جازعا قاراي قازاقستانداعى ينفلياسيا 7 پايىزدى قۇراۋى مۇمكىن. بۇل تۋرالى Tengrinews.kz تىلشىسىنە Forex Club كومپانياسىنىڭ توبى ءمالىم ەتتى.
ەستەرىڭىزگە سالا كەتەيىك، قازاقستاننىڭ ستاتيستيكا اگەنتتىگىنىڭ دەرەكتەرىنە سايكەس، قازاقستاندا 2013 جىلعى تۇتىنۋ ينفلياسياسى 4،8 پايىزدى قۇراعان، ال 2012 جىلى بۇل كورسەتكىش 6 پايىز بولعان ەدى. ەلىمىزدە بىلتىرعى جىلعى ينفلياسيانىڭ دەڭگەيى سوڭعى 15 جىلداعى ەڭ تومەنگى كورسەتكىش دەپ تانىلعان بولاتىن.
ساراپشىلار كەلتىرگەن دەرەكتەرگە سۇيەنەر بولساق، كورسەتكىشتىڭ تومەندەۋى 2013 جىلى جىل بويى، ءتىپتى 2014 جىلدىڭ اقپانىنا دەيىن باياۋ قالىپتا جۇرگەن. وسى ۋاقىتتا تۇتىنۋ باعاسىنىڭ يندەكسى 4،5 پايىزعا تەڭ بولدى.
"بولاشاقتاعى ينفلياسيا كورسەتكىشىنىڭ ديناميكاسىنا كوز جۇگىرتەر بولساق، ۇستىمىزدەگى جىلدىڭ جاز مەزگىلىندە قازاقستانداعى رەسمي ينفلياسيا كورسەتكىشى 7 پايىزعا دەيىن كوتەرىلمەك. ال جىلدىڭ اياعىنا دەيىن تۇتىنۋ باعاسىنىڭ يندەكسى 7،5-8 پايىزعا دەيىن وسەدى" دەيدى ساراپشىلار. ولاردىڭ ايتۋىنشا، ينفلياسياعا اسەر ەتۋشى نەگىزگى فاكتور اقپانداعى ديەۆالۆاسيانىڭ سالدارىنان يمپورت باعاسىنىڭ ءوسۋى بولماق.
