ۇستاز، الماتى قالاسى ورتالىق مەشىتىنىڭ نايب يمامى ەرسىن امىرە ءوزىنىڭ الەۋمەتتىك جەلىلەردەگى پاراقشالارىندا ەلدەگى تەرىس اعىمداردى، ونىڭ ىشىندە ءسالافيزم اعىمىن ۇستانۋشىلاردى ۇنەمى اشكەرەلەۋمەن كەلەدى. كەشە ە. امىرە سالافيتتەردى مادحاليت، سۋرۋريت، تاكفيريت دەپ ۇشكە ءبولۋدىڭ دۇرىس ەمەستىگىن، بۇل اعىمنىڭ قاي-قايسىسى بولماسىن راديكالدى ماقساتتار كوززدەيتىنىن اشكەرەلەگەن جازبا جاريالادى.

«مىناۋ سالافيلەردىڭ ءمادحاليتى دە، ءسۋرۋريتى دە، تاكفيريتى دە مويىندايتىن ساۋد ارابيا پاتشالىعىنىڭ شەيح يبن بازدان الدىڭعى ءمۋفتيى، مۋحامماد يبن ابدۋلۋاھھابتىڭ شوبەرەسى شەيح مۋحامماد يبن يبراھيم ءالۋ اش-شەيحتىڭ ءپاتۋاسى. ول كىسىگە «ۇكىم شىعارۋدا شاريعاتتى ەمەس، زاڭدى باسشىلىققا الاتىن ەلدى تاستاپ كەتۋ (حيجرات جاساۋ) كەرەك پە؟»، «ناماز وقىمايتىن ادامدارمەن ءبىر شاڭىراقتا ءومىر سۇرۋگە بولا ما؟» - دەگەن سۇراقتار جولدانعان. 
ول كىسى ءبىرىنشى سۇراققا: «زاڭمەن باسقارىلاتىن ەل يسلام ەلى بولىپ تابىلمايدى. ول جەردى تاستاپ كەتۋ (حيجرات جاساۋ) ءۋاجىپ»، - دەپ جاۋاپ بەرسە، ەكىنشى سۇراققا: «ونداي ادامدارمەن ءبىر شاڭىراقتا ءومىر سۇرۋگە بولمايدى. ولارعا ناسيحات ەتۋ كەرەك. ناسيحاتتى قابىلداماسا ولاردى تاستاپ كەتۋ كەرەك»، - دەگەن جاۋاپ ايتقان. ەلىمىزدەن سيريا، يراك، اۋعانستان سەكىلدى ەلدەرگە حيجرات جاساعان نەمەسە اتا-انالارىمەن ءبىر ۇيدە ءومىر سۇرۋدەن ياكي ءبىر داستارحاندا وتىرىپ اس ىشۋدەن باس تارتقان سالافيلەردىڭ وسى شەيحتىڭ ءپاتۋاسىن الماعاندىعىنا كىم كەپىل؟ 

ەلدەگى «بايسالدى سالافيلەردە پروبلەما جوق. پروبلەمانىڭ بارلىعى ءسايد قۇتىپپەن اسەرلەنگەن تاكفيرلەردە. شىنايى سالافيلىكتەن ەلىمىزگە تونەر ەشقانداي ءقاۋىپ جوق. ولار شىبىنعا دا زيان كەلتىرمەيدى»، - دەپ سايرايتىن ەكسپەرتسىماقتارعا سۇراق: «شەيح مۋحامماد يبن يبراھيم ءالۋ اش-شەيح ءبىلىمدى قايدان الدى؟»، - دەگەن ۇستاز ەرسىن امىرە جازباسىنىڭ سوڭىندا پايدالانعان دەرەككوزدەرىن دە كورسەتكەن.

مۋحامماد يبن يبراھيم ءالۋ اش-شەيح. ءفاتاۋا ءۋا ءراسا-يل. - مەككە قالاسى: ۇكىمەت باسپا ءۇيى، 1399 ھ.ج. VI توم. قاجىلىق، جاقسىلىققا بۇيىرىپ، جاماندىققا تىيىم سالۋ جانە جيحاد كىتابى. 188-190 بەتتەر. ءپاتۋا №1451، 1453.