اۋرۋحانانىڭ جەدەل جاردەم كولىكتەرىن قاقپادان وتكىزبەي قويىپ، دارىگەرلەردى جالىندىرعان جۇرگىزۋشى دە جاي ادام ەمەس بولۋى مۇمكىن. شۇعىل شاقىرتۋدان شىعىپ كەلە جاتقان  مەديسينا قىزمەتكەرلەرىنىڭ  "جول بەرىڭىز" دەگەنىنە قۇلاق اسپاي،  كەرىسىنشە بالاعاتتاپ، قىمبات كولىگىن جىلجىتۋعا ەرىنگەن ازاماتتىڭ كىم ەكەنىن  ىشكى ىستەر دەپارتامەنتى انىقتاپ بەرەمىز دەدى.

وڭتۇستىك قازاقستان وبلىسىندا تىركەلگەن 631 XZA مەملەكەتتىك نومەرلى كولىك جۇرگىزۋشىسى شۇعىل شاقىرتۋدان شىعىپ كەلە جاتقان جەدەل جاردەم كولىگى ارنايى دىبىس بەلگىسىن قوسسا دا، دارىگەرلەر جول بەرۋىن وتىنسە دە بىلق ەتپەيدى. جۇرگىزۋشى كىرۋگە رۇقساتى بار ەكەنىن ايتىپ، دارىگەرلەرگە اشۋلانىپ، ىزادان جارىلارداي بولىپ وتىر.

وقيعا №1 بالالار اۋرۋحاناسىنىڭ قاقپاسىنىڭ الدىندا بولعان. "ينفينيتي" اۆتوكولىگىنىڭ جۇرگىزۋشىسى جەدەل جاردەم كولىگىنە جول بەرمەي، ونىڭ جۇرگىزۋشىسىن بەيپىل سوزبەن بالاعاتتاپ تاستايدى. اۋرۋحانا باسشىلىعى ول ازاماتتىڭ قازىرگە دەيىن كەشىرىم سۇراپ، كەلمەگەنىن ايتادى.

ال قالا تۇرعىندارى جەدەل جاردەمگە جول بەرمەۋ - ادام ومىرىمەن ويناۋمەن بىردەي دەيدى. ولاردىڭ پىكىرى، مۇنداي دورەكىلىك ءۇشىن قانداي جاعداي بولماسىن اياماي جازاعا تارتۋ كەرەك.

جۇرگىزۋشىنىڭ قولىنداعى قاعاز ەمحانا اۋماعىنا كولىكپەن كىرۋگە ەمەس، بالاسىنىڭ قاسىنا بارۋعا بەرىلەتىن رۇقساتناما ەكەن. ال كۇن سايىن شامامەن 40-50 بالا اۋرۋحاناعا تۇسەدى. نەگە ەكەنى، كىرە بەرىستە مۇنداي ارەكەتتەر ءجيى بولىپ تۇرادى دەيدى مەكەمەنىڭ باس دارىگەرى.

اباي قۇسايىنوۆ، بالالار شۇعىل مەديسينالىق جاردەم ورتالىعىنىڭ باس دارىگەرى:

- ءار ازاماتتىڭ ءوزىنىڭ مادەنيەتىنە بايلانىستى، تاربيەسىنە بايلانىستى بولىپ وتىرعان نارسە عوي. ءبىزدىڭ ديسپەچەر ءبولىمىنىڭ قىزمەتكەرىنە ءسىز مەنەن كەشىرىم سۇراڭىز دەگەن سوزدەر ايتىلىپتى.

جول تالعامايتىن "ينفينيتي" قوجايىنىنىڭ كىم ەكەنى، قانداي مەكەمەدە قىزمەت اتقاراتىنى ازىرگە انىقتالعان جوق. قۇقىقبۇزۋشىلىق دەرەگىنە بايلانىستى قالالىق ءىىد-ى ءقازىر تەكسەرىس جۇمىستارىن جۇرگىزىپ جاتىر. تۇرعىندار بۇدان وزگە شۇعىل مەديسينالىق كومەك كولىگىنە قالاداعى جۇرگىزۋشىلەر كوپ جاعدايدا وڭايلىقپەن جول بەرمەيتىنى جاسىرىن ەمەس دەيدى.