تۇندە الماتىداعى العاباس ىقشام اۋدانىنداعى تۇرعىن ءۇيدىڭ بىرىنەن ادامدار شۇعىل شىعارىلدى. 200-دەن استام تۇرعىن ءتۇن ىشىندە كوشىرىلىپ، قالا اكىمدىگ كەلىسكەن قوناق ۇيلەرگە ورنالاستىرىلدى.

العاباستاعى ۇيلەردىڭ دەنى مەملەكەتتىك باعدارلامامەن باسپاناعا مۇقتاج ازاماتتارعا بەرىلگەن بولاتىن. تۇرعىنداردىڭ ىشىندە مۇگەدەكتەر مەن كوپ بالالىلار، اۋىر ناۋقاستار دا بار.

9 قاباتتى، ەكى پودەزدى ءۇيدىڭ قيسايعانىن بايقاعان تۇرعىندار ءتۇن ىشىندە ۇلارداي شۋلاپ دالاعا شىققان. ءقازىر ءۇيدى پوليسيا كۇزەتىپ تۇر. قالا باسشىلىعى ارنايى كوميسسيا قۇرىلىپ، ماسەلەنىڭ ءمان-جايىن انىقتايتىنىن ايتقان.

«كەز-كەلگەن جوبا مەمساراپتامادان وتەدى، سوسىن بارىپ قۇرىلىستى سالۋعا مسقب رۇقسات الادى. كوميسسيا قۇرىلاتىن بولادى، كوميسسيا قۇرامىنا مسقب، تج، اكىمدىك وكىلدەرى جانە كەرەك بولىپ جاتسا بىزدە كىرۋىمىز مۇمكىن. توتەنشە جاعداي كەزىندە ەرەجەلەر وسىنداي. قاراعاندىدا مۇنداي بولعان. بىزدە الماتىدا مۇنداي ءبىرىنشى رەت. كوپتەگەن جاعدايلار: تاشكەنتتە، شىمكەنتتە بولعان. وندا توپىراق شوككەن. ول بىلاي بولۋى مۇمكىن - جەر استىندا جەراستى سۋلارى بولادى، ولار ارناسىن اۋىستىرادى.  قۇرىلىس كەزىندە بارلىعى دۇرىس بولادى، ول جەردە جەر استى وزەنى جوق، بەس-التى جىلدا ءبىر وتەدى، ءارقالاي بولادى، كەيدە 20 جىلدا ءوتۋى مۇمكىن، جانە جەر استى سۋلارى "ويناقتايدى". بوس كەڭىستىك پايدا بولادى. نەگىزىنەن وسىنداي. شىمكەنتتە مۇنداي بولعان. ول جاقتاردى توپىراق شوككەن. قۇمداردىڭ شوگۋىن انىقتاۋ مۇلدەم مۇمكىن ەمەس»،-دەيدى قالالىق ساۋلەت جانە قالا قۇرىلىسى باسقارماسىنىڭ باسشىسى عابيت سادىربايەۆ.

تۇرعىنداردىڭ ءبىرشاماسى تۇندە پاتەرلەرىنەن باعالى زاتتارى مەن ازىق-تۇلىكتەرىن الىپ شىعا الماعاندىقتارىن، اكىمدىك بەرگەن قوناق ۇيلەردىڭ لاس ەكەندىگىن ايتىپ شاعىمدانۋدا. پوليسيا تۇرعىنداردى ۇيلەرىنە كىرىپ، كەرەك زاتتارىن الۋعا مۇمكىندىك بەرمەگەن كورىنەدى.

«ءبىز ول جاقتا قالا المادىق. «شاعان» ءقوناقۇيى وتە لاس، تەمەكى ءيىسى ءسىڭىپ قالعان، ول جاق بەيبەرەكەت، ەرلەر مەن ايەلدەر جىنىستىق قاتىناسقا تۇسۋدە،ايعايلايدى، باقىرادى. ول جەردە قالاي قالاسىڭ؟ مەنىڭ كىشكەنتاي نەمەرەم بار. بىزگە كولىكتە قونۋعا تۋرا كەلدى. ءبىزدى كىشكەنتاي بولمەگە ورنالاستىردى. مەن، ۇلىم، كەلىنىم جانە كىشكەنتاي نەمەرەم بار، ءبىز وندا جاتا المادىق. ءبىزدىڭ پاتەرىمىزدە قۇجاتتارىمىز، ازىق-تۇلىك، بارلىعى قالدى، ەندى ءبىزدى وندا جىبەرمەۋدە. ەندى نە كۇتەرىمىزدى بىلمەيمىز، ءسىرا جاقسىلىقتى كۇتۋ بەكەر شىعار»، - دەيدى تۇرعىنداردىڭ ءبىرى.

تۇرعىنداردىڭ دالادا قالۋ ءقاۋىپى كورشى ۇيدە دە بار. زاميرا ماكسۋموۆانىڭ ايتۋىنشا ولاردىڭ دا ۇيىندە جارىلعان جەرلەر بار جانە دە جەرتولەدە كەي كەزدەرى سۋ جينالادى.

ال، كەشە استانادا جاز ماۋسىمىنىڭ اشىلۋىنا وراي «بولاشاق ەنەرگياسى» تاقىرىبىمەن استانا Opەn Air دەگەن كونسەرت ءوتتى. «استانا-ارەنا» ستاديونىندا وتكەن ول كونسەرتتە رەسەيلىك جارتىلاي جالاڭاش انشىلەر ساحناعا شىعىپ، ول «قازاقستان» ۇلتتىق ارناسىنان تىكەلەي ەفير ارقىلى كورسەتىلدى. كونسەرتتى ۇيىمداستىرۋشىلاردىڭ قاتەلىگىنەن جينالعان كوپشىلىك ءبىرىن-بىرى يتەرىپ، بىرنەشە ادام تاپتالىپ قالا جازداعان. وسىلايشا، الماتىداعى شالاعاي ءىسى ءبىراز تۇرعىندى اۋرەلەگەن احمەتجان ەسىموۆ استاناعا بارىپ تا ەشتەڭەنى جىرعاتىپ جاتپاعان سياقتى. ەكسپو-نىڭ كونسەرتىنە بارعاندار دا، ۇلتتىق ارنا ەكرانىنان كورگەندەر دە ەسىموۆتىڭ بۇل ەسسىزدىگىنە نارازىلىق بىلدىرۋدە.

بۇل جەردە ءبىر اكىمدى كىنالاعانمەن ءىس بىتپەسى انىق. ءتۇبى جۇيە وزگەرمەي، اكىم تۇزەلمەيتىنىن ەل جاقسى ءتۇسىنىپ وتىر.

دارحان مۇقانتەگى