اقمولالىق كاسىپكەرلەر جەر كوميسسياسىندا ساياساتكەر مۇحتار تايجان كوتەرگەن اگروبانك قۇرۋ تۋرالى باستامانى قولدايدى، - دەپ حابارلايدى Qamshy.kz 24.kz – كە سىلتەمە جاساپ.
جەر رەفورماسى جونىندەگى كوميسسيانىڭ كوكشەتاۋدا وتكەن وتىرىسىندا اقمولالىق كاسىپكەرلەر وسىنداي ۇسىنىس جاسادى. بيزنەسمەندەردىڭ بۇل پىكىرى ءماجىلىس دەپۋتاتى ۆلاديسلاۆ كوساريەۆ تاراپىنان قولداۋ تاپتى.
ۆلاديسلاۆ كوساريەۆ، ق ر پارلامەنتى ءماجىلىسىنىڭ دەپۋتاتى:
- اگروبانك ءبارىمىز پايدالانا الاتىن قارجى ورتالىعىنا اينالادى. استىق ساۋداسىنان تۇسكەن قاراجات وسىندا جينالۋى ءتيىس. بۇل بانك اۋىل شارۋاشىلىعىن دامىتۋعا سەرپىن بەرمەك.
ءتورت ساعاتقا سوزىلعان جيىندا اقمولالىقتار جەرگە قاتىستى سان ءتۇرلى ۇسىنىستارى مەن پىكىرلەرىن ايتتى. ماسەلەن، جەر پايدالانۋدى باقىلاۋ جۇمىستارىن كۇشەيتۋ قاجەت دەگەن ويلار ورتاعا تاستالدى.
ال باسقوسۋدى قورىتىندىلاعان باقىتجان ساعىنتايەۆ «داۋلى ماسەلەنى اكىمدەر ەمەس، قوعامدىق كەڭەستەر شەشۋى ءتيىس» دەپ تۇيىندەدى.
باقىتجان ساعىنتايەۆ، ق ر پرەمەر-مينيسترىنىڭ ءبىرىنشى ورىنباسارى:
- جالعىز جەردى ساتۋ، جالعا بەرۋ ماسەلە عانا ەمەس، وسىنىڭ توڭىرەگىندە تولىپ جاتقان ماسەلە بار. ۇلكەن ءبىر ماسەلە – شەنەۋنىكتەردىڭ ىس-ارەكەتتەرى. سەنىم بولۋى كەرەك شەنەۋنىككە. وسى ماسەلەنى شەشۋ ءۇشىن سەنىم بولۋى كەرەك. ول سەنىمدى قالاي شەشەمىز؟ ماسەلەن، اۋكسيون ارقىلى قاراپ وتىرساڭىز، اكىمنىڭ ءوزى شەشىپ كەتەدى. بۇگىن سىزدەر وعان سەنبەي وتىرعان كەزدە، ەرتەڭ اناداي جاعداي بولعاندا، سەنىم بولا ما؟ سۇراق. سول سەبەپتەن بۇل جەردە ماسەلە ءبىر عانا اكىمنىڭ قولىندا ەمەس، ول حالىقپەن كەڭەسىپ وتىرىپ شەشۋى كەرەك.
