ەلىمىزدىڭ بارلىق وبلىستارى مەن الماتى، استانا قالالارىندا لاڭكەستىك ءقاۋىپتىڭ سارى دەڭگەيى ەنگىزىلدى، - دەپ حابارلايدى Qamshy.kz.

مۇنداي شەشىم قابىلدانعانىن ۇقك ءتوراعاسى، لاڭكەتسىكپەن كۇرەس جونىندەگى رەسپۋبليكالىق جەدەل شتاب جەتەكشىسى ۆلاديمير جۋماكانوۆ مالىمدەدى. مۇنداي شەشىم پرەزيدەنتتىڭ 2013 جىلعى 9 تامىزداعى جارلىعىمەن بەكىتىلگەن لاڭكەستىك ارەكەت قاتەرى تۋرالى اقپاراتتى مونيتورينگتەۋ جانە حالىقتى قۇلاقتاندىرۋ مەملەكەتتىك جۇيەسىن ۇيىمداستىرۋ ەرەجەسى نەگىزىندە قابىلدانعان.

ەنگىزىلگەن قاۋىپتىلىك دەڭگەيى تۋرالى تۇرعىندارعا سمس-حابارلامالار جولدانۋدا.

ۇقك وسىعان بايلانىستى تۇرعىنداردان قاراۋسىز جاتقان، اسىرەسە سىممەن ورالعان، تەحنيكالىق قۇرالدارى بار زاتتارعا (سومكە، قوراپ، وراما، قاپ، چەمودان، ت.ب.)، قوعامدىق ورىندار مەن كولىكتەردە كۇدىكتى ادامدارعا نازار سالىپ جۇرۋگە، كۇماندى زاتتارعا تيىسپەۋگە، بەيتانىس تۇلعالاردان كۇماندى زاتتاردى ساقتاۋعا نەمەسە تاسىمالداۋعا الماۋعا كەڭەس بەرەدى.

سونداي-اق، ۇقك تاراتقان حابارلامادا تۇرعىنداردىڭ قۇجات تەكسەرگەن قۇقىققورعاۋ ورگاندارىنىڭ قىزمەتكەرلەرىنە تۇسىنىستىكپەن قاراپ، بارىنشا ولارعا جاردەمدەسۋ، مەملەكەتتىك ورگاندار تاراتقان رەسمي اقپاراتتى عانا باسشىلىققا الىپ، ۇرەيگە بوي الدىرماۋ سۇرالادى.