىنداتىپ جىبەردى. اسىرەسە، كوپ ءۇمىت كۇتىلگەن  ينتەگراسيالىق ۇيىمنىڭ اقساپ جاتقان تۇستارىن لۋكاشەنكو كوبىرەك ايتتى.

الەكساندر لۋكاشەنكو، بەلارۋس رەسپۋبليكاسىنىڭ پرەزيدەنتى:

-وكىنىشكە قاراي، ءبىز جوسپارلاعانداي العا جىلجۋ بايقالمايدى. سوڭعى ءۇش جىلدا ءوزارا  تاۋار اينالىمى  قۇلدىراپ كەتتى. ەنەرگەتيكا، مۇناي-گازعا قاتىستى ءبىراز  جوبا  جارتى جولدا قالدى. شەشىم قابىلداۋدا بىرىزدىلىك جوق.

ءبىراق، باسقالار قىزۋقاندى لۋكاشەنكو ايتقانداي جاعدايدىڭ اسا قورقىنىشتى ەمەستىگىنە سەنىمدى. باستىسى وداقتاستار تاۋار اينالىمىنا   كەدەرگى كەلتىرمەۋى ءتيىس. ياعني، كەلىسىلگەن ساياسات جۇرگىزىپ 2025 جىلعا قاراي ورتاق مۇناي مەن گاز نارىعىن قۇرۋعا كەلىستى. بۇل 5 مەملەكەت بىر-بىرىنەن مۇنايدى باج سالىعىنسىز، نارىقتاعى باعامەن ساتىپ الادى دەگەن ءسوز.  وسى جەردە پۋتين ەكونوميكادان بولەك،اقپارات سالاسىن بىرىگىپ رەتتەۋدى ۇسىندى.

 ۆلاديمير پۋتين، رەسەي فەدەراسياسىنىڭ پرەزيدەنتى:

-وداق اياسىندا ءبىرتۇتاس اقپاراتتىق كەڭىستىك قۇرۋدىڭ بولاشاعى زور. بۇل ءۇشىن ەۋرازيالىق كوميسسيا ارنايى تۇجىرىمداما دايىنداپ، ءتيىمدى جوبا ۇسىنۋى ءتيىس. سونىمەن قاتار 2019 جىلعا قاراي ورتاق ەلەكتر ەنەرگەتيكالىق نارىقتى قالىپتاستىرۋىمىز قاجەت.

ورتاق نارىقتىڭ نە بەرەرى ازىرشە بەلگىسىز.  ارمەنيا پرەزيدەنتى ساۋدادان كورى، تاۋلى قاراباقتى كوبىرەك قوزعاسا، ءۇنسىز قالماعان اتامبايەۆ قىرعىز تاۋارىنىڭ تاسىمالىنا كەدەرگىنىڭ كوپتىگىن ايتىپ شاعىندى.

وسىلايشا، پرەزيدەنتتەر اقوردادا 4 ساعات بويى اشىق سويلەستى. الەمدەگى ۋشىققان گەوساياسي قىرعي-قاباققا قاراماستان ەۋرازيالىق وداق ەشكىمنەن بولەكتەنگىسى كەلمەيدى. ءتىپتى ەۋروپالىق وداقپەن  بايلانىس ورناتىپ، دۇنيەجۇزىنە ءتيىمدى  ينتەگراسيالىق ۇيىم ەكەنىن دالەلدەۋگە ءازىر.