«استانا وپەرا» بالەتىنىڭ جەتەكشى ءسوليسى ايگەرىم بەكەتايەۆاعا رەسەيدىڭ حالىق ءارتىسى بوريس ەيفماننان ونىڭ ترۋپپاسىمەن ءساۋىر ايىنىڭ العاشقى كۇندەرى بۋداپەشتتە، ءساۋىردىڭ 15ء-ى مەن 19-ى ارالىعىندا لوندوندا، «كوليزەي» تەاترىندا وتەتىن گاسترول بارىسىندا ونەر كورسەتۋ جونىندە ۇسىنىس ءتۇستى.

بۇل تۋرالى «استانا وپەرا» تەاترىنىڭ باسپا ءسوز قىزمەتى حابارلادى.

قازاقستاندىق جاس ونەر ورداسى ماريين تەاترىنا گاسترولمەن بارعاندا سانكت-پەتەربور مەملەكەتتىك اكادەميالىق بالەت تەاترىنىڭ ديرەكتورى بوريس ەيفمان ايگەرىم بەكەتايەۆانىڭ ءولىپ بارا جاتقان اققۋدىڭ ءرولىن ويناعان كەزدەگى ىشكى جان دۇنيەسىنە، كاسىبي دەڭگەيىنە قايران قالىپتى. بۇعان دەيىن رەسەيدىڭ حالىق ءارتىسى «استانا وپەرا» تەاترىنىڭ ترۋپپاسىمەن «رودەن» بالەتىنىڭ تۇساۋكەسەرىندە جۇمىس جاساعان، ول كەزدە نازىك ايگەرىم بەكەتايەۆا كاميللا كلودەلدى بيلەدى. جاس ءارتىس ەۋروپالىق ساحنالاردا دا وسى ءرولدى ورىندايدى. وعان وڭاي سوقپايدى، سەبەبى اتالعان بالەتتىڭ حورەوگرافياسى ادەتتەگى كلاسسيكادان دا كەرەمەت. ونداعى باستى كەيىپكەر ادامنىڭ دەنەسى جانە ونىڭ مۇمكىندىكتەرى بولىپ تابىلادى.  جەتەكشى سوليسكە جۇكتەلگەن جاۋاپكەرشىلىك وتە جوعارى، بىرىنشىدەن، بۇل «رودەن» بالەتىنىڭ لوندونداعى تۇساۋكەسەرى، ەكىنشىدەن، بوريس ەيفمان ەشقاشان وزگە تەاتردان ارتىستەر شاقىرعان ەمەس، بۇل ايگەرىم بەكەتايەۆا ءۇشىن ۇلكەن قۇرمەت.

ايگەرىم بەكەتايەۆا - الماتىداعى ا. ۆ. سەلەزنيەۆ اتىنداعى حورەوگرافيالىق ۋچيليششەنىڭ تۇلەگى. 2012 جىلى ۆارناداعى (بولگاريا) بالەت ارتىستەرىنىڭ حالىقارالىق كونكۋرسىنىڭ لاۋرەاتى اتاندى، ءبىر جىلدان سوڭ - رۋدولف نۋرييەۆ اتىنداعى بالەت ارتىستەرىنىڭ حالىقارالىق كونكۋرسىنىڭ لاۋرەاتى جانە بالەت ارتىستەرى مەن حورەوگرافتارىنىڭ XII حالىقارالىق كونكۋرسىنىڭ (ماسكەۋ) ديپلومانتى. بالەرينا ءوزى ءۇشىن جاڭا ەيفماندىق جانردى اشقانىن جانە ءقازىر الدىنا قويعان نەگىزگى ماقساتى - كەمەلگە كەلۋ، ءوزىنىڭ جەتىلگەنىن سەزىنۋ ەكەنىن جاسىرمايدى. «مەن ءوز كەيىپكەرىمنىڭ قانداي سەزىمدە، ەموسيادا بولعانىن دالمە-دال جەتكىزۋ ءۇشىن ول جايلى كوپتەگەن كىتاپتار وقىدىم، فيلم كوردىم. وتە كوپ جۇمىس جاسالدى، ماعان دەيىن بۇل ءرولدى ويناعاندار ساحناداعى سەزىمدى جەتكىزۋ ماقساتىندا سول اتموسفەرانى ۇعىنۋ ءۇشىن جۇيكەسى اۋىراتىنداردىڭ اۋرۋحاناسىنا دا ارنايى بارعان». ايگەرىم بىرنەشە جىلدان كەيىن ونىڭ كاميللاسى  مۇلدەم باسقا بولاتىنىن، ونىڭ وسەتىنىن ايتادى.

«استانا وپەرا» بالەتىنىڭ كوركەمدىك جەتەكشىسى تۇرسىنبەك نۇرقالييەۆ «استانا وپەرا» تەاترىنىڭ سوليستەرى وزگە ەلگە بارىپ ونەر كورسەتۋ ءۇشىن قاجەتتى كاسىبي دەڭگەيدە ەكەنى اسا قۇرمەت، وسىلايشا تەاتر الەمدەگى جەتەكشى تەاترلارمەن قاتار تۇراتىنىن اتاپ ءوتتى.