كەشە ۇكىمەت جانىنداعى جەر رەفورماسى جونىندەگى كوميسسيانىڭ مۇشەلەرى ايدوس سارىم، دوس كوشىم مەن مۇحتار تايجان الماتى قالاسى تۇرعىندارىمەن كەزدەستى، - دەپ حابارلايدى Qamshy.kz.

جينالعاندارعا كوميسسيا مۇشەلەرى كەڭەستىڭ جۇمىس بارىسى، ونداعى نەگىزگى ماسەلەلەر قانداي دەڭگەيدە تالقىلاناتىنى مەن كوميسسيا جۇمىسىنان قانداي ناتيجە كۇتىلەتىنىن ورتاعا سالدى.

كەزدەسۋگە كەلگەن بەلسەندىلەر مەن جۋرناليستەر كوميسسيا مۇشەلەرىنە ونىڭ جۇمىسى تۋرالى سۇراقتار قويۋمەن شەكتەلمەي ناقتى ۇسىنىستارىمەن دە ءبولىستى.

ءاليحان قاناپيا ەسىمدى كاسىپكەر ءوزىنىڭ اگرارلىق سالادا، ونىڭ ىشىندە شەتەلدىك كومپانيالارمەن ارىپتەستىك ورناتا جۇمىس ىستەۋ تاجىريبەسى بارىن العا تارتا وتىرىپ، جۇڭگو ينۆەستيسياسىنا قىزىعۋشىلىق ەل ءۇشىن ەكولوگيالىق ۇلكەن اپات اكەلۋى مۇمكىن ەكەنىن ايتادى.

«جەر كودەكسى سوڭعى وزگەرىستەرىمەن قولودانىسقا وتپەۋى كەرەك. وعان بىرنەشە سەبەپ بار. مىسالى، جۇڭگو ەلى ەكونوميكادا ناشار مەنەدجەر. ولار جەر استى سۋلارىنىڭ 90 پايىزىن، جەر بەتىندەگى سۋدىڭ 70 پايىزىن، ال، اۋاسىنىڭ 50 پايىزىن لاستاپ وتىر بۇگىندە. بۇل ولاردىڭ ءوز ەلدەرىندە ىستەگەندەرى. ال، ۇزاق مەرزىمگە جالعا الىنعان باسقا ەلدىڭ جەرىن قايتەتىنىن ءوزىڭىز باعامداي بەرىڭىز»، - دەيدى ول.

كاسىپكەر شەتەل ينۆەستيسياسىن تارتىپ، وعان وتەماقى رەتىندە جەردى ارەنداعا بەرگەننەن گورى، وتاندىق فەرمەرلەردى قولداۋدىڭ باسقا دا جولدارى بارىنا سەنىمدى.

«ۇلتتىق قوردان تەك 1 ميلليارد دوللار ءبولىپ، فەرمەرلەرگە تەگىن تەحنيكا تاراتساق، ول تەحنيكانى العان فەرمەردىڭ بىرنەشە جىلعا دەيىن ساتۋىنا تىيىم سالاتىن مەحانيزم ەنگىزسەك، بۇل اۋىلعا شىن قولداۋ بولار ەدى. بىزدە تەحنيكاعا مۇقتاج بولىپ وتىرعان كىسىلەر كوپ. ولار ول تەحنيكانى قۋانا الادى. ال، قازىرگى سۋبسيديا، باسقا دا جۇيەلەردىڭ تيىمدىلىگىن كورىپ وتىرعان جوقپىز»، - دەيدى ول.

كوميسسيا مۇشەلەرىنەن كوميسسياداعى  جەر ساتۋعا قارسى ۇستانىمداعى ازاماتتاردىڭ ءوزارا كەلىسپەيتىن تۇستارى مەن ماسەلەلەر تۋرالى دا سۇرالدى.

«ءار ادام ءوزىنىڭ پىكىرىن بىلدىرۋگە قۇقىلى. ونى ەسكەرۋ دە كەرەك. ءبىراق، كوميسسياداعى وسى ۇشەۋمىز (م. تايجان، د. كوشىم. ا. سارىم – رەد.) جەردى شەتەلگە جالعا بەرۋگە، ساتۋعا، قازاقستان ازاماتتارىنا جەكە مەنشىككە ساتۋعا قارسىمىز»، - دەپ جاۋاپ بەردى ول سۇراققا كوميسسيا مۇشەسى م. تايجان.

جيىن بارىسىندا كوميسسيا مۇشەلەرى قازىرگى كۇننىڭ وزىندە لاتيفۋنديستەرگە شەكتەۋ قويۋ، جەر كاداسترى مەن ونىڭ ەلەكتروندى بازاسىن جاساۋ، فەرمەرلەردى قولداۋ تەتىكتەرى تۋرالى بىرنەشە ۇسىنىستىڭ ءپىسىپ، جەتىلگەنىن جەتكىزدى.

كەزدەسۋگە كەلگەندەر كوميسسيا مۇشەلەرىنەن جەردى جەكە مەنشىككە ساتۋعا، شەتەلگە ارەنداعا بەرۋگە اياعىنا دەيىن قارسى بولۋدى سۇراپ، وزدەرىنىڭ وتىنىش-تىلەكتەرىن قاعازعا ءتۇسىرىپ، تاپسىرىپ بەردى.