بۇگىننەن باستاپ قازاقستان رەسپۋبليكاسى ۇلتتىق ۇلانى «وڭتۇستىك» وڭىرلىك قولباسشىلىعىندا جانە بارشا اسكەري بولىمدەردە جازعى وقۋ كەزەڭى باستالدى.
بۇل كۇنى بارلىق وڭىرلىك اسكەري بولىمدەردە جازعى وقۋ كەزەڭىنىڭ اشىلۋىنا وراي سالتاناتتى ءىس-شارالار ۇيىمداستىرىلىپ، مەملەكەتتىك ءانۇران ورىندالدى. بارلىق بولىمدەردىڭ جەكە قۇرامىمەن ساپتىق تەكسەرىستەر، جاڭا وقۋ كەزەڭىنە دايىندىق بارىسى تەكسەرىلدى.
سالتاناتتى جاعدايدا الاڭدا ساپ تۇزەگەن بارشا جەكە قۇرامدى اسكەري بولىمدەر كومانديرلەرى جاڭا وقۋ كەزەڭىنىڭ باستالۋىمەن قۇتتىقتاپ، وتان قورعاۋ جولىنداعى ۇلى ىستەرىنە ساتتىلىك تىلەدى.
ءداستۇرلى تۇردە جاڭا وقۋ كەزەڭى جاۋىنگەرلىك دايارلىقتىڭ نەگىزگى پاندەرىنە كىرەتىن مەملەكەتتىك-قۇقىقتىق دايىندىق ساباعىن وتكىزۋدەن باستالدى. «وڭتۇستىك» وڭىرلىك قولباسشىلىعىنىڭ جەكە قۇرامىمەن وسى ءپان بويىنشا «نۇرسۇلتان نازاربايەۆ – قازاقستان رەسپۋبليكاسىنىڭ پرەزيدەنتى، ۇلت كوشباسشىسى، رەفورماتور، زاماناۋي تاۋەلسىز مەملەكەتتىڭ نەگىزىن قالاۋشى» اتتى تاقىرىپپەن العاشقى ساباقتى ۇلتتىق ۇلان «وڭتۇستىك» وڭىرلىك قولباسشىلىعىنىڭ قولباسشىسى گەنەرال-مايور الىبەك سەرالييەۆ وتكىزدى. ساباق بارىسىندا ول وفيسەرلەر مەن كەلىسىمشارت بويىنشا اسكەري قىزمەتشىلەرگە جاھاندا بولىپ جاتقان وزگەرىستەر مەن تۇراقسىزدىقتاردى، ونىڭ ءبىزدىڭ مەملەكەتىمىزگە تيگىزەر اسەرى جانە مەملەكەتىمىزدىڭ، ونىڭ ىشىندە اسكەرىمىزدىڭ الەۋەتىن ارتتىرۋ مەن دامۋى، الەمدىك داعدارىسقا قارسى مەملەكەت باسشىلىعىمەن اتقارىلىپ جاتقان ءىس-شارالار تۋرالى بايانداپ، سونىمەن قاتار تاۋەلسىزدىك العان جىلدان باستاپ بۇگىنگى كۇنگە دەيىن 25 جىلدا ەلىمىزدىڭ جەتكەن جەتىستىكتەرى مەن ەگەمەندىمىزدىڭ قالىپتاسۋى جانە دامۋى جولىنداعى قازاقستان رەسپۋبليكاسىنىڭ تۇڭعىش پرەزيدەنتى ن.نازاربايەۆتىڭ اتقارعان ءرولى تۋرالى تۇشىمدى پىكىرلەر كەلتىردى.
مەملەكەتتىك-قۇقىقتىق دايىندىق ساباعىنىڭ ەكىنشى بولىمىندە جەكە قۇرامعا قازاقستان رەسپۋبليكاسىنىڭ پرەزيدەنتى ن.نازاربايەۆ تۋرالى دوكۋمەنتالدى فيلم كورسەتىلدى.
ساباقتىڭ قورىتىندى بولىگىندە وڭىرلىك قولباسشىلىق وفيسەرلەرى مەن كەلىسىمشارت اسكەري قىزمەتشىلەرىنە 2016 جىلعى ەكىنشى جارتىجىلدىقتىڭ جازعى وقۋ كەزەڭىندە اتقارار مىندەتتەر مەن تاپسىرمالار جۇكتەلدى.
العاشقى ساباق اياقتالعان سوڭ وڭىرلىك قولباسشىلىق اسكەري بولىمدەرىنىڭ باسقارما جانە جاۋىنگەرلىك دايارلىق بولىمدەرىنىڭ وفيسەرلەرى ماتەريالدىق-تەحنيكالىق بازالارىن شىعارۋمەن اسكەر ءومىرىنىڭ قاۋىپسىزدىگىن ۇيىمداستىرۋ، ءتۇرلى ساباقتار وتكىزۋ كەزىندەگى جانە قارۋ-جاراق پەن وق-دارىلەردى، سونداي-اق تەحنيكالارعا قىزمەت كورسەتۋ مەن ونى باسقارۋ كەزىندەگى قاۋىپسىزدىك ءىس-شارالارى بويىنشا بارشا جەكە قۇراممەن پراكتيكالىق ساباقتار وتكىزدى.
ايدوس بايشاعىروۆ،
«وڭتۇستىك» وڭىرلىك قولباسشىلىعىنىڭ باسپا ءسوز قىزمەتى
