اقتوبەدەگى تەراكتقا قاتىستى دەپۋتاتتار دا ءوز پىكىرىن ءبىلدىردى. اۋعان سوعىسىنىڭ ارداگەرى باقىتبەك سماعۇل لاڭكەستەردىڭ اسكەري وبەكتىنى ادەيى تاڭداعانىن ايتادى. تولەرانتتىلىق دەپ توبەمىزگە شىعارىپ العان تەرروريستەردى ورگاندار تەكسەرىپ، ءتىپتى مەشىتكە بەينەباقىلاۋ ورناتۋ كەرەك دەدى. ال گەنەرال باقىتجان ەرتايەۆ پوليسەيلەر بارىن سالدى دەسە، ماجىلىستەگى ەكىنشى گەنەرال اباي تاسبولاتوۆ پىكىر بىلدىرۋدەن باس تارتتى، - دەپ حابارلايدى Qamshy.kz 31-ارناعا سىلتەمە جاساپ.
باقىتبەك سماعۇل، ق ر پارلامەنتى ءماجىلىسىنىڭ دەپۋتاتى:
- بۇل سول وڭىرلەردەگى سالافيلىك، ۆاحابيلىك تانىم وكىلدەرىنىڭ ىستەگەن ءىس -ارەكەتتەرى دەپ اشىق ايتۋعا ءتيىستىمىز. قازىرگى تاڭنىڭ وزىندە باتىستان قانشاما جۇزدەگەن ازاماتتارىمىز جات ەلدە سوعىسىپ ءجۇر. دەمەك ولاردىڭ تامىرى كەڭگە جايىلعان. مۇنىڭ بارلىعى قاراپايىم حالىققا ۇرەي تۋعىزباس ءۇشىن ونى تۇپ-تامىرىمەن جويۋ كەرەك. ءبىز ونداي قاتاڭدىققا بارۋىمىز كەرەك. كىمنەن، قايدان شىقتى؟ ونى قۇقىق قورعاۋ ورگاندارى تۇبەگەيلى زەرتتەۋ كەرەك. مەشىتتەردە ۆيدەوكامەرا بولۋى ءتيىس!
باقىتجان ەرتايەۆ، ق ر پارلامەنتى ءماجىلىسىنىڭ دەپۋتاتى:
- مۇندايدى جىبەرمەۋ جالعىز قۇقىق كوميتەتىنىڭ پارىزى ەمەس، ءتارتىپ ساقشىلارىنىڭ پارىزى ەمەس، بارىمىزگە قاتىستى.
ال، تەراكت كىمنىڭ قولىمەن جاسالدى، اتىسقا قاي ۇيىم جاۋاپتى ەكەنى ازىرگە بەلگىسىز. ىشكى ىستەر ءمينيسترى لاڭكەستەردىڭ كىم ەكەنىن انىقتادىق دەگەنىمەن، جاۋاپتى ورگانداردىڭ سايتىندا كۇدىكتىلەر تۋرالى اقپارات جوق. ال ۆاتساپ جەلىسى ارقىلى تاراپ جاتقان مىنا حابارلامادا قىلمىسقا قاتىسى بولۋى مۇمكىن 20-عا جۋىق ازاماتقا ىزدەۋ سالىنعان. سونداي-اق كۇدىكتىلەر رەسەيگە شىعىپ كەتپەۋى ءۇشىن قوستاناي وبلىسى قاۋىپسىزدىك شارالارىن كۇشەيتكەن. الايدا كەي ۇكىمەت مۇشەلەرى قىلمىسكەرلەردىڭ اتىن اتاپ، ءتۇرىن تۇستەۋگە اسىقپايىق دەپ وتىر.
ارىستانبەك مۇحامەدي ۇلى، ق ر مادەنيەت جانە سپورت ءمينيسترى:
- بۇلار سالافيتتەرگە جاتادى نەمەسە باسقا اعىمعا جەتەدى دەگەن دۇرىس ەمەس. سوندىقتان ءوتىنىش سىزدەرگە ءبىز بىر-بىرىمىزگە كەدەرگى جاساماي، قۇقىق قورعاۋ ورگاندارىنا ءبىز كەڭىنەن كومەكتەسۋىمىز كەرەك. سوندا عانا ءبىز ناقتى ايتا الامىز.
