يليا ينستاگرامدا جۇيكەمىزدى جۇقارتىپ ءجۇر. ءبىزدىڭ عانا ەمەس-اۋ، ينستاگرامعا تىركەلگەندەردىڭ ءبارىنىڭ شىعار. ول – ينستاگرامعا ەڭ كوپ سۋرەت جۇكتەيتىندەردىڭ ءبىرى. مەيلى عوي…

ايتسە دە، جۇكتەگەن سۋرەتتەرىنە قاراپ، چەمپيوندى جاتتىعۋ زالىنا جاتتىعۋ ءۇشىن ەمەس، سۋرەتكە ءتۇسۋ ءۇشىن بارادى-اۋ دەپ ويلاپ قالاسىڭ. جاتتىعۋ زالىنا كىرگەننەن-اق يليا «جاتتىعۋعا كەلدىم» دەپ سۋرەتىن جاريالايدى. سوسىن قانشا كەلى زىلتەمىر كوتەرگەنىن ىلەدى. زىلتەمىردى جۇلقا كوتەرگەنىن دە، سەرپە كوتەرگەنىن دە سۋرەتتەرىنەن ءبىلىپ وتىراسىڭ. سەكىرسە دە، جۇگىرسە دە، قىسقاسى نە ىستەسە دە ينستاگرامعا سالادى. اراسىندا اينا الدىندا ويلانىپ، وز-وزىنە تەسىلە قالاتىنى بار. تۇستەنۋگە بارعانىن دا فوتوسىنان اڭعاراسىڭ. وسىلايشا، ازاننان قارا كەشكە دەيىن چەمپيونىمىز سۋرەتكە تۇسۋمەن اۋرە. سۋرەتىنىڭ استىنا جازىلعان پىكىرلەردى وقىساڭ، ينستاگرامداعىلاردىڭ ءبارى دە يليانى جاقسى كورەدى. ريودا دا چەمپيون بولارىنا قالتقىسىز سەنەدى. مۇنى سالعان سۋرەتىنە ءبىر مەزەتتە 800-دەن ارتىق ادامنىڭ «لايك» باسقانىنان-اق بايقاۋ قيىن ەمەس. جازىلعان جاقسى پىكىرلەر دە سونىڭ دالەلى. الايدا، باتىرىمىزدىڭ بوس نارسەگە ۋاقىت كەتىرىپ جۇرگەنى ءبىرتۇرلى ەكەن. يليا يلين ءوز-وزىن بوساڭسىتىپ الماسا بولدى، ايتەۋىر. ءبىز سوعان الاڭدايمىز.

بۇرىندارى يلياعا نە ىستەسە دە جاراسىپ تۇراتىن. ماقتانسا دا، ماساتتانسا دا. ال ينستاگرامداعى جىرتاقايلىعىن جاراتپاي قالدىق. ەرتەڭ ۇلكەن دودالارعا دايىندىعى دۇرىس بولماي جاتسا، جاتتىعۋ زالىندا ينستاگرامعا سۋرەت جۇكتەۋمەن اۋرەلەنگەنى الدىنان شىعار. ەسىڭدى جي، يليا! سەن بىزگە ءۇش دۇركىن وليمپيادا چەمپيونى بولامىن دەپ ۋادە بەرگەنسىڭ!!!

"اقجەلكەن"