قاراعاندىدا ۇبت-دان بوساتىلعان مەكتەپ تۇلەگى جۇمباق جاعدايدا كوز جۇمدى، - دەپ حابارلايدى Qamshy.kz 31-ارناعا سىلتەمە جاساپ.

تەلەارنانىڭ حابارلاۋىنشا، مەكتەپ ءبىتىرۋشى تۇسكى استان كەيىن قايتىس بولعان. ۇلتتىق ءبىرىڭعاي تەستىلەۋدەن بوساتىلعان ون جەتى جاستاعى رۋسلان ايمۇحامبەتوۆتىڭ ءولىمى جاقىندارىنا جۇمباق بولىپ وتىر. ويتكەنى، تۋىستارى جەتكىنشەكتىڭ ەشقاشان اۋىرىپ كورمەگەنىن ايتادى. ال پوليسيا قىزمەتكەرلەرى قاجەتتى ساراپتاما تاعايىنداعانىن ايتادى.

وقيعا وسىدان ەكى كۇن بۇرىن رۋسلان ايمۇحامبەتوۆتىڭ سىنىپتاسىنىڭ ۇيىندە بولىپتى. ۇلتتىق ءبىرىڭعاي تەستىلەۋدەن بوساتىلعان ءۇش جەتكىنشەكتىڭ بىرەۋى ەمتيحانعا دايىندالىپ، تۇسكى استى دا بىرگە ىشتىك دەيدى. قاسىندا بولعانداردىڭ سوزىنشە، 17 جاستاعى رۋسلان جۇڭگو لاپشاسىمەن اۋقاتتانعاننان كەيىن ءوزىن جامان سەزىنە باستاعان. كەنەتتەن جەرگە قۇلاپ تۇسكەن تۇلەكتىڭ اۋىزىنان كوبىك اعىپ، قول-اياقتارى دىرىلدەي باستادى،- دەيدى سول كەزدە قاسىندا بولعان ەرحان مۇستافايەۆ.

ەرحان مۇستافايەۆ، رۋسلاننىڭ سىنىپتاسى: 

- ماسساج جاسادىق نەشە ءتۇرلى اياقتارىنان ۇرىپ. نەشە ءتۇرلى قولىمىزدان بارىن، بەتىنەن سۋ قۇيدىق. سوسىن ول كەزدە ۋجە سكورىيعا زۆوندادىق.

ءبىراق قالاداعى №57 مەكتەپ ليسەيىن ءبىر اپتا بۇرىن عانا ءتامامداعان رۋسلان ايمۇحامبەتوۆتى جيىرما بەس مينۋتتان سوڭ جەتكەن اق حالاتتىلار دا امان الىپ قالا الماعان.  جۇرەك-وكپە رەانيماسياسىن جاساعان قىزمەتكەرلەر جەدەل جاردەمگە قوڭىراۋدىڭ كەش تۇسكەنىن ايتىپ وتىر.

ايجان يسا، قاراعاندى وبلىستىق دەنساۋلىق ساقتاۋ باسقارماسىنىڭ باسپا ءسوز حاتشىسى:

- ءبىراق وكىنىشكە وراي، ءبىزدىڭ دارىگەرلەر كەلگەندە زارداپ شەگۋشى ومىردەن ءوتىپ كەتكەن. ءبىراق وعان قاراماستان دارىگەرلەر ءبارىن جاساعان.

ال قارا جامىلعان وتباسى رۋسلاننىڭ دەنساۋلىعى سىر بەرىپ كورمەگەن ەدى دەيدى. قايعىلى جاعدايدان قابىرعالارى قايىسقان جاقىندارى مەديسينالىق ۋنيۆەرسيتەتكە ءتۇسۋدى ارماندايتىن رۋسلاننىڭ جاقىندا رەسەيدە جوباسىن قورعاپ كەلگەنىن ايتادى.

باقتىباي ايمۇحامبەتوۆ، رۋسلاننىڭ اعاسى:

- ەشقاي جەرى اۋىرماعان. وتە ءبىر پىسىق-تىن. ءۇيدى ءوزى ءبارىن جيناپ.

تۇلەكتىڭ جۇمباق ولىمىنە قاتىستى ارنايى ساراپتاما جۇرگىزىلەدى. قورىتىندىسى شىقپاي، جەتكەنشەكتىڭ نەدەن قايتىس بولعانىن  ىشكى ىستەر دەپارتامەنتىندەگىلەر دە ايتا الماي وتىر. ال ءۇيدىڭ ورتانشى ۇلى رۋسلان ايتمۇحامبەتوۆتىڭ دەنەسى جەر قوينىنا بۇگىن تاڭەرتەڭ تاپسىرىلىپتى.