تارازدا قارۋلى قاقتىعىستان اۋىر جاراقات العان ناۋقاس اقىرى اۋرۋحانانىڭ جانساقتاۋ بولىمىندە جاتىپ قايتىس بولدى، - دەپ حابارلايدى Qamshy.kz 31 ارناعا سىلتەمە جاساپ.

قازا تاپقان ازامات تاپا-تال تۇستە ءتارتىپ ساقشىسىنا وق جاۋدىرعان ەدى. 24 جاستاعى كۇدىكتىگە اتىس كەزىندە ەكى جەرىنەن وق تيگەن. الايدا، ول وق جاراقاتىنان ەمەس، اسقازان جاراسىنىڭ اسقىنۋىنان اجال قۇشتى دەيدى دارىگەرلەر. 
 
ايتا كەتەيىك پوليسيا مەن بۇزاقىلار اراسىنداعى قارۋلى قاقتىعىس ەكى جەتى بۇرىن تارازداعى 6-شى ىقشام اۋداندا بولعان ەدى. سول ماڭداعى مىنا ۇيگە جاسىرىنعان كۇدىكتى ارتىنان قۋا كەلگەن پوليسەيگە وق جاۋدىرعان. اتىستان ەكەۋى دە اۋىر جاراقات الىپ، اۋرۋحاناعا جەتكىزىلگەن. ەكى جەرىنە وق تيگەن سەرجانتتىڭ جاعدايى ءالى مۇشكىل، اق حالاتتىلار ونىڭ اياقتان تۇرىپ كەتۋى نەعايبىل،- دەيدى. ال ءبىر ءوزى بۇكىل قالانى شۋلاتقان ازاماتتىڭ بەتى بەرى قاراماي، باقيلىق بولدى. مويىن جانە كەۋدە تۇسىن تەسىپ وتكەن وقتان ونىڭ ءحالى مۇشكىل ەدى. الايدا، مارقۇمنىڭ اجالىنا اسقازان جاراسىنىڭ اسقىنۋى سەبەپ بولىپتى. ىشىنە قان قۇيىلىپ كەتكەن. دارىگەرلەر ونىڭ بۇل اۋرۋمەن ۇزاق ۋاقىتتان بەرى اۋىرعانىن ايتادى. ءدال وسى اسقازان جاراسى بولماعاندا ناۋقاس ءتىرى قالۋى بەك مۇمكىن ەكەن.
- جانساقتاۋ بولىمىندە توعىز كۇن بويى جاتقان ناۋقاستىڭ ءحالى تىپتەن اۋىر بولدى. ءبىز الدىمەن جاعدايىن ءبىر قالىپقا كەلتىرۋگە بار كۇش-جىگەرىمىزدى سالدىق. الايدا، اسقازان جاراسى اسقىنىپ، كۇرت ناشارلاپ كەتتى. بارلىق قاجەت ەم-دومىن دەر كەزىندە جۇرگىزگەنمەن جاعداي وسىنداي بولدى، - دەدى №1 قالالىق اۋرۋحاناسى باس دارىگەرىنىڭ ورىنباسارى ەربول وردابەكوۆ.