ۇستىنە ءزار شاشىلعان جەزقازعاندىق ەكس-پوليسەي تولەگەن يگىبەكوۆ بۇگىن، 7 ماۋسىمدا بوستاندىققا شىعادى، - دەپ حابارلايدى Qamshy.kz Tengrinews.kz – كە سىلتەمە جاساپ.

مۇنداي شەشىمدى سۋديا الىمبەكوۆ شىعاردى. ول بەس جىلعا باس بوستاندىعىنان ايىرىلعان ەكس-پوليسەيدىڭ مەرزىمىن شارتتى جازاعا اۋىستىردى.

اپەللياسيالىق پروسەسستە مەملەكەتتىك ايىپتاۋشى تولەگەن يگىبەكوۆتىڭ جازاسىن شارتتى تۇردەگى جازاعا اۋىستىرۋدى سۇرادى. الايدا سۋديا سوتتالۋشىنىڭ ءتىپتى كەشىرىم سۇراماعانىن اتاپ ءوتتى. "يگىبەكوۆ نەگە ءالى كۇنگە كەشىرىم سۇراماعان؟ ال سۇحباتىندا وسىنداي جاعداي تاعى بولسا تاعى شاپالاقپەن ۇراتىنىن ايتادى. ونىڭ ءسوزىن قالاي باعالاۋعا بولادى؟ ول وكىنبەدى مە؟ وسىعان بايلانىستى ونىڭ جازاسىن جەڭىلدەتۋگە بولا ما؟"، - دەپ سۇرادى سۋديا پروكۋروردان.

ەكس-پوليسەيدىڭ ادۆوكاتى يگىبەكوۆتىڭ ارەكەتىندە قىلمىس قۇرامىنىڭ بولماعانىن ايتتى. 

"يگىبەكوۆ قىلمىس جاساعان ساتتە اففەكت جاعدايىندا بولدى. ونىڭ ارەكەتىندە قىلمىس قۇرامى بولمادى. يگىبەكوۆ قاراپايىم سەرجانت، سپورتشى، ونى بۇكىل جەزقازعان بىلەدى. ونىڭ سوزدەرىن دۇرىس تۇسىنۋلەرىڭىزدى سۇرايمىن، ول بوستاندىقتان ايىرۋ ورىندارىندا بولماۋى كەرەك"، - دەدى ادۆوكات مۋسين.

"قۇقىق قورعاۋ ورگاندارىنىڭ وكىلىنىڭ تاراپىنان كۇش كورسەتۋگە جول بەرۋگە بولمايدى. پوليسيا قىزمەتكەرلەرىنىڭ قورلاۋعا، نامىسىن تاپتاۋعا نەمەسە زورلىق كورسەتۋگە قۇقى جوق. يگىبەكوۆتىڭ سۇحباتىندا وسى جاعداي ەكىنشى مارتە بولسا ءدال وسىلاي ارەكەت ەتەتىن ەدىم دەگەن ءسوزى ماعان تۇسىنىكتى"، - دەدى سۋديا. 

ايتا كەتەيىك، پروسەسستە يگىبەكوۆتىڭ ءوزى جوق. ال جابىرلەنۋشى قايرات ەلۋبايەۆ قارسىلىق كورسەتپەگەنىن جانە پوليسەيگە ءزار شاشپاعانىن ايتتى. "(...) بيولوگيالق ساراپتاما جاساۋعا دايىنمىن. ولار كولىكتى توقتاتقاننان ۆيدەوعا تۇسىرگەنىم ءۇشىن بىردەن قولىمدى قايىرا باستادى. مەن انتيكوررۋپسيالىق قىزمەتكە حابارلاستىم، سەبەبى پوليسياداعىلار ماعان كومەكتەسپەيتىن ەدى. يگىبەكوۆكە قاتىستى وكپەم جوق. ۇكىمدى ءوز قالاۋىڭىزبەن شىعارۋىڭىزدى سۇرايمىن"، - دەدى ول.

سويتسە، جابىرلەنۋشىنىڭ ءوزى بۇرىنىراقتا انىقتاۋ ورگانىندا جۇمىس ىستەپتى. اتتەستاسيادان وتە الماعاندىقتان جۇمىستان شىعىپ قالىپتى. وسى وقيعالاردىڭ بارىسىندا جەكە كاسىپكەر بولىپ جۇمىس ىستەگەن. 

ايتا كەتەيىك، پروسەسسكە يگىبەكوۆتىڭ اناسى مەن تۋىستارى كەلدى. ايەلى ءمولدىر بايسالوۆا پروسەسسكە كەلە المادى. سەبەبى ول بالا بوسانىپتى. 28 مامىردا پوليسەيدىڭ ەكىنشى ۇلى دۇنيەگە كەلىپتى. 

سۋديا تاراپتاردى تىڭداعاننان كەيىن "جەزقازعان قالالىق سوتىنىڭ شەشىمىن سول مەرزىمگە شارتتى جازاعا وزگەرتۋ جانە پروباسيالىق باقىلاۋ ورناتۋ" جازاسىن قاۋلى ەتتى. وسىلايشا، يگىبەكوۆ بۇگىن، 7 ماۋسىمدا بوستاندىققا شىعادى. 

"وتە قۋانىشتىمىن! ونىڭ ايەلى مەنى ونسىز قايتپاۋىمدى تالاپ ەتكەن. ول ەكىنشى ۇلىن بوساندى. ونىڭ ەسىمىن امانگەلدى دەپ قويدىق. ەندى نە ىستەيتىنىمىزدى شەشەمىز. ازىرشە وسىعان قۋانىپ تۇرمىز"، - دەدى ەكس-پوليسەيدىڭ اناسى ءماريا يگىبەكوۆا.

سوتتىڭ ۇكىمى شىققاننان كەيىن زالداعىلار قول شاپالاقتاپ، قۋاندى.

اپەللياسيالىق سوت القاسىنىڭ ءتوراعاسى قاراعاندى وبلىستىق سوتىنىڭ ءتوراعاسى مۇسابەك الىمبەكوۆ بولدى.

ەسكە سالايىق، قالالىق جول-پاترۋلدىك پوليسياسىنىڭ قىزمەتكەرى ماس جۇرگىزۋشىنى شاپالاقپەن ۇرعانى ءۇشىن سوتتالعان بولاتىن. جۇرگىزۋشى قانىندا تابىلعان الكوگولدى كورسەتكەن كۋالاندىرۋ قورىتىندىلارىمەن كەلىسپەي، ءزارىن سەرجانتقا شاشىپ جىبەرگەن. وسى كەزدە سەرجانت ونى شاپالاقپەن ۇرعان. كەيىن جۇرگىزۋشى قامالىپ، كەپىلاقىمەن بوساتىلعان. وسىدان كەيىن 5 جىلعا سوتتالعان پوليسەيدىڭ ايەلى مالىمدەمە جاساعان بولاتىن.

ىشكى ىستەر ءمينيسترى قالمۇحانبەت قاسىموۆ بەتىنە ءزار شاشىلعاننان كەيىن جۇرگىزۋشىنى شاپالاقپەن ۇرعانى ءۇشىن بەس جىلعا سوتتالىپ كەتكەن جەزقازعاندىق پوليسەيدىڭ ءىسى بويىنشا جوعارعى سوتقا حات جازعانىن ايتتى.